 |
ທ່ານ ຈູມສີ ໄຊຍະວົງ ແລະ ທ່ານ ນາງ ຄໍາໄຕ ວົງໄຊຍາ ໄດ້ຜັດປ່ຽນກັນມີຄໍາເຫັນວ່າ: ການຈັດກອງປະຊຸມໃນຄັ້ງນີ້ແມ່ນເພື່ອຮັບຟັງການເຜີຍແຜ່ກ່ຽວກັບການຈໍາແນກຫຍ້າໃນນາເຂົ້າ ແລະ ການແລກປ່ຽນບົດຮຽນຄວາມເຂົ້າໃຈກ່ຽວກັບການຄຸມຫຍ້າໃນນາເຂົ້າ ດ້ວຍວິທີການປູກຖົ່ວຂຽວຄຸມຫຍ້າໃນນາເຂົ້າ ເຊິ່ງວຽກງານດັ່ງກ່າວແມ່ນເປັນວຽກງານທີ່ມີຄວາມສໍາຄັນໃນການຜະລິດກະສິກໍາ ໂດຍອີງໃສ່ຄວາມເປັນມາຂອງໂຄງການທີ່ສະໜັບສະໜູນໂດຍສະເພາະແມ່ນໂຄງການສຶກສາເຕັກນິກ ການຈໍາແນກຫຍ້າໃນນາເຂົ້າ ໂດຍທີ່ມີການຈັດຕັ້ງປະຕິບັດມາໄດ້ໄລຍະໜຶ່ງແລ້ວ ເພື່ອເຮັດໃຫ້ວຽກງານດັ່ງກ່າວໄດ້ຖືກຜັນຂະຫຍາຍຢ່າງມີປະສິດທິຜົນສູງ ແລະ ປະຢັດຕົ້ນທຶນການຜະລິດ ເຊິ່ງການປູກຖົ່ວຂຽວໃນນາເຂົ້າແມ່ນເພື່ອເປັນການເພີ້ມຜົນຜະລິດ, ປັບປຸງດິນໃນນາ ແລະ ເຮັດໃຫ້ຖົ່ວຂຽວໄດ້ກາຍເປັນປຸ໋ຍຊີວະພາບໃນເວລາຖືກນ້ຳຂັງ.
ສະນັ້ນເມືອງເຊບັ້ງໄຟແມ່ນເປັນເມືອງໜຶ່ງທີ່ໄດ້ຮັບການຊຸກຍູ້ໃນໄລຍະຜ່ານມາ ແລະ ມີຄອບຄົວຕົວແບບທີ່ໄດ້ຮັບການທົດລອງຈາກໂຄງການ CROP ເພື່ອເຮັດແນວໃດໃຫ້ມີການສືບຕໍ່ບົດຮຽນທີ່ໂຄງການສົ່ງເສີມມາແລ້ວໃຫ້ມີຄວາມຕໍ່ເນື່ອງ ແລະ ມີການແລກປ່ຽນບົດຮຽນໃນການຈັດຕັ້ງປະຕິບັດຜ່ານມາ, ການສົ່ງເສີມວຽກງານດັ່ງກ່າວນີ້ໃຫ້ຖືກຕ້ອງຕາມເຕັກນິກ ເຊິ່ງມີບາງບ່ອນກໍໄດ້ຮັບຜົນ ແລະ ບາງບ່ອນກໍບໍ່ໄດ້ຮັບຜົນ, ທັງນີ້ແມ່ນອີງໃສ່ສະພາບ-ເງື່ອນໄຂ, ພື້ນທີ່ໃນການເຜາະປູກທີ່ຮາບພຽງ ແລະ ກໍານົດເວລາໃນການອໍານວຍຄວາມສະດວກຕໍ່ການເອົານໍ້າເຂົ້າ-ອອກນາ, ຖ້າຫາກຈຸດໃດທີ່ບໍ່ມີຄວາມສາມາດເອົານໍ້າເຂົ້າ-ອອກຕາມກໍານົດເວລາ ແລະ ຖືກຕ້ອງຕາມຫຼັກວິຊາການກໍຈະບໍ່ໄດ້ຮັບໝາກຜົນເທົ່າທີ່ຄວນ.
ສະນັ້ນເພື່ອເຮັດແນວໃດໃຫ້ວຽກງານດັ່ງກ່າວໄດ້ມີການສືບຕໍ່ຈັດຕັ້ງປະຕິບັດ ແລະ ເກີດດອກອອກຜົນ ກໍໄດ້ສະເໜີໃຫ້ພະນັກງານທີ່ມາຈາກສູນກາງ, ແຂວງ, ເມືອງເຊບັ້ງໄຟ, ເມືອງທ່າແຂກ ແລະ ມາຈາກຕົວແທນແຕ່ລະບ້ານຈົ່ງໄດ້ມີການຄົ້ນຄວ້າ, ປຶກສາຫາລື ແລະ ແລກປ່ຽນບົດຮຽນເຊິ່ງກັນ ແລະ ກັນ ເພື່ອນໍາເອົາບົດຮຽນໄປນໍາໃຊ້ໃຫ້ເກີດດອກອອກຜົນ, ຖືກຕາມຈຸດປະສົງເປົ້າ ໝາຍ.
 |
ໂຄງການກໍາຈັດຫຍ້າໃນນາເຂົ້າ (ນາຢອດ - ນາຫວ່ານ) ໄດ້ຮັບການຈັດຕັ້ງປະຕິບັດມາແຕ່ປີ 2021 – 2025 ແລະ ເປັນໂຄງການທີ່ຊອກຫາເຕັກນິກ ແລະ ວິທີການກໍາຈັດຫຍ້າ ເຊິ່ງໃນໄລຍະ 5 ປີຜ່ານມາ ແມ່ນສາມາດຊອກໄດ້ບາງເຕັກນິກທີ່ເຮົາຈະເອົາມານໍາໃຊ້ໂດຍສະເພາະແມ່ນການປູກຖົ່ວຂຽວຄຸມຫຍ້າໃນນາເຂົ້າ ເຊິ່ງຜ່ານການທົດລອງກັບນາເຂົ້າຢູ່ທີ່ສູນຄົ້ນຄວ້າເຂົ້າ ແລະ ພືດເສດຖະກິດເຫັນວ່າເປັນເຕັກນິກໜຶ່ງໄດ້ຮັບຜົນດີ. ສ່ວນຢູ່ແຂວງຄໍາມ່ວນແມ່ນໄດ້ທົດລອງຈັດຕັ້ງປະຕິບັດແລ້ວຢູ່ 3 ບ້ານທີ່ຂຶ້ນກັບ 3 ເມືອງຂອງແຂວງຄໍາມ່ວນຄື: ບ້ານໜອງປາຫຼາດ ເມືອງໜອງບົກ, ບ້ານໜອງຫ່າງ ເມືອງທ່າແຂກ ແລະ ປັດຈຸບັນນີ້ແມ່ນຢູ່ບ້ານຕຶງ ເມືອງເຊບັ້ງໄຟ. ພາຍຫຼັງທີ່ໂຄງການນີ້ໄດ້ສິ້ນສຸດລົງໃນປີ 2025 ແລະ ມີການສືບຕໍ່ອີກໄລຍະ 1 ປີ ເຊິ່ງເປັນການຖ່າຍທອດດ້ານເຕັກນິກທີ່ໄດ້ຜ່ານການຄົ້ນຄວ້າທົດລອງ ແລະ ນໍາໃຊ້ຜ່ານມາໃນໄລຍະ 5 ປີ.
ໃນກອງປະຊຸມຄັ້ງນີ້ຮັບໄດ້ຮັບຟັງການແນະນໍາທາງດ້ານເຕັກນິກການຄຸມຫຍ້າເພື່ອຫຼຸດຜ່ອນການນໍາໃຊ້ສານເຄມີໃນນາເຂົ້າ ກໍຄືຢາຂ້າຫຍ້າ ແລະ ຢາປາບສັດຕູພືດແຕ່ລະຊະນິດ, ພ້ອມກັນນັ້ນ ຍັງມີການແລກປ່ຽນບົດຮຽນ, ປະສົບການເຊິ່ງກັນ ແລະ ກັນ, ມີການຕິດຕາມປະເມີນຜົນ. ພ້ອມທັງ ລົງເບິ່ງແປງສາທິດການຈັດການຫຍ້າໃນນາຢອດແຫ້ງ ດ້ວຍເຕັກນິກການປູກຖົ່ວຂຽວຮ່ວມກັບເຂົ້າ ຂອງທ່ານ ຂັນຄໍາ ເຂັມພາວັນ ຊາວນາ ບ້ານຕຶງ ເມືອງເຊບັ້ງໄຟ ແຂວງຄໍາມ່ວນ ເຊິ່ງໄດ້ຢອດເຂົ້າໃນວັນທີ 9 ພຶດສະພາ 2026 ໃນເນື້ອທີ່ແປງສາທິດ 3,200 ຕາແມັດ , ໂດຍນໍາໃຊ້ແນວພັນເຂົ້າຫອມ ເຊບັ້ງໄຟ 4.
ຂ່າວ: ແຂວງຄຳມ່ວນ
ຄໍາເຫັນ