 |
ສຳລັບຄະນະຜູ້ສະໝັກ ສສຊ ຊຸດທີ X ປະຈຳເຂດເລືອກຕັ້ງທີ 4 ທີ່ລົງເຄື່ອນໄຫວພົບປະຢູ່ເມືອງງາຄັ້ງນີ້, ມີ 6 ທ່ານ ຍິງ 2 ທ່ານ ຈາກຈຳນວນຜູ້ສະໝັກທັງໝົດ 11 ທ່ານ, ຊຶ່ງນຳໂດຍ ທ່ານ ນາງ ວິລະວອນ ພັນທະວົງ ຄະນະປະຈຳພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ມີທ່ານ ທອງຄານ ວັດສະດາກອນ ກຳມະການພັກແຂວງ ເລຂາຄະນະບໍລິຫານງານພັກເມືອງງາ ແລະ ຜູ້ສະໝັກ ສສຂ ຊຸດທີ V ປະຈຳເຂດເລືອກຕັ້ງເມືອງງາ ຈຳນວນ 7 ທ່ານ ຍິງ 3 ທ່ານ.
ການລົງເຄື່ອນໄຫວຄັ້ງນີ້, ເພື່ອຮັບປະກັນໃຫ້ການໂຄສະນາຫາສຽງ ແລະ ການແນະນຳຕົວຂອງຜູ້ສະໝັກ ໃຫ້ມີຄວາມທົ່ວເຖິງ ແລະ ເລິກເຊິ່ງໃນທຸກຂົງເຂດ, ຄະນະຜູ້ສະໝັກໄດ້ມີການແບ່ງຈຸລົງພົບປະພະນັກງານຫຼັກແຫຼ່ງ ແລະ ປະຊາຊົນໃນແຕ່ລະຈຸດຢ່າງໃກ້ຊິດ. ພ້ອມດຽວກັນນັ້ນ, ໃນພິທີຍັງໄດ້ມີການຜ່ານຊີວະປະຫວັດຫຍໍ້ ແລະ ຜົນງານການເຄື່ອນໄຫວຂອງຄະນະຜູ້ສະໝັກຄົບທຸກທ່ານ (ລວມທັງກຸ່ມທີ່ເຄື່ອນໄຫວຢູ່ຈຸດອື່ນ) ຢ່າງລະອຽດ ເພື່ອໃຫ້ຜູ້ມີສິດເລືອກຕັ້ງໄດ້ຮັບຂໍ້ມູນຢ່າງຮອບດ້ານ, ໄດ້ແລກປ່ຽນຄຳຄິດຄຳເຫັນ ແລະ ສົມທຽບມາດຕະຖານຂອງຜູ້ສະໝັກແຕ່ລະທ່ານຢ່າງຖີ່ຖ້ວນ ແລະ ມີປະຊາທິປະໄຕ.
 |
ການພົບປະຄັ້ງນີ້, ຖືເປັນບາດກ້າວສຳຄັນ ເພື່ອແນໃສ່ໃຫ້ພະນັກງານ ແລະ ພໍ່ແມ່ ປະຊາຊົນ ສາມາດຕັດສິນໃຈປ່ອນບັດຄັດເລືອກເອົາຕົວແທນທີ່ມີຄວາມຮູ້, ຄວາມສາມາດ, ມີຄຸນສົມບັດສິນທຳປະຕິວັດ ແລະ ຮັກຊາດ ຮັກປະຊາຊົນຢ່າງແທ້ຈິງ ເຂົ້າໄປເຮັດໜ້າທີ່ເປັນກະບອກສຽງ ປົກປ້ອງສິດ ແລະ ຜົນປະໂຫຍດຂອງປະຊາຊົນ ຢູ່ໃນສະພາແຫ່ງຊາດ ແລະ ສະພາປະຊາຊົນແຂວງ ໃຫ້ມີຄວາມເຂັ້ມແຂງ ແລະ ສັກສິດກວ່າເກົ່າ.
(ຂ່າວ: ແສງອາທິດ)
ຄໍາເຫັນ