ທັງເປັນການເຕົ້າໂຮມຄວາມສາມັກຄີຮັກແພງຂອງບັນດາເອື້ອຍນ້ອງແມ່ຍິງ. ດັ່ງນັ້ນ, ໃນວັນທີ 6 ມີນາຜ່ານມາ ຢູ່ທີ່ຢູ່ທີ່ພະແນກການເງິນແຂວງຄໍາມ່ວນໄດ້ຈັດພິທີປາຖະກະຖາວັນດັ່ງກ່າວຂຶ້ນພາຍໃຕ້ຫົວຂໍ້ “ ສິດທິ,ຄວາມສະເໝີພາບ ແລະ ຄວາມເຂັ້ມແຂງເພື່ອແມ່ຍິງ ແລະ ເດັກຍິງທຸກຄົນ” ໂດຍການເຂົ້າຮ່ວມຂອງ ທ່ານ ນາງ ພອນນິມິດ ໄຊຍະວົງ ຄະນະພັກຮາກຖານພະແນກການເງິນແຂວງ (ຜູ້ຊີ້ນໍາວຽກງານອົງການຈັດຕັ້ງມະຫາຊົນ), ທ່ານ ນາງ ຜ່ອງສີ ນວນມະນີ ຄະນະບໍລິຫານງານສະຫະພັນແມ່ຍິງແຂວງ, ມີແຂກຖືກເຊີນ ແລະຄະນະໜ່ວຍແມ່ຍິງອ້ອມຂ້າງພະແນກເຂົ້າຮ່ວມ.
ທ່ານ ນາງ ອໍລະດາ ໄຊຍະສອນ ປະທານຮາກຖານແມ່ຍິງພະແນການເງິນແຂວງໄດ້ຜ່ານບົດສະຫຼຸບວຽກງານແມ່ຍິງປີ 2024 ແລະ ທິດທາງແຜນການປີ 2025ຊຶ່ງເຫັນວ່າໃນໄລຍະ 1 ປີທີ່ຜ່ານມາຄະນະໜ່ວຍແມ່ຍິງພ້ອມດ້ວຍສະມາຊິກທຸກຄົນໄດ້ຕັ້ງໜ້າປະກອບສ່ວນເຂົ້າໃນວຽກງານວິຊາສະເພາະຂອງຕົນດ້ວຍຄວາມເອົາໃຈໃສ່ ແລະ ມີຄວາມຮັບຜິດຊອບສູງຄຽງບ່າຄຽງໄຫຼ່ກັບເພດຊາຍໂດຍສະເພາະແມ່ນຄວາມຮັບຜິດຊອບທາງດ້ານໜ້າທີ່ການເມືອງ ຊຶ່ງໄດ້ເອົາການສຶກສາອົບຮົມທາງດ້ານການເມືອງແນວຄິດຕິດພັນກັບວຽກງານວິຊາສະເພາະເຮັດໃຫ້ການປະຕິບັດຈັດເກັບລາຍຮັບບັນລຸລື່ນແຜນການປີທີ່ວາງໄວ້ .
ຈາກນັ້ນທ່ານ ນາງ ຜ່ອງສີ ນວນມະນີ ຄະນະບໍລິຫານງານສະຫະພັນແມ່ຍິງແຂວງ ໄດ້ຜ່ານເອກະສານມູນເຊື້ອປະຫວັດຄວາມເປັນມາຂອງວັນແມ່ຍິງສາກົນຕະຫຼອດເຖິງຂະບວນການຕໍ່ສູ້ທວງເອົາສິດ ແລະ ຜົນປະໂຫຍດຂອງແມ່ຍິງທີ່ມີຕົ້ນກໍາເນີດຢູ່ທີ່ນະຄອນຊິກຄາໂກ (ປະເທດສະຫະລັດອາເມຣິກາ) ເພື່ອທວງໃຫ້ພວກນາຍທຶນຫຼຸດຜ່ອນຊົ່ວໂມງເຮັດວຽກລົງເປັນມື້ໜຶ່ງ 8 ຊົ່ວໂມງ ແລະ ມີການເພີ້ມຄ່າແຮງງານໃຫ້ເໝາະສົມ. ນອກຈາກນັ້ນ, ຍັງໄດ້ຍົກໃຫ້ເຫັນເຖິງການຖືກຄຸກຄາມທາງເພດ, ການໃຊ້ຄວາມຮຸນແຮງຕໍ່ເອື້ອຍນ້ອງແມ່ຍິງ ຈົນເຮັດໃຫ້ເປັນກະແສຕໍ່ຕ້ານແຜ່ຂະຫຍາຍໄປທົ່ວໂລກ ເຮັດໃຫ້ພວກນາຍທຶນຈໍາເປັນຕ້ອງປະຕິບັດຕາມຂໍຮຽກຮ້ອງຂອງແມ່ຍິງຂຶ້ນຈົນນໍາມາສູ່ການກໍາເນີດຂອງວັນແມ່ຍິງສາກົນໃນປີ 1910 ແລະ ໄດ້ກໍານົດເອົາວັນທີ 8 ມີນາ 1910ເປັນວັນແມ່ຍິງສາກົນຈົນເຖິງປັດຈຸບັນ.
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ