ເຜີຍແຜ່ ດຳລັດວ່າດ້ວຍການຄຸ້ມຄອງໃບເກັບເງິນ

ໃນວັນທີ 2 ພະຈິກນີ້ທີ່ຫ້ອງວ່າການແຂວງວຽງຈັນ, ກົມສ່ວຍສາອາກອນກະຊວງການເງິນ ໄດ້ຈັດກອງປະຊຸມເຜີຍແຜ່ ດຳລັດວ່າດ້ວຍການຄຸ້ມຄອງໃບເກັບເງິນ, ສະບັບເລກທີ 297/ລບ, ລົງວັນທີ 29 ສິງຫາ 2022, ດຳລັດວ່າດ້ວຍເລກປະຈຳຕົວຜູ້ເສຍອາກອນ ສະບັບເລກທີ 213/ລບ, ລົງວັນທີ 2 ມິຖຸນາ 2023 ແລະ ຄຳສັ່ງຂອງລັດຖະມົນຕີກະຊວງການເງິນ ສະບັບເລກທີ 2804/ກງ, ລົງວັນທີ 15 ກັນຍາ 2023 ວ່າດ້ວຍການຫ້າມພິມ, ຈຳໜ່າຍ ແລະ ນຳໃຊ້ໃບເກັບເງິນ ທີ່ບໍ່ໄດ້ຮັບອະນຸຍາດ ຈາກຂະແໜງສ່ວຍສາອາກອນ,ເປັນປະທານໂດຍທ່ານ ດາວເຮືອງ ນັນທະວົງ ຮອງເຈົ້າແຂວງວຽງຈັນ, ທ່ານ ວິເລດ ກິນນາວົງ ຮອງຫົວໜ້າກົມສ່ວຍສາອາກອນກະຊວງການເງິນ, ທ່ານ ວອນ ວໍລະສານ ຫົວໜ້າພະແນກການເງິນແຂວງພ້ອມດ້ວຍຜູ້ຮັບຜິດຊອບວຽກງານການເງິນຂອງພະແນກການ, ລັດວິສາຫະກິດ ແລະ ບໍລິສັດເຂົ້າຮ່ວມ.
      ທ່ານ ດາວເຮືອງ ນັນທະວົງ  ກ່າວວ່າ:  ການເຜີຍແຜ່ເອກະສານຄັ້ງນີ້ ເພື່ອຮັບປະກັນໃນການຊຸກຍູ້, ສົ່ງເສີມການດຳເນີນທຸລະກິດຂອງຜູ້ປະກອບການໃຫ້ຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ ບົນພົ້ນຖານກົດໝາຍ ແລະ ລະບຽບການ, ທັງເປັນການປະຕິບັດພັນທະອາກອນ ໃຫ້ຖືກຕ້ອງ, ຄົບຖ້ວນ ຕາມກົດໝາຍ ແລະ ເພື່ອເຮັດໃຫ້ການຈັດຕັ້ງປະຕິບັດມີຄວາມເປັນເອກະພາບໃນຂອບເຂດທົ່ວປະເທດ, ລັດຖະບານ ຈຶ່ງມອບໃຫ້ກະຊວງການເງິນ, ກົມສ່ວຍສາອາກອນ ຄົ້ນຄວ້າປັບປຸງ ດຳລັດວ່າດ້ວຍການຄຸ້ມຄອງໃບເກັບເງິນ ເພື່ອເປັນເຄື່ອງມືໃນການຄຸ້ມຄອງ, ຕິດຕາມ, ກວດກາ ວຽກງານໃບເກັບເງິນ, ໂດຍອີງຕາມ ມາດຕາ 53 ວັກ 3 ຂອງກົດໝາຍວ່າດ້ວຍການຄຸ້ມຄອງສ່ວຍສາອາກອນ ສະບັບເລກທີ66/ສພຊ,ໄດ້ກຳນົດໃບເກັບເງິນ ມີພຽງ 2 ປະເພດ ຄື: ໃບເກັບເງິນເປັນເຈ້ຍ ແລະ ໃບເກັບເງິນເອເລັກໂຕຣນິກ. ສຳລັບເລກປະຈຳຕົວຜູ້ເສຍອາກອນກໍແມ່ນເລກລະຫັດທີ່ອອກໃຫ້ແກ່ບຸກຄົນ, ນິຕິບຸກຄົນ ແລະ ການຈັດຕັ້ງ ຜູ້ທີ່ມີພັນທະເສຍອາກອນ ຢູ່ໃນດິນແດນ ສປປ ລາວຊຶ່ງເປົ້າໝາຍຜູ້ທີ່ຕ້ອງມີເລກປະຈຳຕົວຜູ້ເສຍອາກອນ ແມ່ນພົນລະເມືອງລາວ, ຄົນຕ່າງດ້າວ, ຄົນບໍ່ມີສັນຊາດ, ຄົນຕ່າງປະເທດ, ນິຕິບຸກຄົນ ແລະ ການຈັດຕັ້ງ ທີີ່ດຳເນີນທຸລະກິດ ຫຼື ເຄື່ອນໄຫວອື່ນໆທີ່ມີລາຍໄດ້ ຊຶ່ງມີພັນທະຕ້ອງເສຍອາກອນ. ພ້ອມນີ້ທ່ານໄດ້ເນັ້ນໃຫ້ຜູ້ເຂົ້າຮ່ວມ ຈົ່ງໄດ້ເອົາໃຈໃສ່ຕິດຕາມ, ຮັບຟັງການເຜີຍແຜ່ ຫາກມີບັນຫາໃດທີ່ບໍ່ທັນຈະແຈ້ງ ຫຼືບໍ່ເຂົ້າໃຈ ກໍໃຫ້ປຶກສາຫາລື, ແລກປ່ຽນຄຳຄິດຄຳເຫັນຢ່າງກົງໄປກົງມາ ເພື່ອໃຫ້ເຂົ້າໃຈຢ່າງເລິກເຊິ່ງ ຮັບປະກັນໃນການຈັດຕັ້ງປະຕິບັດໃຫ້ໄດ້ຮັບໝາກຜົນ. 
(ຂ່າວ-ພາບ:ແກ້ວອຸດົມ)