ເຜີຍແຜ່ວຽກງານຄຸ້ມຄອງການເກັບລາຍຮັບພາສີທີ່ດິນ

ເພື່ອໃຫ້ການຈັດຕັ້ງປະຕິບັດຜັນຂະຫຍາຍ ລະບົບຄຸ້ມຄອງການເກັບລາຍຮັບຄ່າພາສີທີ່ດິນແບບເອເລັກໂຕຣນິກ ແລະ ການຊຳລະຜ່ານລະບົບ TaxRIS (ລະບົບຄຸ້ມຄອງລາຍຮັບຈາກພາສີອາກອນ) ເຊື່ອມຕໍ່ລະບົບຄັງເງິນແຫ່ງຊາດ ທີ່ກະຊວງການເງິນໄດ້ສຳເລັດການພັດທະນາ ແລະ ກຳລັງນຳໃຊ້ໃຫ້ມີຄວາມເປັນເອກະພາບ ແລະ ບັນລຸຕາມແຜນຈັດເກັບລາຍຮັບເຂົ້າງົບປະມານໃຫ້ສຳເລັດຜົນໃນຂອບເຂດທົ່ວປະເທດ. ໃນວັນທີ1 ພະຈິກນີ້  ໄດ້ຈັດກອງປະຊຸມເຜີຍແຜ່ເອກະສານດັ່ງກ່າວຂຶ້ນ ທີ່ຫ້ອງປະຊຸມ ພະແນກການເງິນ ໂດຍການເປັນປະທານຂອງ ທ່ານ ສຸລິຍາ ສຸພິທັກ ຫົວໜ້າພະແນກການເງິນແຂວງອຸດົມໄຊມີສ່ວຍສາອາກອນແຂວງ, ຫົວໜ້າຫ້ອງການການເງິນເມືອງ 7 ເມືອງ ແລະ ພະນັກງານທີ່ກ່ຽວຂ້ອງ ເຂົ້າຮ່ວມຮັບຟັງ.
ກອງປະຊຸມໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບຂັ້ນແຂວງ ເພື່ອເປັນເຈົ້າການໃນການຜັນຂະຫຍາຍການນຳໃຊ້ລະບົບຄຸ້ມຄອງການເກັບລາຍຮັບພາສີທີ່ດິນແບບເອເລັກໂຕຣນິກ ແລະ ການຊຳລະຜ່ານລະບົບແທັກລິສ ເຊື່ອມຕໍ່ກັບລະບົບຄັງເງິນແຫ່ງຊາດ ໃນການຈັດຕັ້ງປະຕິບັດວຽກງານຄຸ້ມຄອງລາຍຮັບທີ່ດິນ ປະຈຳປີ 2023, ເຜີຍແຜ່ບັນດານິຕິກຳຕ່າງໆ ເຊັ່ນ: ກົດໝາຍວ່າດ້ວຍທີ່ດິນ, ແຈ້ງການຂອງກະຊວງການເງິນ, ຄຳແນະນຳຂອງກົມສ່ວຍສາອາກອນ, ການບັນທຶກຂໍ້ມູນຕອນດິນເຂົ້າໃນສຳມະໂນທີ່ດິນ, ຂໍ້ມູນເຂົ້າຮ່າງເອັກເຊວ, ບັນທຶກເຂົ້າລະບົບແທັກລິສ ແລະ ໃບເກັບເງິນຄ່າພາສີທີ່ດິນ, ເຜີຍແຜ່ ວຽກງານການເສຍຄ່າທຳນຽມທາງປີ 2023 ແລະ ເອກະສານສຳຄັນຕ່າງໆອີກຈຳນວນໜຶ່ງ ກອງປະຊຸມຍັງໄດ້ເປີດກ້ວາງໃຫ້ຜູ້ເຂົ້າຮ່ວມໄດ້ປະກອບຄວາມຄິດເຫັນເຂົ້າໃນເອກະສານຕ່າງໆຕື່ມອີກ.
ຂ່າວ-ພາບ:ແສງອາທິດ