 |
ການລົງຫາສຽງ ຂອງ ສສຊ ເຂດເລືອກຕັ້ງທີ 1 ນະຄອນຫຼວງວຽງຈັນ ຄັ້ງນີ້, ເປັນການລົງສະ ເໜີຕົວ ແລະ ພົບປະ ຜູ້ມີສິດເລືອກຕັ້ງຂອງກະຊວງປ້ອງກັນຄວາມສະຫງົບ ທັງເປັນການຈັດຕັ້ງປະຕິບັດຕາມ ມາດຕາ 18 ຂອງກົດໝາຍວ່າດ້ວຍການເລືອກຕັ້ງ ສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນຂັ້ນແຂວງ (ສສຂ) ສະບັບປັບປຸງ ປີ 2024 ແນໃສ່ເຮັດໃຫ້ການປ່ອນບັດເລືອກຕັ້ງມີປະສິດທິພາບ, ປະສິດທິຜົນ ແລະ ເຂັ້ມງວດຕາມລະບຽບກົດໝາຍ ໂດຍແມ່ນຂັ້ນຕອນໜຶ່ງທີ່ມີບົດບາດຕັດສິນຕໍ່ຜົນການເລືອກຕັ້ງ, ເປັນການສະໜອງຂໍ້ມູນຂ່າວສານຕົວຈິງ, ເປັນການແນະນໍາໃຫ້ຜູ້ມີສິດເລືອກຕັ້ງ ຮັບຮູ້ເຂົ້າໃຈຢ່າງຖືກຕ້ອງ ຕໍ່ຜູ້ສະໝັກຮັບເລືອກຕັ້ງແຕ່ລະທ່ານ ທັງສ້າງໂອກາດໃຫ້ຜູ້ມີສິດເລືອກຕັ້ງ ແລະ ຜູ້ຮັບສະໝັກຮັບເລືອກຕັ້ງ ໄດ້ພົບປະ ແລະ ແລກປ່ຽນຄໍາເຫັນຊຶ່ງກັນ ແລະ ກັນ ກ່ອນການເລືອກຕັ້ງ ເພື່ອເປັນບ່ອນອີງໃນການຄົ້ນຄວ້າ, ຄົ້ນຄິດ ສົມທຽບໃສ່ມາດຕະຖານ ເພື່ອພິຈາລະນາ ແລະ ຕັດສິນໃຈເລືອກເອົາຜູ້ທີ່ຕົນເຫັນວ່າມີມາດຕະຖານກວ່າໝູ່ ເພື່ອເປັນຕົວແທນຂອງຕົນ ປະຕິບັດສິດ ອຳນາດ ຂອງປະຊາຊົນ ຢູ່ສະພາແຫ່ງຊາດ.
 |
ໂອກາດນີ້, ພົຈວ ຄອນສະຫວັນ ສົມພາໄຊ ກໍໄດ້ລາຍງານກ່ຽວກັບການກະກຽມຄວາມພ້ອມດ້ານຕ່າງໆຂອງກະຊວງປ້ອງກັນຄວາມສະຫງົບ ສຳລັບການປ່ອນບັດເລືອກຕັ້ງ ສສຊ ແລະ ສສຂ ຊຸດນີ້, ມາຮອດປັດຈຸບັນແມ່ນມີຜົນສຳເລັດຫຼາຍໜ້າວຽກ ເປັນຕົ້ນແມ່ນ ການຈັດຕັ້ງເຜີຍແຜ່ເອກະສານການປ່ອນບັດເລືອກຕັ້ງ, ແຕ່ງຕັ້ງຄະນະຮັບຜິດຊອບໜ່ວຍປ່ອນບັດ, ຂຶ້ນບັນຊີລາຍຊື່ຜູ້ມີສິດປ່ອນບັດເລືອກຕັ້ງ ແລະ ສົມທົບກັບຄະນະກຳມະການປົກຄອງເມືອງ ຂອງບັນດາເມືອງທີ່ກົມກອງຕັ້ງຢູ່. ສຳລັບກົມກອງອ້ອມຂ້າງກະຊວງປ້ອງກັນຄວາມສະຫງົບ ແມ່ນມີໜ່ວຍປ່ອນບັດເລືອກຕັ້ງທັງໝົດ 18 ຈຸດ.
ນອກນັ້ນ, ຍັງໄດ້ຈັດຕັ້ງໂຄສະນາເຜີຍແຜ່ ແນະນຳຄວາມໝາຍຄວາມສຳຄັນ, ຄຳຂວັນ, ຂໍ້ມູນລາຍຊື່ຜູ້ລົງສະໝັກຮັບເລືອກຕັ້ງ ຜ່ານສື່ຂອງກຳລັງປ້ອງກັນຄວາມສະຫງົບ ຢ່າງແຂງແຮງ ແລະ ທົ່ວເຖິງ ເປັນຕົ້ນແມ່ນອອກໂຄສະນາຜ່ານໂທລະພາບ, ວິທະຍຸຂອງ ປກສ, ໜັງສືພິມ, ສື່ສິ່ງພິມ ແລະ ສື່ອອນລາຍຂອງກະຊວງປ້ອງກັນຄວາມສະຫງົບ; ພ້ອມກັນນັ້ນ, ກໍໄດ້ສ້າງແຜນປ້ອງກັນ ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ໃນວັນເລືອກຕັ້ງ ຊຶ່ງກຳນົດເປັນວັນທີ 22 ກຸມພາ 2026 ໃນຂອບເຂດທົ່ວປະເທດ ເພື່ອຮັບປະກັນໃຫ້ມີຄວາມສະຫງົບປອດໄພ 100%.
(ຂ່າວ-ພາບ: ແກ້ວ ອຸເພັດ)
ຄໍາເຫັນ