ທ່ານ ທະນູຄຳ ປິດຈະວົງ ຫົວໜ້າພະແນກອຸດສາຫະກຳ ແລະ ການຄ້າແຂວງຜົ້ງສາລີ ກ່າວວ່າ: ໃນປີ 2022 ພະແນກອຸດສາຫະກຳ ແລະ ການຄ້າແຂວງຜົ້ງສາລີ ໄດ້ຮັບທຶນ ຈາກກອງທຶນພີເສດແມ່ນໍ້າຂອງ-ແມ່ນໍ້າລ້ານຊ້າງ “ໂຄງການເສີມຂະຫຍາຍ ແລະ ສົ່ງເສີມຜະລິດຕະພັນທີ່ມີທ່າແຮງ ເພື່ອຜົນປະໂຫຍດ ຂອງບັນດາປະເທດລຸ່ມແມ່ນໍ້າຂອງ (ELMC)” ມູນຄ່າ 298,500 ໂດລາ ປະກອບມີ 8 ກິດຈະກໍາ; ຊຶ່ງໃນນັ້ນ ກິດຈະກໍາກໍ່ສ້າງສູນວາງສະແດງສິນຄ້າຂອງແຂວງຜົ້ງສາລີ ແມ່ນເປັນທຶນສົມທົບຂອງໂຄງການ (ELMC) ແລະ ງົບປະມານຂອງແຂວງ. ຈຸດປະສົງ ເພື່ອສ້າງຕັ້ງເປັນສູນບໍລິການຂໍ້ມູນຂ່າວສານ, ໂຄສະນາ, ປະຊາສໍາພັນຜະລິດຕະພັນສິນຄ້າຂອງແຂວງ ອອກສູ່ສັງຄົມ; ເປັນສະຖານທີ່ອຳນວຍຄວາມສະດວກ ໃຫ້ແກ່ຫົວໜ່ວຍທຸລະກິດນໍາເອົາສິນຄ້າ ແລະ ຜະລິດຕະພັນ ມາວາງສະແດງ ແລະ ຂາຍຢູ່ສູນດັ່ງກ່າວ; ເພື່ອເປັນສະຖານທີ່ຈັດກອງປະຊຸມສໍາມະນາ ແລກປ່ຽນບົດຮຽນທາງດ້ານການຕະຫຼາດ ລົງສູ່ການຜະລິດຢ່າງເປັນລະບົບ; ເພື່ອເປັນສະຖານທີ່ທ່ອງທ່ຽວ, ຢ້ຽມຊົມ ຊື້-ຂາຍ ສິນຄ້າ ຂອງພາຍໃນ ແລະ ຕ່າງປະເທດ.
ສຳລັບການກໍ່ສ້າງສູນດັ່ງກ່າວ ໄດ້ເລີ່ມມາແຕ່ເດືອນ ກັນຍາ 2023 ໂດຍແມ່ນບໍລິສັດ SKC ກໍ່ສ້າງ, ສ້ອມແປງເຄຫະສະຖານ, ຂົວ-ທາງ ແລະ ຊົນລະປະທານຈໍາກັດຜູ້ດຽວ ເປັນຜູ້ຮັບເໜົາກໍ່ສ້າງ ແລະ ມາຮອດປັດຈຸບັນແມ່ນສໍາເລັດ 100% ລວມມູນຄ່າການກໍ່ສ້າງທັງໝົດ 4,7 ຕື້ກ່ວາກີບ. ຈາກນັ້ນ, ກໍໄດ້ມອບປ້າຍກາໝາຍສິນຄ້າໂອດ໋ອບໜຶ່ງເມືອງໜຶ່ງຜະລິດຕະພັນແຫ່ງຊາດ ໃຫ້ວິສາຫະກິດສ່ວນບຸກຄົນ ເຫຼົ້າແດງພື້ນເມືອງເຊີລິນວົງ ບໍລິການຜະລິດເຫຼົ້າແດງຈາກຜະລິດຕະພັນໝາກກ້ວຍ.
(ພາບ-ຂ່າວ: ແສງຄຳ ສາລີວັນ)
ຄໍາເຫັນ