ໃນວັນທີ 25 ກັນຍາ ຜ່ານມາ ທີ່ຫ້ອງວ່າການແຂວງວຽງຈັນ ໄດ້ຈັດກອງປະຊຸມເຜີຍແຜ່ທຳມະນູນສົງລາວສະບັບປັບປຸງ ໃຫ້ແກ່ຄະນະ ອພສ ແຂວງວຽງຈັນ ແລະ ພາກສ່ວນທີ່ກ່ຽວຂ້ອງ ໂດຍການເປັນປະທານຂອງພະອາຈານໃຫຍ່ມະຫາເວດ ມະເສໄນ ຮອງປະທານສູນກາງອົງການພຸດທະສາສະນາສຳພັນແຫ່ງ ສປປ ລາວ ຜູ້ຊີ້ນຳວຽກງານກຳມາທິການເຜີຍແຜ່ສິລະທຳ ແລະ ປະຕິບັດກຳມະຖານ ແລະ ກຳມາທິການສາທາລະນຸປະການສູນກາງ ອພສ, ມີທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ພະອາຈານໃຫຍ່ ຕຸງ ຈັນທະວົງ ກຳມະການສູນກາງ ອພສ ຮັກສາການປະທານ ອພສ ແຂວງ, ມີຄະນະສົງພາຍໃນ 11 ຕົວເມືອງ, ການນຳຂັ້ນແຂວງ-ເມືອງເຂົ້າຮ່ວມ.
ພະອາຈານ ໄພວັນ ມາລາວົງ ກຳມະການສູນກາງ ອພສ ຄະນະກຳມາທິການສາທາລະນຸປະການສູນກາງ ອພສ ໄດ້ໃຫ້ກຽດເຜີຍແຜ່ທຳມະນູນສົງລາວ ສະບັບປັບປຸງ ຊຶ່ງປະກອບມີ 13 ໝວດ, 74 ມາດຕາ, ທຳມະນູນ ສະບັບນີ້ໄດ້ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງ ແລະ ການເຄື່ອນໄຫວຂອງ ພະສົງລາວ ເພື່ອຮັບປະກັນໃຫ້ການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິຜົນສູງ ແນໃສ່ເຕົ້າໂຮມຄວາມສາມັກຄີຂອງບັນພະຊິດ, ພຸດທະສາສະນິກະຊົນ ແລະ ປະຊາຊົນລາວບັນດາເຜົ່າ ທັງພາຍໃນ ແລະ ຕ່າງປະເທດ ໂດຍຢຶດຖືເອົາຫຼັກພະທຳມະວິໄນ, ລັດຖະທໍາມະນູນ, ກົດໝາຍ, ລະບຽບການ ແລະ ຮີດຄອງປະເພນີຜັນຂະຫຍາຍເຂົ້າໃນທຸກຂົງເຂດວຽກງານ, ການດຳລົງຊີວິດປະຈໍາວັນ ແລະ ຮັບປະກັນຄວາມເປັນເອກະພາບ ໃນການຈັດຕັ້ງປະຕິບັດໃຫ້ເໝາະສົມກັບກາລະໂອກາດ ແລະ ຄວາມເປັນຈິງຢູ່ ສປປ ລາວ.
ທ່ານ ຄຳພັນ ສິດທິດຳພາ ກ່າວວ່າ: ການເຜີຍແຜ່ຄັ້ງນີ້ ຈະເປັນການປັບປຸງກິດຈະວັດການເຄື່ອນໄຫວ ແລະ ຄວາມສາມັກຄີຂອງອົງການພຸດທະສາສະໜາສຳພັນລາວໃຫ້ມີຄວາໜັກແໜ້ນ, ເຂັ້ມແຂງ ໃນນາມຕາງໜ້າຄະນະນຳ, ພວກເຮົາພ້ອມແລ້ວທີ່ຈະໃຫ້ການຮ່ວມມື, ສະໜັບສະໜູນ ອູ້ມຊູພຸດທະສາສະໜາຂອງພວກເຮົາໃຫ້ໝັ້ນຄົງ, ຍືນຍົງຢູ່ຄູ່ກັບແຜ່ນດິນລາວ ຄົນລາວຕະຫຼອດໄປ.
ຂ່າວ: ອພສ ແຂວງວຽງຈັນ
ຄໍາເຫັນ