ທ່ານ ສະເຫຼີມໄຊ ກົມມະສິດ ກ່າວວ່າ: ປີ 2027 ລັດຖະບານ ຈະສືບຕໍ່ສຸມໃສ່ຄຸ້ມຄອງເສດຖະກິດມະຫາພາກໃຫ້ມີສະຖຽນລະພາບ ໂດຍເລັ່ງໃສ່ແກ້ໄຂບັນຫາເຄັ່ງຮ້ອນດ້ານເສດຖະກິດ-ການເງິນ, ແກ້ໄຂບັນຫາເງິນເຟີ້, ອັດຕາແລກປ່ຽນ ແລະ ໜີ້ສິນພາຍໃນ ແລະ ຕ່າງປະເທດ; ສືບຕໍ່ປະຕິບັດວຽກງານການສ້າງເສດຖະກິດ ເອກະ ລາດ ເປັນເຈົ້າຕົນເອງໃນໄລຍະໃໝ່ ຕາມມະຕິ 04/ກມສພ ແລະ ເລກທີ 02/ລບ; ຂະຫຍາຍຖານລາຍຮັບງົບ ປະມານທີ່ຍືນຍົງ ໂດຍສະເພາະ ລາຍຮັບຈາກອາກອນມູນຄ່າເພີ່ມ, ອາກອນທີ່ດິນ, ຄ່າທຳນຽມ ແລະ ອື່ນໆ ໃຫ້ເພີ່ມຂຶ້ນ. ພ້ອມນີ້, ກໍຄົ້ນຄວ້າປັບປຸງອັດຕາພາສີ-ອາກອນ ການນໍາເຂົ້າສິນຄ້າຟູມເຟືອຍ ເພື່ອຫຼຸດຜ່ອນການໃຊ້ຈ່າຍເງິນຕາຕ່າງປະເທດທີ່ບໍ່ຈຳເປັນ; ເລັ່ງການຫັນເປັນທັນສະໄໝ ຄຸ້ມຄອງລາຍຮັບ ແລະ ລາຍຈ່າຍງົບປະມານ ເພື່ອອັດຊ່ອງຫວ່າງການຮົ່ວໄຫຼ, ເລັ່ງເຊື່ອມໂຍງຂໍ້ມູນບັນດາຂະແໜງການທີ່ກ່ຽວຂ້ອງໃຫ້ສໍາເລັດ ເພື່ອເປັນຂໍ້ມູນໃນການເກັບລາຍຮັບງົບປະມານ. ພ້ອມທັງນໍາໃຊ້ປັນຍາປະດິດເຂົ້າມາປະເມີນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະ; ຊຸກຍູ້ ແລະ ສົ່ງເສີມການຜະລິດສິນຄ້າ ເພື່ອທົດແທນການນໍາເຂົ້າ ແລະ ສົ່ງອອກ ຕິດພັນກັບການຈຳກັດການນໍາເຂົ້າ. ພ້ອມທັງ, ຄົ້ນຄວ້າມາດຕະການຈຳກັດການນໍາເຂົ້າສິນຄ້າຟູມເຟືອຍທີ່ບໍ່ຈຳເປັນ, ຄຸ້ມຄອງລາຄາສິນຄ້າ ແລະ ສະບຽງອາຫານ ເພື່ອຫຼີກລ່ຽງບໍ່ໃຫ້ມີການປັບຂຶ້ນລາຄາສິນຄ້າຕາມລຳພັງໃຈ ແລະ ມີມາດຕະການຕໍ່ຜູ້ລະເມີດຢ່າງເຂັ້ມງວດ ໂດຍສະເພາະສິນຄ້າອຸປະໂພກ-ບໍລິໂພກທີ່ມີຄວາມອ່ອນໄຫວຕໍ່ການດຳລົງຊີວິດຂອງປະຊາຊົນ; ຊຸກຍູ້ການຂຸດຄົ້ນ ແລະ ປຸງແຕ່ງແຮ່ທາດຕາມນະໂຍບາຍໃນໄລຍະ ໃໝ່ຂອງລັດຖະບານ ເພື່ອສ້າງມູນຄ່າເພີ່ມກ່ອນການສົ່ງອອກ ໂດຍສະເພາະສ້າງນິຄົມອຸດສາຫະກຳປຸງແຕ່ງແຮ່ທາດ; ສືບຕໍ່ເພີ່ມທະວີການຄຸ້ມຄອງ, ປະເມີນໂຄງການລົງທຶນດ້ານແຮ່ທາດ ແລະ ການຫັນໂຄງການຮູບແບບທົດລອງ ໄປສູ່ຮູບແບບປົກກະຕິ ໃຫ້ສໍາເລັດຕາມມະຕິສະພາແຫ່ງຊາດ ສະບັບເລກທີ 133/ສພຊ, ລົງວັນທີ 1 ກໍລະ ກົດ 2024; ສຸມໃສ່ຊຸກຍູ້ໃຫ້ບັນດາໂຄງການໄຟຟ້າ ທີ່ພວມດໍາເນີນການກໍ່ສ້າງໃຫ້ສໍາເລັດຕາມແຜນ ແລະ ສາ ມາດດໍາເນີນການຜະລິດຢ່າງເຕັມກຳລັງ, ພ້ອມທັງສົ່ງເສີມການພັດທະນາໂຄງການພະລັງງານໄຟຟ້າຈາກນໍ້າ, ລົມ, ແສງຕາເວັນ, ຊີວະມວນ ແລະ ອື່ນໆ ໂດຍສະເພາະ ບັນດາໂຄງການສົ່ງອອກໄຟຟ້າທີ່ໄດ້ມີສັນຍາສະໜອງພະ ລັງງານແລ້ວ; ສືບຕໍ່ກໍ່ສ້າງ ແລະ ສ້ອມແປງບັນດາເສັ້ນທາງຄົມມະນາຄົມທາງບົກ, ທາງລາງ, ທາງນໍ້າ ແລະ ທາງອາກາດ ຕາມແລວທາງເສດຖະກິດຕ່າງໆ, ທາງຫຼວງແຫ່ງຊາດ, ທາງຫຼວງຂອງແຂວງ, ເມືອງ ແລະ ເສັ້ນ ທາງເຂົ້າຫາແຫຼ່ງການຜະລິດ ແລະ ການບໍລິການໃຫ້ມີຄຸນນະພາບດີ ເພື່ອອຳນວຍຄວາມສະດວກໃຫ້ການຂົນສົ່ງ, ການຄ້າ, ການລົງທຶນ ແລະ ການທ່ອງທ່ຽວ ເປັນຕົ້ນ ເສັ້ນທາງດ່ວນນະຄອນຫຼວງວຽງຈັນ-ຮ່າໂນ້ຍ, ເສັ້ນທາງ 13 ເໜືອ, ເສັ້ນທາງ 13 ໃຕ້, ເສັ້ນທາງເລກ 8, ທາງເລກ 9, ທາງເລກ 12 ແລະ ອື່ນໆ.
ຄຽງຄູ່ກັນນັ້ນ, ຈະສືບຕໍ່ປະຕິບັດບັນດາໂຄງການທີ່ນອນໃນນະໂຍບາຍຊຸກຍູ້ສົ່ງເສີມການກໍ່ສ້າງ ແລະ ສ້ອມແປງເສັ້ນທາງໃນໄລຍະໃໝ່ຕາມມະຕິ ສະບັບເລກທີ 165/ສພຊ, ລົງວັນທີ 26 ມິຖຸນາ 2025; ຄຸ້ມຄອງ, ຕິດຕາມ ເເລະ ກວດກາບັນດາໂຄງການລົງທຶນເອກະຊົນໃຫ້ປະຕິບັດຕາມກົດໝາຍ ແລະ ລະບຽບການຢ່າງເຂັ້ມງວດ ເພື່ອຫຼຸດຜ່ອນຜົນກະທົບຕໍ່ສັງຄົມ ແລະ ສິ່ງແວດລ້ອມ; ເພີ່ມທະວີການຄຸ້ມຄອງ, ປົກປັກຮັກສາ ແລະ ນຳໃຊ້ຊັບພະຍາກອນທຳມະຊາດໃຫ້ມີປະສິດທິຜົນ ແລະ ສ້າງຜົນປະໂຫຍດສູງສຸດໃນການພັດທະນາປະເທດຊາດຕາມທິດສີຂຽວ ແລະ ຍືນຍົງ. (ຂ່າວ: ວັນເພັງ, ພາບ: ຕຸໄລເພັດ)
ຄໍາເຫັນ