ເນື່ອງໃນໂອກາດສະເຫຼີມສະຫຼອງວັນສ້າງຕັ້ງວັນສື່ມວນຊົນ ແລະ ການພິມຈໍາໜ່າຍ ຄົບຮອບ 75 ປີ (13 ສິງຫາ 1950 – 13 ສິງຫາ 2025) ທີ່ຫໍວັດທະນະທໍາແຫ່ງຊາດ, ທ່ານ ນາງ ອາດີນາ ມະຫາວົງ ປະທານໂທລະພາບ ເອັມວີລາວ ຊ່ອງ 5 (MV LAO channel 5) ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ວ່າ: ໃນອະດີດ, ບົດບາດແມ່ຍິງລາວ ແມ່ນຜູ້ທີ່ໄດ້ເຄື່ອນໄຫວໃນວຽກງານສື່ມວນຊົນເປັນຕົ້ນແມ່ນເລີ່ມສົ່ງຂ່າວ, ໂພຊະນາການ, ຂໍ້ມູນຂ່າວສານສົ່ງໃຫ້ແນວໜ້າ ແລະ ແນວຫຼັງ, ຕອນປົດປ່ອຍໃໝ່ໆ ພາລະບົດບາດແມ່ຍິງໃນວຽກງານຂ່າວມີໜ້ອຍ, ມາຮອດຍຸກໃໝ່ ແມ່ຍິງໃນວຽກງານສື່ນັບມື້ເພີ່ມຂຶ້ນ. ແຕ່ເຖິງຢ່າງໃດກໍຕາມ, ຜູ້ເຮັດອາຊີບສື່ມວນຊົນ ກໍລ້ວນແຕ່ຍ້ອນມີຄວາມມັກຮັກໃນອາຊີບ ໂດຍສະເພາະແມ່ຍິງທີ່ເຮັດອາຊີບສື່ມວນຊົນໃນພາກເອກະຊົນ ແມ່ນມີຄວາມສູ້ຊົນສູງສົມຄວນ ຊຶ່ງໃນການເຄື່ອນໄຫວວຽກງານ ແມ່ຍິງກໍຄືຜູ້ຊາຍ ແມ່ນກຽມຄວາມພ້ອມ ແລະ ແບກຫາບອຸປະກອນ ເຊັ່ນ: ກ້ອງຖ່າຍພາບນິ້ງ, ກ້ອງຖ່າຍທໍາວິດີໂອ, ຂາກ້ອງ ແລະ ອຸປະກອນອື່ນໆ, ແຕ່ວ່າເຄື່ອງມືໃນການຮັບໃຊ້ວຽກງານຊໍ້າພັດແພງ, ເມື່ອທຽບໃສ່ລາຍຮັບແມ່ນບໍ່ດຸ່ນດ່ຽງ ຕ້ອງໄດ້ປົກປ້ອງສຸດຂີດເພື່ອບໍ່ເກີດຜົນເສຍຫາຍ; ນອກນີ້, ກ່ອນຈະເຮັດຂ່າວ-ບົດອອກມາແມ່ນໄດ້ທຸ້ມເທສະໝອງປັນຍາ ໃນການຄິດຄົ້ນ, ສັນຫາສໍານວນພາສາ ເພື່ອຂຽນລົງໃນຂ່າວ, ຄໍລໍາໜຶ່ງໆ ກໍຕ້ອງໄດ້ໃຊ້ເວລາ ຊອກຫາແຫຼ່ງຂໍ້ມູນ, ລົງໄປສໍາພາດ, ຖ່າຍພາບຫຼາຍໆໂປ້, ຫຼາຍໆສະຖານທີ່ ເລືອກພາບພຽງແຕ່ 1-2ໃບ ໃຫ້ສື່ເຖິງຄວາມໝາຍນັ້ນໆ.
ສຳລັບ ທ່ານ ນາງອາດີນາ ມະຫາວົງ ແລ້ວ, ໃນນາມທີ່ເປັນຄົນລາວ, ດໍາລົງຊີວິດໃນຜືນແຜ່ນດິນລາວ, ເພື່ອເປັນການປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມພາຍໃນປະເທດ ກໍໄດ້ມີໂອກາດດໍາເນີນທຸລະກິດຫຼາຍຢ່າງ ຈົນມາເຖິງອາຊີບສື່ມວນຊົນ ຄື: 1995 ເປັນຜູ້ກໍ່ຕັ້ງວາລະສານໄຊໂຢລາວ ພ້ອມທັງຮຽນຮູ້ໄປນໍາ ແລະ ຍ້ອນ ພັກ-ລັດມີນະໂຍບາຍ ສົ່ງເສີມປວງຊົນ ດໍາເນີນທຸລະກິດປະເພດຕ່າງໆ ບວກກັບຄວາມມັກ ຈຶ່ງເກີດມີຄວາມຄິດມາກໍ່ຕັ້ງ ໂທລະພາບເອັມວີລາວ ຊ່ອງ 5 (MV LAO channel 5), ປີ 2006 ເຖິງປັດຈຸບັນ ເປັນປະທານບໍລິສັດໂທລະພາບລາວສະຕາຣ ຈໍາກັດ, ເປັນຄະນະບໍລິຫານງານສະມາຄົມນັກຂ່າວລາວ, ເປັນຄະນະບໍລິຫານງານສະມາຄົມນັກທຸລະກິດຍິງລາວ, ປະທານບໍລິສັດໂທລະພາບລາວສະຕາຣ ຈໍາກັດ, ປີ 2017 ເຖິງປັດຈຸບັນ ເປັນທີ່ປຶກສາສະພາການຄ້າ ແລະ ອຸດສາຫະກໍາແຫ່ງຊາດລາວ.
ທ່ານ ນາງ ອາດີນາ ມະຫາວົງ ກ່າວຕື່ມວ່າ: ສໍາລັບໂທລະພາບ ເອັມວີລາວ ແມ່ນຮັບເອົາລາຍການຂ່າວຈາກ ສະຖານີໂທລະພາບ ຊ່ອງ 1 ເພື່ອເຜີຍແຜ່ອອກທາງມືຖື, ໃນນາມທີ່ເປັນສື່ຜູ້ໜຶ່ງແມ່ນມີຄວາມພູມໃຈໃນອາຊີບຕົນ ເຖິງແມ່ນວ່າ ອາຊີບນັກຂ່າວ ລາຍຮັບຈະບໍ່ດຸ່ນດ່ຽງກັບວຽກງານທີ່ເຮັດນັ້ນກໍຕາມ, ແຕ່ນັກຂ່າວຍັງໄດ້ຜົນກໍາໄລ ຈາກການທັດສະນະສຶກສາ, ການພົບປະແລກປ່ຽນບົດຮຽນ, ຄວາມຮັກແພງ ຈາກບັນດາສາຍສື່ດ້ວຍກັນ. ພ້ອມນີ້, ກໍເຊື່ອໝັ້ນວ່າ ເຖິງວ່າຈະປະກອບອາຊີບໃດໆກໍຕາມ ຂໍໃຫ້ທຸກໆທ່ານ ຈົ່ງມີເອກະລັກຊາດນິຍົມ ຊຶ່ງຈະຊ່ວຍເຮັດໃຫ້ຜູ້ອື່ນບໍ່ມີຄວາມເດືອດຮ້ອນ, ການເຮັດວຽກຕ້ອງເປັນໝູ່ຄະນະ (ທີມງານ) ວຽກດັ່ງກ່າວ ຈຶ່ງຈະບັນລຸຜົນສໍາເລັດ ແລະ ຈົ່ງເຮັດວຽກຢ່າງມີສະຕິຢູ່ສະເໝີ.
ໃນຍຸກສະໄໝໃໝ່ນີ້, ນັກຂ່າວ ຕ້ອງຮຽນຮູ້ເຕັກໂນໂລຊີໃຫ້ທັນກັບພາກພື້ນ ແລະ ສາກົນ ຕໍ່ກັບບັນຫາດັ່ງກ່າວ; ດັ່ງນັ້ນ, ຈຶ່ງຢາກຝາກເຖິງ ພັກ-ລັດ ຈົ່ງໃຫ້ການຊີ້ນໍາ-ນໍາພາວຽກງານສື່ຕື່ມເພື່ອໃຫ້ນັກຂ່າວໄດ້ມີເງື່ອນໄຂສຶກສາຮໍ່າຮຽນ ຈະຢຸດຢູ່ບ່ອນເກົ່າແມ່ນບໍ່ໄດ້, ຈະຕ້ອງໄດ້ພັດທະນາກ້າວໄປຂ້າງໜ້າ ດັ່ງຄໍາເວົ້າທີ່ວ່າ: “ຈໍາ ຈໍາ ຈໍາ ກະດູກເປັນຜົງ ບໍ່ຫຼົງບໍ່ລືມ ຕາຍເປັນຜີບໍ່ໜີການຮຽນ” ຕ້ອງຮຽນຮູ້ເປັນວິຊາສະເພາະ ຮຽນໄປເລື້ອຍໆ ຕາມການຂະຫຍາຍຕົວຂອງເຕັກໂນໂລຊີຍຸກສະໄໝໃໝ່ ແລະ ການເຮັດຂ່າວ ຕ້ອງໄດ້ເຂົ້າເຖິງທຸກເພດ, ທຸກໄວ ເພື່ອໃຫ້ບຸກຄົນເຫຼົ່ານັ້ນ ໄດ້ຮັບຮູ້ຂໍ້ມູນຂ່າວສານ ທີ່ນັກຂ່າວໄດ້ສື່ສານເຖິງນັ້ນໆ, ໝາຍຄວາມວ່າ ການຂຽນໃຫ້ໄດ້ຕາມເປົ້າໝາຍ ສໍາລັບເຍົາວະຊົນ, ຊາວໜຸ່ມ, ໄວໜຸ່ມ, ໄວກາງຄົນ ແລະ ຜູ້ອາວຸໂສ ຈະສື່ຄວາມໝາຍໃນຮູບແບບທີ່ຕ່າງກັນ.
ດ້ວຍການທີ່ ທ່ານ ນາງ ອາດີນາ ມະຫາວົງ ໄດ້ເຄື່ອນໄຫວໃນອາຊີບນັກຂ່າວ-ອາຊີບສື່ມວນຊົນ ທີ່ເຫັນວ່າເປັນອາຊີບທີ່ມີກຽດສະຫງ່າ ຄຽງບາຄຽງໄຫຼ່ ກັບຜູ້ຊາຍ ໃນການປະກອບສ່ວນໃນວຽກງານສື່ມວນຊົນ ອັນເປັນສ່ວນໜຶ່ງທີ່ປະກອບສ່ວນສຳຄັນ ໃນການປົກປັກຮັກສາ ແລະ ສ້າງສາພັດທະນາປະເທດຊາດ; ຕົນເອງ ກໍໄດ້ມີຄວາມພາກກູມໃຈ ທີ່ໄດ້ເຮັດອາຊີບນີ້.
ຄໍາເຫັນ