ພັດທະນາສື່ມວນຊົນໃຫ້ທັນກັບສະຖານະການ ແລະ ສອດຄ່ອງຕາມແນວທາງປ່ຽນແປງໃໝ່ຂອງພັກ

ຢ່າງໃດກໍຕາມ, ຖ້າອີງໃສ່ຄວາມຮຽກຮ້ອງຕ້ອງການຂອງສະພາບການໃໝ່, ສື່ມວນຊົນທາງການລາວຍິ່ງຕ້ອງໄດ້ພັດທະນາຕົນເອງໃຫ້ທັນກັບສະພາບການໃໝ່, ໃນນີ້ຂ້າພະເຈົ້າຂໍຍົກ 2 ບັນຫາທີ່ຕ້ອງໄດ້ບຸກທະລຸຢ່າງຕັ້ງໜ້າໄປຕື່ມອີກຄື: ໜຶ່ງ, ຕ້ອງບຸກທະລຸດ້ານເນື້ອໃນການລາຍງານຂ່າວໃຫ້ໄວ, ທັນເຫດການ, ສັ້ນກະທັດຮັດ, ຖືກໃຈທັງຜູ້ຢາກອ່ານແລະ ຖືກຕ້ອງຕາມແນວທາງຂອງພັກ, ຕ້ອງຮູ້ປັບປຸງຕົນເອງ ແລະ ຕອບໂຈດໃຫ້ໄດ້ວ່າເປັນຫຍັງຜູ້ອ່ານຈຶ່ງມັກອ່ານຂ່າວໃນສື່ບໍ່ເປັນທາງການຫຼາຍກວ່າສື່ທາງການ, ໝາຍຄວາມວ່າຕ້ອງນຳໃຊ້ທຸກຊ່ອງທາງການລາຍງານຂ່າວທັງຊື່ແບບເກົ່າ ແລະ ຊື່ແບບໃໝ່ໄປຄຽງຄູ່າກັນຢ່າງກົມກຽວ. ແຕ່ການບຸກທະລຸນີ້ກໍບໍ່ໄດ້ໝາຍຄວາມວ່າເປັນການລອກແບບ ຫຼື ກ່າຍເອົາບົດຮຽນຂອງຜູ້ອື່ນແບບ 100%, ແຕ່ຕ້ອງອີງໃສ່ສະພາບຈຸດພິເສດຂອງປະເທດເຮົາ ແລະ ແນວທາງການເມືອງຂອງພັກເຮົາເປັນຫຼັກ. ສອງ, ໃນດ້ານການສ້າງລາຍຮັບເຫັນວ່າສື່ທາງການພວກເຮົາໄດ້ປຽບກວ່າສື່ເອກະຊົນຍ້ອນມີລາຍຮັບຈາກງົບປະມານຂອງລັດເປັນບຸລິມະສິດ, ທັງມີບຸກຄະລາກອນ, ເຄື່ອງມື ແລະ ທິດຊີ້ນຳຢ່າງໃກ້ຊິດ, ແຕ່ການສ້າງລາຍຮັບດ້ານວິຊາການຍັງບໍ່ທັນເຮັດໄດ້ດີ. ພວກເຮົາກໍບໍ່ຄວນລືມໃນການສ້າງລາຍຮັບຈາກວິຊາການຂອງແຕ່ລະອົງການສື່ເພື່ອຮັບປະກັນຄວາມສະດວກສະບາຍໃນການເຮັດວຽກງານ. ໃນນີ້ຂ້າພະເຈົ້າຢາກເນັ້ນການສ້າງລາຍຮັບຈາກການລາຍງານຂ່າວຜ່ານຢູທູບ ແລະ ເຟສບຸກຂອງສື່ທາງການເຫັນວ່າຍັງໄດ້ໜ້ອຍ ຫຼື ເກືອບວ່າບໍ່ທັນມີເລີຍຖ້າທຽບໃສ່ສື່ທີ່ບໍ່ເປັນທາງການ. ຢາກແກ້ບັນຫານີ້, ສື່ທາງການຕ້ອງສ້າງນັກລາຍງານຂ່າວຜ່ານຢູທູບຢ່າງເປັນມືອາຊີບ (ຢູທູບເປີ) ຊຶ່ງບົດຮຽນນີ້ພວກເຮົາກໍເຄີຍມີມາແລ້ວໃນການສ້າງໂຄສົກມືອາຊີບ, ເພາະສະນັ້ນຄວນສ້າງນັກລາຍງານຂ່າວຜ່ານຢູທູບໃຫ້ມີທັງປະລິມານ ແລະ ຄຸນນະພາບ.

ເນື່ອງໃນໂອກາດລະນຶກວັນສ້າງຕັ້ງສື່ມວນຊົນລາວ ກໍຄືວັນສ້າງຕັ້ງ ໜັງສືພິມປະຊາຊົນ ສຽງຂອງສູນກາງພັກ ປປລາວ ຄົບຮອບ 75 ປີ ຂໍອວຍພອນໄຊມາຍັງອົງການຈັດຕັ້ງສື່ມວນຊົນທັງສູນກາງ ແລະ ທ້ອງຖິ່ນຈົ່ງສືບຕໍ່ມີຜົນງານໃໝ່ໃຫຍ່ຫຼວງກວ່າເກົ່າ, ສືບຕໍ່ຈັດຕັ້ງຜັນຂະຫຍາຍແນວທາງປ່ຽນແປງໃໝ່ສູ່ລວງເລິກຢ່າງເປັນຮູບປະທຳ.