ເຜີຍແຜ່ວຽກງານສະກັດກັ້ນ, ກວດກາ, ສືບສວນ-ສອບສວນ ການສໍ້ລາດບັງຫຼວງ,

ທ່ານ ພູທະນູເພັດ ໄຊສົມບັດ ກ່າວວ່າ: ກອງປະຊຸມຄັ້ງນີ້, ເພື່ອເປັນການສໍາມະນາ ແລກປ່ຽນບົດຮຽນ ກ່ຽວກັບວຽກງານການສະກັດກັ້ນ, ກວດກາ ແລະ ສືບສວນ-ສອບສວນ ການສໍ້ລາດບັງຫຼວງ ແລະ ການຟອກເງິນ ເນື່ອງໃນໂອກາດວັນສ້າງຕັ້ງອົງການກວດກາພັກ-ລັດ ຄົບຮອບ 43 ປີ, ວັນສ້າງສົນທິສັນຍາສະຫະປະຊາຊາດ ວ່າດ້ວຍການຕ້ານການສໍ້ລາດບັງຫຼວງ ຄົບຮອບ 21 ປີ ແລະ ວັນ ສປປ ລາວ ເຂົ້າເປັນສະມາຊິກອົງການຕ້ານການສໍ້ລາດບັງຫຼວງ ໃນຂົງເຂດອາຊີຕາເວັນອອກສ່ຽງໃຕ້ ຄົບຮອບ 15 ປີ, ເປັນການສະແດງໃຫ້ເຫັນເຖິງຄວາມມຸງໝັ້ນຂອງ ສສປ ລາວ ໃນການເອົາໃຈໃສ່ຢ່າງຈິງຈັງຕໍ່ການຈັດຕັ້ງປະຕິບັດສົນທິສັນຍາສະຫະປະຊາຊາດ ວ່າດ້ວຍຕ້ານການສໍ້ລາດບັງຫຼວງ ໃນຖານະທີ່ເປັນລັດພາຄີ, ທັງໝົດນີ້ກໍເພື່ອເຮັດໃຫ້ສັງຄົມຂອງພວກເຮົາປາສະຈາກການສໍ້ລາດບັງຫຼວງ, ເຮັດໃຫ້ປະເທດຊາດມີການພັດທະນາ, ສັງຄົມມີຄວາມສີວິໄລ, ຍຸຕິທຳ ແລະ ໂປ່ງໃສ. ທ່ານກ່າວອີກວ່າ: ການສໍ້ລາດບັງຫຼວງ ເປັນໄພອັນຕະລາຍທີ່ຮ້າຍແຮງ ແລະ ມີລະດັບກວ້າງໃນການສ້າງຜົນກະທົບຕໍ່ສັງຄົມ, ຕໍ່ການພັດທະນາເສດຖະກິດ-ສັງຄົມ, ກະທົບເຖິງຄວາມເຊື່ອໝັ້ນຂອງປະຊາຊົນຕໍ່ການນຳພາ-ຊີ້ນຳ ຂອງພັກ ແລະ ການບໍລິຫານ, ຄຸ້ມຄອງລັດ, ທໍາລາຍລະບອບປະຊາທິປະໄຕ ແລະ ຫຼັກນິຕິທໍາ ນໍາໄປສູ່ການລະເມີດສິດທິມະນຸດ, ບິດເບືອນຕະຫຼາດ ເຮັດໃຫ້ຄຸນະພາບຊິດວິດຂອງພວກເຮົາຫຼຸດໜ້ອຍຖອຍລົງ ແລະ ກໍໃຫ້ເກີດມີອາດຊະຍາກໍາຕ່າງໆ.

ທ່ານ ເທບພະໄທ ພັນກ້າ ຮັກສາການຫົວໜ້າກົມຕ້ານ ແລະ ສອບສວນການສໍ້ລາດບັງຫຼວງ ອົງການກວດກາແຫ່ງລັດ ໄດ້ຂຶ້ນເຜີຍແຜ່ກ່ຽວກັບວຽກງານການສະກັດກັ້ນ, ກວດກາ ແລະ ສືບສວນ-ສອບສວນ ການສໍ້ລາດບັງຫຼວງ ແລະ ການຟອກເງິນ; ການຊີ້ນຳ-ນຳພາ ວຽກງານກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ແລະ ຄະນະຮັບຜິດຊອບຍັງໄດ້ຂຶ້ນອະທິບາຍການແຈ້ງຊັບສິນຂອງພະນັກງານ ເພື່ອເຮັດໃຫ້ຜູ້ເຂົ້າຮ່ວມເຂົ້າໃຈ ແລະ ນຳໄປຈັດຕັ້ງປະຕິບັດຖືກຕ້ອງ. ພ້ອມນີ້ ບັນດາຜູ້ເຂົ້າຮ່ວມ ໄດ້ປະກອບຄຳເຫັນ, ແລກປ່ຽນບົດຮຽນ ກັບຄະນະຮັບຜິດຊອບ ຢ່າງສ້າງສັນ ແລະ ມີວິທະຍາສາດ.

(ແຫຼ່ງຂ່າວ: ແຂວງວຽງຈັນ)