ພ້ອມກັນສືບທອດມູນເຊື້ອອັນດີງາມຂອງແນວລາວສ້າງຊາດ

ໃນໂອກາດເຂົ້າຮ່ວມພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ (13 ສິງຫາ 1950-13 ສິງຫາ 2025), ທ່ານ ຄໍາໄພ ສົມຊະນະ ປະທານກຸ່ມບໍລິສັດຄໍາໄພຊະນະ ຈໍາກັດຜູ້ດຽວ ໄດ້ໃຫ້ສໍາພາດຕໍ່ສື່ມວນຊົນໃນວັນທີ 13 ສິງຫານີ້ ທີ່ຫໍປະຊຸມແຫ່ງຊາດວ່າ: ຕົນເອງມີຄວາມຮູ້ສຶກດີໃຈ ແລະ ພາກ ພູມໃຈທີ່ສຸດ ທີ່ໄດ້ເຂົ້າຮ່ວມໃນງານຄັ້ງນີ້ ຊຶ່ງເຫັນໄດ້ວ່າມີຫຼາຍພາກສ່ວນກໍໄດ້ຖືໂອກາດນີ້ເຂົ້າມາຮ່ວມເຊັ່ນກັນ ໂດຍມີການນໍາພັກ-ລັດຂັ້ນສູງ, ອະດີດການນໍາພັກ-ລັດຂັ້ນສູງ ຕະຫຼອດຮອດປະຊາຊົນບັນດາເຜົ່າໃນຂອບເຂດທົ່ວປະເທດເຂົ້າຮ່ວມຢ່າງຟົດຟື້ນ, ໄດ້ຮັບຟັງການເລົ່າມູນເຊື້ອການເຕີບໃຫຍ່ຂະຫຍາຍຕົວ, ປະຫວັດຄວາມເປັນມາ ຈາກປະທານສູນກາງແນວລາວສ້າງຊາດ ຊຶ່ງເຫັນໄດ້ວ່າແນວລາວສ້າງຊາດເປັນອົງກອນໜຶ່ງທີ່ມີຄວາມສໍາຄັນທີ່ສຸດຂອງອົງກອນປົກຄອງ ກໍຄື ສປປ ລາວ ເຮົາ ມີມື້ນັ້ນ ຈຶ່ງມີມື້ນີ້. ສະນັ້ນ, ການນໍາແຕ່ລະຮຸ່ນ ແຕ່ລະສະໄໝ ຕ້ອງໄດ້ປະຕິບັດສືບທອດຕໍ່ກັນໄປ. ໃນເມື່ອກ່ອນການຊີ້ນໍາ-ນໍາພາຍັງບໍ່ທັນເຂັ້ມແຂງ. ດັ່ງນັ້ນ, ມາແຕ່ລະຮຸ່ນ ແຕ່ລະສະໄໝ ຈຶ່ງມີການປົກຄອງເຂັ້ມແຂງຂຶ້ນຕາມລໍາດັບ ໄດ້ນໍາເອົາການສຶກສາອົບຮົມແນວຄິດ, ຄວາມສາມັກຄີເປັນຫຼັກເລີ່ມຕົ້ນຈາກຄອບຄົວຂຶ້ນໄປ. ສະນັ້ນ, ຖ້າປະຊາຊົນບັນດາເຜົ່າທຸກຊັ້ນຄົນ ພ້ອມພຽງຮຽງໜ້າກັນມີຄວາມສາມັກຄີປອງດອງເປັນຈິດໜຶ່ງໃຈດຽວກັນ ເຮັດວຽກງານອັນໃດກໍຕາມ ຫຼື ການພັດທະນາປະເທດຊາດ ກໍຈະມີຜົນສໍາເລັດ. ກົງກັນຂ້າມຖ້າທຸກຄົນ ກໍຄືປະຊາຊົນບັນດາເຜົ່າທຸກຊັ້ນຄົນ ບໍ່ພ້ອມພຽງສາມັກຄີກັນ ແລະ ອື່ນໆ ກໍຈະປະຕິບັດວຽກງານອັນໃດບໍ່ສໍາເລັດ. ແນວໃດກໍຕາມຮຽກຮ້ອງໃຫ້ຄົນຮຸ່ນໜຸ່ມ, ລູກ-ຫຼານ, ຮຸ່ນສືບທອດພາລະກິດແນວລາວສ້າງຊາດຕ້ອງຢຶດໝັ້ນຕໍ່ຄໍາເວົ້າທີ່ວ່າ: ມີມື້ນັ້ນ ຈຶ່ງມີມື້ນີ້. ທ່ານ ຄໍາໄພ ສົມຊະນະ ກ່າວຢືນຢັນວ່າ: ຈະສືບຕໍ່ຊີ້ນໍາ-ນໍາພາອົງກອນລູກ-ຫຼານທີ່ຢູ່ໃນກຸ່ມບໍລິສັດຂອງຕົນຮັກສາມູນເຊື້ອອັນດີງາມຂອງແນວລາວສ້າງຊາດ. ໃນໄລຍະຜ່ານມາ, ກຸ່ມບໍລິສັດຄໍາໄພຊະນະ ຈໍາກັດຜູ້ດຽວ ຍັງໄດ້ລົງເຄື່ອນໄຫວທ້ອງຖິ່ນຕ່າງໆ ເພື່ອໄປຊ່ວຍເຫຼືອປະຊາຊົນທີ່ທຸກຍາກ, ຢູ່ຫ່າງໄກສອກຫຼີກ ແລະ ອື່ນໆ ຕາມຄວາມສາມາດ ແລະ ຈະສືບຕໍ່ໃຫ້ການຊ່ວຍເຫຼືອຕໍ່ໆໄປ.

ໃນໂອກາດວັນສ້າງຕັ້ງແນວລາວຊາດ ຄົບຮອບ 75 ປີ ຂໍອວຍພອນໄຊອັນປະເສີດໃຫ້ການນໍາພັກ-ລັດ ມີສຸຂະພາບແຂງແຮງ, ສືບຕໍ່ຊີ້ນໍາ-ນໍາພາປະເທດຊາດກ້າວຂຶ້ນສູ່ຄວາມສີວິໄລຢ່າງບໍ່ຢຸດຢັ້ງ ແລະ ຂໍອວຍພອນໄຊໃຫ້ປະຊາຊົນບັນດາເຜົ່າທີ່ອາໄສຢູ່ພາຍໃນປະເທດ ແລະ ຕ່າງປະເທດ, ທະຫານ-ຕໍາຫຼວດທຸກທົ່ວໜ້າ ຈົ່ງມີຄວາມສຸກໃນຊີວິດສ່ວນຕົວ ແລະ ຄອບຄົວ, ມີຄວາມສາມັກຄີເປັນຈິດໜຶ່ງໃຈດຽວກັນ ແລະ ຈົ່ງພ້ອມກັນສືບຕໍ່ຮັກສາມູນເຊື້ອອັນດີງາມຂອງແນວລາວສ້າງຊາດຕະຫຼອດໄປ.