ເຜີຍແຜ່ເອກະສານ ກະກຽມການເລືອກຕັ້ງ ສສຊ ແລະ ສສຂ

ການເຜີຍແຜ່ຈັດຂຶ້ນໃນວັນທີ 3 ກຸມພານີ້, ເອກະສານທີ່ນຳມາເຜີຍແຜ່ມີ: ເຊື່ອມຊຶມ-ຜັນຂະຫຍາຍມະຕິກົມການເມືອງສູນກາງພັກ ກ່ຽວກັບການເພີ່ມທະວີການນຳພາ-ຊີ້ນຳຂອງອົງຄະນະພັກທຸກຂັ້ນ ຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V; ເພີ່ມທະວີການນຳພາແນວຄິດ, ເສີມຂະຫຍາຍສິດປະຊາທິປະໄຕຂອງປະຊາຊົນລາວບັນດາເຜົ່າເພື່ອເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V; ກຳແໜ້ນເນື້ອໃນສຳຄັນຂອງ ກົດໝາຍວ່າດ້ວຍການເລືອກຕັ້ງ ສສຊ ແລະ ສສຂ ເພື່ອເຮັດໃຫ້ການເລືອກຕັ້ງດຳເນີນຖືກຕ້ອງຕາມກົດໝາຍ ສອດຄ່ອງກັບສະພາບຕົວຈິງຂອງແຕ່ລະທ້ອງຖິ່ນ ແລະ ມີປະສິດທິຜົນ; ເຊື່ອມຊຶມ ແລະ ຈັດຕັ້ງປະຕິບັດແຜນການດຳເນີນງານຂອງຄະນະກຳມະການເລືອກຕັ້ງລະດັບຊາດ ເພື່ອການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ໃຫ້ປະກົດຜົນເປັນຈິງ. ພັດປ່ຽນກັນຂຶ້ນເຜີຍແຜ່ເອກະສານໂດຍທ່ານ ພົຈວ ຫຸມພັນ ຜິວເຂັມພອນ ຄະນະພັກກະຊວງ ຮອງຫົວໜ້າກົມໃຫຍ່ການເມືອງ ປກສ, ທ່ານ ພັອ ວຽງໄຊ ທຳມະສິດ ຄະນະປະຈຳພັກກົມໃຫຍ່ ຮອງຫົວໜ້າກົມໃຫຍ່ການເມືອງ ປກສ.

 ເນື້ອໃນເອກະສານເຊື່ອມຊຶມ-ຜັນຂະຫຍາຍມະຕິກົມການເມືອງສູນກາງພັກ ກ່ຽວກັບການເພີ່ມທະວີການນຳພາ-ຊີ້ນຳຂອງອົງຄະນະພັກທຸກຂັ້ນ ຕໍ່ການເລືອກຕັ້ງ ສສຊ ຊຸດທີ X ແລະ ສສຂ V, ທ່ານ ພົຈວ ຫຸມພັນ ຜິວເຂັມພອນ ໄດ້ຍົກໃຫ້ເຫັນວ່າ: ມະຕິໄດ້ກຳນົດທັດສະນະຊີ້ນໍາຕໍ່ການເລືອກຕັ້ງ ຊຶ່ງເລັ່ງທວງໃຫ້ອົງຄະນະພັກທຸກຂັ້ນຕ້ອງກຳແໜ້ນ ແລະ ປະຕິບັດຢ່າງຖືກຕ້ອງ ໂດຍຖືເອົາການເລືອກຕັ້ງ ສສຊ ແລະ ສສຂ ເທື່ອນີ້ເປັນການສືບຕໍ່ປັບປຸງບູລະນະລັດປະຊາທິປະໄຕ ປະຊາຊົນໃຫ້ມີຄວາມເຂັ້ມແຂງ ແລະ ໜັກແໜ້ນ, ເສີມຂະຫຍາຍສິດປະຊາທິປະໄຕ, ສິດເປັນເຈົ້າທາງດ້ານການເມືອງຂອງປະຊາຊົນລາວບັນດາເຜົ່າເຂົ້າໃນການເລືອກເອົາຕົວແທນແຫ່ງສິດ ແລະ ຜົນປະໂຫຍດຂອງຕົນທີ່ມີມາດຕະຖານ, ເງື່ອນໄຂຄົບຖ້ວນເຂົ້າໃນອົງການອໍານາດແຫ່ງລັດຂັ້ນສູນກາງ ແລະ ທ້ອງຖິ່ນ ເພື່ອເຮັດໃຫ້ອໍານາດລັດຂອງພວກເຮົາ ເປັນອໍານາດຂອງປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ. 

ຂ່າວ: ປກສ