 |
ໂດຍປະຕິບັດຕາມແຈ້ງການຂອງຄະນະຈັດຕັ້ງສູນກາງພັກ, ວ່າດ້ວຍການກະກຽມປັບປຸງຫຼັກສູດ ທິດສະດີການເມືອງ 3 ຂັ້ນ, ສະບັບເລກທີ 456/ຄຈສພ, ລົງວັນທີ 13 ມີນາ 2026, ສະພາທິດສະດີສູນກາງພັກ ໄດ້ເປີດກອງປະຊຸມ ເພື່ອຄົ້ນຄວ້າພິຈາລະນາ-ຮັບຮອງຫຼັກສູດທິດສະດີການເມືອງ 3 ຂັ້ນ, (ສະບັບປັບປຸງໃໝ່ນີ້) ລວມມີການປັບປຸງຫຼັກສູດທິດສະດີການເມືອງ 3 ຂັ້ນ: ຂັ້ນຕົ້ນ (3 ເດືອນ), ຂັ້ນກາງ (6 ເດືອນ) ແລະ ຂັ້ນສູງ (9 ເດືອນ) ແມ່ນເພື່ອສ້າງຄວາມຮັບຮູ້ເຂົ້າໃຈຢ່າງເປັນເອກະພາບກ່ຽວກັບທິດສະດີການເມືອງຢ່າງຖືກຕ້ອງໃຫ້ສະມາຊິກພັກເວົ້າລວມ, ເວົ້າສະເພາະແມ່ນສະມາຊິກພັກທີ່ເປັນພະນັກງານນໍາພາ-ຄຸ້ມຄອງ, ນາຍທະຫານ ແລະ ຕໍາຫຼວດ ໃຫ້ມີຄວາມເຊື່ອໝັ້ນຕໍ່ອຸດົມການຂອງພັກ, ມີທັດສະນະຫຼັກໝັ້ນການເມືອງໜັກແໜ້ນ, ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ກໍຄື ປົກປັກຮັກສາ ແລະ ສ້າງສາພັດທະນາປະເທດຊາດກ້າວໜ້າຢ່າງບໍ່ຢຸດຢັ້ງ; ເພື່ອເຮັດໃຫ້ທິດສະດີການເມືອງ, ທິດສະດີມາກ-ເລນິນโ ແນວຄິດ ໄກສອນ ພົມວິຫານ, ມູນເຊື້ອ ແລະ ປະຫວັດສາດຂອງພັກ, ຂອງຊາດ, ກາຍເປັນພື້ນຖານແນວຄິດ ແລະ ການກະທໍາຂອງພະນັກງານ-ສະມາຊິກພັກ, ນາຍທະຫານ ແລະ ນາຍຕໍາຫຼວດໃນທົ່ວພັກ, ທົ່ວລັດ ແລະ ທົ່ວປວງຊົນທັງຊາດ, ເຮັດໃຫ້ພະນັກງານ-ສະມາຊິກພັກ ມີຄວາມຮູ້, ເຂົ້າໃຈ ມີຄວາມເຊື່ອໝັ້ນ, ສະໜັບສະໜູນ ແລະ ປະຕິບັດແນວທາງນະໂຍບາຍ ຂອງພັກ ແລະ ລັດ, ຍົກລະດັບຄວາມຮູ້ກ່ຽວກັບແນວທາງຂອງພັກ, ນະໂຍບາຍຂອງລັດຢ່າງເລິກເຊິ່ງ, ມີຫຼັກໝັ້ນຢ່າງໜັກແໜ້ນ, ມີຄຸນສົມບັດສິນທໍາປະຕິວັດ, ມີຈິດໃຈຮັກຊາດ, ຮັບໃຊ້ປະຊາຊົນຢ່າງຈິງໃຈ.
ໃນໂອກາດນີ້, ສະຫາຍປະທານກອງປະຊຸມໄດ້ເນັ້ນໜັກການປັບປຸງຫຼັກສູດໃນເທື່ອນີ້ຈຸດຫຼັກແມ່ນ ເພື່ອຍົກລະດັບຄວາມຮູ້, ຄວາມສາມາດໃນຖັນແຖວພະນັກງານສະມາຊິກພັກ, ນາຍທະຫານ ແລະ ນາຍຕໍາຫຼວດ ກຳແໜ້ນບັນດາຫຼັກມູນທິດສະດີ ມາກ-ເລນິນ, ເປັນຕົ້ນຫຼັກມູນທິດສະດີປັດຊະຍາ, ເສດຖະສາດການເມືອງ, ລັດທິສັງຄົມນິຍົມວິທະຍາສາດ; ແນວຄິດ ໄກສອນ ພົມວິຫານ, ມູນເຊື້ອ ແລະ ປະຫວັດສາດຂອງພັກ, ຂອງຊາດ, ກົດລະບຽບພັກ, ແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ຂອງພັກ ແລະ ນິຕິກໍາຕ່າງໆຂອງພັກ, ລັດຖະທໍາມະນູນ, ກົດໝາຍ ແລະ ນິຕິກຳຂອງລັດໃນແຕ່ລະໄລຍະ; ກໍາແໜ້ນຢ່າງເລິກເຊິ່ງວຽກງານກໍ່ສ້າງພັກ ແລະ ວຽກງານຂົນຂວາຍກໍ່ສ້າງຮາກຖານການເມືອງ. ພ້ອມນັ້ນ, ກໍເປັນມູນເຊື້ອ ແລະ ກຳແໜ້ນເນື້ອໃນຈິດໃຈຂອງແນວທາງນະໂຍບາຍຂອງພັກ ແລະ ລັດໃນແຕ່ລະໄລຍະ.
ກອງປະຊຸມພິຈາລະນາ-ຮັບຮອງເນື້ອໃນບົດວິພາກຫຼັກສູດທິດສະດີການເມືອງ 3 ຂັ້ນ (ສະບັບປັບປຸງ) 2026, ໃນຄັ້ງນີ້ໃຊ້ເວລາ 1 ຕອນ ແລະ ສໍາເລັດດ້ວຍບັນຍາກາດທີ່ຟົດຟື້ນ ແລະ ມີຄວາມຮັບຜິດຊອບສູງ.
(ຂ່າວ-ພາບ: ສຳນານ)
ຄໍາເຫັນ