ສຳລັບແຂວງຜົ້ງສາລີ ໄດ້ຮັບການສະຖາປະນາຂຶ້ນຢ່າງເປັນທາງການໃນວັນທີ 1 ກັນຍາ 1955 ຢູ່ບ້ານປາກບານ ເມືອງໃໝ່ (ປັດຈຸບັນຂຶ້ນກັບເມືອງຂວາ). ອົງຄະນະພັກແຂວງໄດ້ດຳເນີນກອງປະຊຸມໃຫຍ່ຄັ້ງທີ I ຢ່າງເປັນທາງການໃນວັນທີ 18-30 ຕຸລາ 1968 ຢູ່ຫ້ວຍປຸງບຸດ ບ້ານປາກແພ ເມືອງໃໝ່ ແລະ ກອງປະຊຸມໃຫຍ່ຄັ້ງທີ II ໃນຕົ້ນເດືອນສິງຫາ 1971 ຢູ່ບ້ານຫ້ວຍອຸ່ນ ເມືອງໃໝ່ ໂດຍໄດ້ຮັບກຽດຈາກສະຫາຍເລຂາທິການໃຫຍ່ ປະທານ ໄກສອນ ພົມວິຫານ ລົງມາຊີ້ນຳໂດຍກົງອັນເປັນເຫດການສຳຄັນທາງປະຫວັດສາດ.
ຕະຫຼອດໄລຍະ 40 ປີແຫ່ງການຈັດຕັ້ງປະຕິບັດແນວທາງປ່ຽນແປງໃໝ່ (1986-2026) ພາຍໃຕ້ການນຳພາຂອງສູນກາງພັກ, ຄະນະບໍລິຫານງານພັກແຂວງແຕ່ລະຮຸ່ນ ໄດ້ບຸກບືນສູ້ຊົນເຮັດໃຫ້ແຂວງຜົ້ງສາລີ ຈາກສະພາບແຂວງທີ່ອ່ອນນ້ອຍທຸກຍາກຫຼ້າຫຼັງໃນທຸກດ້ານ ມີພຽງ 6 ເມືອງ, 713 ບ້ານ, ພື້ນຖານໂຄງລ່າງເລີ່ມຕົ້ນຈາກສູນ, ໄດ້ກ້າວຂຶ້ນຢ່າງໜັກແໜ້ນຕາມທິດທາງທີ່ພັກໄດ້ກຳນົດໄວ້.
ຜ່ານການຜັນຂະຫຍາຍ ແລະ ຈັດຕັ້ງປະຕິບັດແນວທາງການປ່ຽນແປງໃໝ່ຮອບດ້ານ ນັບແຕ່ມະຕິກອງປະຊຸມໃຫຍ່ຄັ້ງທີ IV ຈົນມາຮອດຄັ້ງທີ XI ຂອງພັກ ແລະ ພວມກະກຽມສູ່ກອງປະຊຸມໃຫຍ່ຄັ້ງທີ XII ຂອງອົງຄະນະພັກແຂວງ. ທາງດ້ານເສດຖະກິດ-ສັງຄົມຂອງແຂວງຜົ້ງສາລີ ໄດ້ຮັບການພັດທະນາໃນຫຼາຍດ້ານ ຊຶ່ງສັງລວມໄດ້ດ້ານທີ່ພົ້ນເດັ່ນຄື:ດ້ານເສດຖະກິດມະຫາພາກຂະຫຍາຍຕົວຢ່າງຕໍ່ເນື່ອງ ໃນລະດັບສະເລ່ຍ 6.51% ຕໍ່ປີ (1997-2006), ເປັນ 6.47%/ປີ (2016-2025) ແລະ ໃນແຜນຄັ້ງທີ X (2026-2030) ຂະຫຍາຍຕົວສະເລ່ຍຢ່າງຕ່ຳ 5.5%ຕໍ່ປີ. ມູນຄ່າ GDP ໃນໄລຍະ 2017-2026 ບັນລຸ 31,982 ຕື້ກີບ ເພີ່ມກວ່າ 17,480 ເທົ່າທຽບໃສ່ປີ 2006; GDP ຕໍ່ຫົວຄົນບັນລຸ 40 ລ້ານກີບ ຫຼື 1,843 ໂດລາ ເພີ່ມຫຼາຍກວ່າ 10 ເທົ່າ. ການລົງທຶນຂອງລັດຈາກ 4.36 ຕື້ກີບ (1987-1996) ມາເປັນ 1,163.77 ຕື້ກີບ (2017-2026) ເພີ່ມຫຼາຍກວ່າ 260 ເທົ່າ.
ການສົ່ງເສີມການຜະລິດ: ຜົນຜະລິດເຂົ້າຈາກ 11,320 ໂຕນໃນປີ 1986 ຄາດຄະເນຮອດປີ 2026 ຈະບັນລຸ 1,072,484 ໂຕນ ເພີ່ມກວ່າ 94 ເທົ່າ; ຂະຫຍາຍຈາກ 2 ຊະນິດເປັນ 8 ຊະນິດພືດຕົ້ນຕໍ (ຊາ, ຢາງພາລາ, ໝາກແໜ່ງ, ກາເຟ, ອ້ອຍ, ໝາກກ້ວຍ, ສາລີ ແລະ ການລ້ຽງສັດ-ປະມົງ). ໂຄງລ່າງຊົນລະປະທານພັດທະນາຮອດ 3,412 ແຫ່ງ, ອັດຕາປົກຫຸ້ມປ່າໄມ້ຮັກສາໄດ້ 65%.
ການຄ້າ ແລະ ການສົ່ງອອກ: ຕະຫຼາດຈາກ 1 ແຫ່ງ ຂະຫຍາຍເປັນ 52 ແຫ່ງ (ເພີ່ມ 52 ເທົ່າ); ຫົວໜ່ວຍທຸລະກິດຂາຍຍ່ອຍຈາກ 91 ຫົວໜ່ວຍ ຂະຫຍາຍມາເປັນຫຼາຍກວ່າ 3,000 ຫົວໜ່ວຍ (ເພີ່ມ 32 ເທົ່າ); ມູນຄ່າສົ່ງອອກຈາກ 0.01 ຕື້ກີບ ໃນປີ 1986 ບັນລຸ 6.043 ຕື້ກີບ (2017-2025) ເພີ່ມ 604,368 ເທົ່າຜະລິດຕະພັນສິນຄ້າທີ່ໄດ້ຮັບເປັນ ODOP ບັນລຸ 32 ລາຍການ.
ພື້ນຖານໂຄງລ່າງ: ບ້ານທີ່ມີເສັ້ນທາງລົດເຂົ້າເຖິງຈາກ 152 ບ້ານ ບັນລຸ 503 ບ້ານ ຄິດເປັນ 100% ໃນປີ 2025; ໄຟຟ້າຄາດຄະເນຮອດປີ 2026 ຈະບັນລຸ 454 ບ້ານ ຄິດເປັນ 90.26%; ໂທລະຄົມມະນາຄົມພັດທະນາເປັນ 2G ຄຸ້ມ 482 ບ້ານ, 3G/4G/5G ຄຸ້ມ 314 ບ້ານ, ພາກລັດຕິດຕັ້ງລະບົບ E-office ແລະ ກອງປະຊຸມທາງໄກ.
ດ້ານວັດທະນະທຳ-ສັງຄົມການສຶກສາ: ໂຮງຮຽນຊັ້ນປະຖົມຈາກ 349 ແຫ່ງ ພ້ອມໂຮງຮຽນຊັ້ນອຸດົມ 2 ແຫ່ງ (ອຸດົມຜົ້ງສາລີ ແລະ ອຸດົມເມືອງໃໝ່) ໃນປີ 1986 ພັດທະນາມາເປັນ 652 ແຫ່ງ, ໃນປັດຈຸບັນ (ສົກຮຽນ 2023-2024).
ສາທາລະນະສຸກ: ສະຖານທີ່ບໍລິການທັງໝົດ 60 ແຫ່ງ, ຄຸ້ມການບໍລິການຫຼາຍກວ່າ 80% ຂອງບ້ານທົ່ວແຂວງ; ນ້ຳລິນສະອາດຄຸ້ມ 436 ບ້ານ (ເພີ່ມ 418 ບ້ານທຽບປີ 1986); ຮ້ານຂາຍຢາຖືກກົດໝາຍ 54 ຮ້ານ (ຈາກ 0 ຮ້ານໃນປີ 1986); ການນຳໃຊ້ວິດຖ່າຍໃນປີ 1986 ມີພຽງ 18 ບ້ານ (ຄິດເປັນ 3%) ປັດຈຸບັນໄດ້ຮັບການພັດທະນາຢ່າງກ້າວກະໂດດ; ດ້ານການເມືອງ, ປ້ອງກັນຊາດ-ປ້ອງກັນຄວາມສະຫງົບ ແລະ ການພົວພັນຕ່າງປະເທດ
ຜ່ານໄລຍະເກືອບ 40 ປີແຫ່ງການປ່ຽນແປງໃໝ່, ພາຍໃຕ້ການນຳພາຂອງຄະນະບໍລິຫານງານພັກແຂວງແຕ່ລະສະໄໝ ຄັ້ງທີ I-XI, ແຂວງຜົ້ງສາລີ ໄດ້ຮັກສາໄວ້ຊຶ່ງສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ພື້ນຖານໂຄງລ່າງດ້ານເສດຖະກິດ-ສັງຄົມໄດ້ຮັບການປັບປຸງ ແລະ ກໍ່ສ້າງໃໝ່ຢ່າງບໍ່ຢຸດຢັ້ງ, ຖັນແຖວພະນັກງານ-ສະມາຊິກພັກ ໄດ້ຮັບການກໍ່ສ້າງ-ບຳລຸງ ແລະ ເຕີບໃຫຍ່ເຂັ້ມແຂງ; ປະຊາຊົນບັນດາເຜົ່າມີຄວາມສາມັກຄີປອງດອງ ແລະ ເຊື່ອໝັ້ນຕໍ່ການນຳພາຂອງພັກ; ການພົວພັນຮ່ວມມືກັບບັນດາແຂວງໃກ້ຄຽງຂອງປະເທດເພື່ອນມິດຍຸດທະສາດ (ສປ ຈີນ ແລະ ສສ ຫວຽດນາມ) ໄດ້ຮັບການເສີມຂະຫຍາຍໃຫ້ກວ້າງຂວາງ, ແໜ້ນແຟ້ນ ແລະ ບັນລຸຜົນສຳເລັດເປັນກ້າວໆມາ.
ຕໍ່ກັບວຽກງານແກ້ໄຂຄວາມທຸກຍາກ ຖືເປັນວຽກງານໜຶ່ງທີ່ສຳຄັນອັນເປັນຍຸດທະສາດຢ່າງຕໍ່ເນື່ອງຂອງພັກ ແລະ ອຳນາດການປົກຄອງແຂວງຜົ້ງສາລີ ຕະຫຼອດເກືອບ 40 ປີແຫ່ງການປ່ຽນແປງໃໝ່. ໂດຍທີ່ແຂວງຜົ້ງສາລີ ຕັ້ງຢູ່ໃນເຂດພູສູງ ຄິດເປັນ 99% ຂອງເນື້ອທີ່, ຄ້ອຍຊັນ, ພື້ນທີ່ຫ່າງໄກສອກຫຼີກ, ການຕັ້ງພູມລຳເນົາຂອງປະຊາຊົນກະແຈກກະຈາຍ, ອັນເປັນສາເຫດຫຼັກທີ່ເຮັດໃຫ້ອັດຕາຄວາມທຸກຍາກຂອງແຂວງຍັງກວມອັດຕາສ່ວນສູງທຽບໃສ່ບັນດາແຂວງອື່ນໆໃນທົ່ວປະເທດ.ໝາກຜົນທີ່ບັນລຸໄດ້ໃນວຽກງານແກ້ໄຂຄວາມທຸກຍາກຕະຫຼອດໄລຍະຜ່ານມາ, ດ້ວຍຄວາມເອົາໃຈໃສ່ຂອງພັກ-ລັດ, ຄະນະພັກແລະການຈັດຕັ້ງແຕ່ລະຂັ້ນຈາກການປະເມີນຜົນມາດຕະຖານຄວາມທຸກຍາກແລະພົ້ນທຸກ 348/ລບໃຫ້ຮູ້ວ່າ: ທົ່ວແຂວງມີບ້ານພົ້ນທຸກ 244 ບ້ານ, ກວມ 47.38%, ມີຄອບຄົວພົ້ນທຸກ 18,801 ຄອບຄົວ, ກວມ 50.47%, ມີບ້ານພັດທະນາ 31 ບ້ານ, ກວມ 6.11%, ຄອບຄົວພັດທະນາ 8,037 ຄອບຄົວກວມ 21.58%, ສ້າງໄດ້ 7 ຈຸດສຸມບ້ານໃຫຍ່ເປັນຕົວເມືອງໃນຊົນນະບົດບັນລຸຕາມແຜນ, ສ້າງໄດ້ຕົວແບບພັດທະນາຊົນນະບົດໃໝ່ 1 ຈຸດແລະສາມາດສ້າງເມືອງພົ້ນທຸກ 1 ເມືອງ.
ຄໍາເຫັນ