ເຜີຍແຜ່ນິຕິກໍາການຈັດສັນທີ່ດິນ,ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ

ເມືອງຫຼວງນ້ຳທາ ແຂວງຫຼວງນ້ຳທາ ໄດ້ເປີດກອງປະຊຸມເຜີຍແຜ່ນິຕິກຳໃຕ້ກົດໝາຍ, ການຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ, ການຄຸ້ມຄອງນ້ຳ, ຊັບພະຍາກອນນ້ຳ ແລະ ດິນບໍລິເວນນ້ຳ ຂຶ້ນໃນວັນທີ 11 ມັງກອນ ນີ້ໂດຍໃຫ້ກຽດເຂົ້າຮ່ວມຂອງທ່ານ ທອງໄຊ ອາດຜາສຸກ ຮອງເຈົ້າເມືອງຫຼວງນ້ຳທາ,  ມີທ່ານ ສຸກສັນ ພົມປະດິດ ຮອງຫົວໜ້າພະແນກຊັບພະຍາກອນ ແລະ ສິ່ງແວດລ້ອມແຂວງ,  ມີພາກສ່ວນກ່ຽວຂ້ອງເຂົ້າຮ່ວມ.
     ກອງປະຊຸມ ໄດ້ຜ່ານຂໍ້ຕົກລົງ ສະບັບເລກທີ 424/ຈຂ,  ລົງວັນທີ 28 ກໍລະກົດ 2021 ວ່າດ້ວຍການແບ່ງຄວາມຮັບຮັບຜິດຊອບໃນການຈັດຕັ້ງປະຕິບັດແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມແບບຮອບດ້ານຂອງແຂວງຫຼວງນ້ຳທາ ປະກອບມີ 6 ມາດຕາ, ຂໍ້ຕົກລົງລົງສະບັບນີ້ກຳນົດການແບ່ງຄວາມຮັບຜິດຊອບຂອງບັນດາພະແນກການທີ່ກ່ຽວຂ້ອງ ແລະ ອົງການປົກຄອງຂັ້ນເມືອງ ແລະ ບ້ານໃນການຜັນຂະຫຍາຍຈັດຕັ້ງປະຕິບັດແຜນຈັດສັນທີ່ດິນ ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມຮອບດ້ານເພື່ອວາງແຜນການນຳໃຊ້ທີ່ດິນ ທີ່ຢູ່ໃນການຄຸ້ມຄອງການນຳໃຊ້ທີ່ດິນຂອງບັນດາຂະແໜງການໃຫ້ບັນລຸເປົ້າໝາຍ ຕາມໂຕເລກຄາດໝາຍຂອງເນື້ອທີ່ດິນທີ່ຈະສະຫງວນ ແລະ ອະນຸລັກໄວ້ ເພື່ອເປັນທີ່ດິນປ່າໄມ້ປົກຫຸ້ມ 70% ເນື້ອທີ່ດິນຈະນຳໃຊ້ພັດທະນາ 30% ການກຳນົດເຂດປະເມີນຄວາມສ່ຽງຈາກການປ່ຽນແປງດິນຟ້າອາກາດຕາມທີ່ໄດ້ກຳນົດໄວ້ໃນແຜນຈັດສັນທີ່ດິນ, ຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມແບບຮອບດ້ານຂອງແຂວງ ແລະ ຜ່ານຂໍ້ຕົກລົງ ສະບັບເລກທີ 554/ຈຂ,  ລົງວັນທີ 23 ກັນຍາ 2022 ວ່າດ້ວຍການຄຸ້ມຄອງນໍ້າ, ຊັບພະຍາກອນແຫຼ່ງນໍ້າ ແລະ ດິນບໍລິເວນນ້ຳ, ປະກອບມີ 6 ໝວດ  26 ມາດຕາ ແລະ ຂໍ້ຕົກລົງ ສະບັບເລກທີ 3806/ກຊສ, ລົງວັນທີ 29 ທັນວາ 2023 ວ່າດ້ວຍການຫັນປ່ຽນປະເພດທີ່ດິນປະກອບມີ 6 ໝວດ ແລະ ມີ 20 ມາດຕາ.
ຂ່າວ-ພາບ: ຖວທ ເມືອງຫຼວງນໍ້າທາ