ໂດຍຈະສຸມໃສ່ຫຼາຍວຽກງານສໍາຄັນ ເປັນຕົ້ນ ຈະສຸມໃສ່ຍົກສູງຄຸນນະ ພາບການຮຽນ-ການສອນໃນລະບົບສາມັນສຶກສາ ໂດຍສືບຕໍ່ສຸມໃສ່ປັບປຸງຫຼັກສູດລະບົບສາຍສາມັນສຶກສາ 6+3+3, ຝຶກອົບຮົມຄູຂັ້ນ ປ1, ປ2 ແລະ ປ3 ເພື່ອກະກຽມເລີ່ມຈັດຕັ້ງປະຕິບັດໃນສົກປີ 2027-2028, ປັບປຸງປຶ້ມຮຽນ, ວິທີການສອນ ແລະ ເນັ້ນໃສ່ການອ່ານ, ຂຽນ ແລະ ຄິດໄລ່ຂັ້ນພື້ນຖານ; ຊຸກຍູ້ສົ່ງເສີມການນໍາໃຊ້ວິທະ ຍາສາດເຕັກໂນໂລຊີ ແລະ ປັນຍາປະດິດ (AI) ເຂົ້າໃນການສິດສອນ-ການຮຽນໃຫ້ມີຄຸນນະພາບ ແລະ ສົ່ງເສີມການຄົ້ນຄວ້າວິທະຍາສາດ; ສົ່ງເສີມ ແລະ ຝຶກຊ້ອມນັກກິລາທີ່ມີພອນສະຫວັນ ເພື່ອກຽມພ້ອມສໍາລັບເຂົ້າຮ່ວມການແຂ່ງຂັນໃນລະດັບພາກພື້ນ ແລະ ສາກົນ.
ພ້ອມນັ້ນ, ຈະສືບຕໍ່ຍົກລະດັບໂຮງໝໍຕ່າງໆ ໃຫ້ໄດ້ມາດຕະຖານ ແລະ ທັນສະໄໝ ໄປພ້ອມກັບການຂະ ຫຍາຍການສະໜອງການບໍລິການຮັກສາຂັ້ນພື້ນຖານໃຫ້ທົ່ວເຖິງ ໂດຍສະເພາະເຂດຊົນນະບົດ ແລະ ຫ່າງໄກສອກຫຼີກ; ສຸມໃສ່ວຽກງານໂພຊະນາການ ແລະ ວຽກງານສັກຢາປ້ອງກັນພະຍາດ; ສົ່ງເສີມພາກລັດ, ເອກະຊົນຝຶກ ແລະ ພັດທະນາສີມືແຮງງານໃຫ້ມີຄວາມຫຼາກຫຼາຍວິຊາຊີບ ແລະ ປັບປຸງຫຼັກສູດໃຫ້ສອດຄ່ອງກັບຄວາມຕ້ອງ ການຕະຫຼາດ ແລະ ພັດທະນາມາດຕະຖານແຮງງານ; ປັບປຸງວຽກງານກອງທຶນປະກັນສັງຄົມ ແລະ ປະກັນສຸຂະ ພາບໃຫ້ມີປະສິດທິຜົນ; ເອົາໃຈໃສ່ການປະຕິບັດນະໂຍບາຍຕໍ່ຜູ້ມີຜົນງານ ແລະ ຄຸນງາມຄວາມດີຕໍ່ພາລະກິດປະຕິ ວັດຊາດ ປະຊາທິປະໄຕ ແລະ ສືບຕໍ່ການຂະຫຍາຍຕາໜ່າງປົກປ້ອງທາງດ້ານສັງຄົມ ໃຫ້ມີອັດຕາການປົກຄຸມຫຼາຍຂຶ້ນ; ສ້າງຄວາມເຂັ້ມແຂງໃນວຽກງານແກ້ໄຂການປ່ຽນແປງດິນຟ້າອາກາດ, ວຽກງານກະກຽມຄວາມພ້ອມຮັບມື ແລະ ຟື້ນຟູຜົນກະທົບຈາກໄພພິບັດທຳມະຊາດທີ່ຈະເກີດຂຶ້ນ; ສຸມໃສ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ໃຫ້ມີຊີວິດການເປັນຢູ່ທີ່ດີຂຶ້ນຕາມ 5 ວຽກຈຸດສຸມ ແລະ ໂຄງການບຸລິມະສິດທີ່ກໍານົດໃນວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ, ສົ່ງເສີມທຸກພາກສ່ວນປະກອບສ່ວນເຂົ້າໃນວຽກງານດັ່ງກ່າວ; ສຸມໃສ່ສ້າງອາຊີບ ແລະ ແຫຼ່ງລາຍຮັບຂອງປະຊາຊົນໃຫ້ມີຄວາມໝັ້ນຄົງ ພ້ອມທັງເຂົ້າເຖິງການບໍລິການຂັ້ນພື້ນຖານ; ເລັ່ງຈັດຕັ້ງການຜະລິດ ແລະ ຊຸກຍູ້ການຜະລິດກະສິກຳແບບປະສົມປະສານ ເພື່ອໃຫ້ມີສະບຽງອາຫານພຽງພໍ ແລະ ກ້າວໄປສູ່ການຜະລິດເປັນສິນຄ້າເພື່ອສ້າງອາຊີບ ແລະ ວຽກເຮັດງານທໍາເປັນແຫຼ່ງລາຍຮັບທີ່ໝັ້ນຄົງ; ສຸມໃສ່ພັດທະນາພື້ນຖານໂຄງລ່າງ ແລະ ສິ່ງອໍານວຍຄວາມສະດວກຢູ່ຊົນນະ ບົດໃຫ້ຮັບປະກັນການດຳລົງຊີວິດ, ການຜະລິດ ແລະ ເຂົ້າເຖິງການບໍລິການດ້ານສາທາລະນຸປະໂພກຢ່າງທົ່ວເຖິງ ແລະ ຍືນຍົງ.
ຄຽງຄູ່ກັນນັ້ນ, ຈະສືບຕໍ່ສົ່ງເສີມການອະນຸລັກ, ປົກປັກຮັກສາ, ຟື້ນຟູ ແລະ ເສີມຂະຫຍາຍຄຸນຄ່າມໍຣະດົກວັດທະນະທຳອັນດີງາມຂອງຊາດ ໃຫ້ໄດ້ຮັບການສືບທອດແບບຍືນຍົງ; ພັດທະນາວຽກງານສື່ມວນຊົນໃຫ້ມີຄຸນນະພາບ ແລະ ທັນສະໄໝ, ສ້າງຂີດຄວາມສາມາດໃຫ້ບຸກຄະລາກອນດ້ານສື່ຕ່າງໆ ໃຫ້ສາມາດປະດິດຄິດແຕ່ງທີ່ເກັ່ງ ທັນສະພາບການ ແລະ ກາຍເປັນກະບອກສຽງ ເພື່ອຜັນຂະຫຍາຍທິດທາງ, ນະໂຍບາຍ, ແຜນພັດທະນາຂອງພັກ-ລັດໃຫ້ໄດ້ຮັບຜົນສູງ. (ຂ່າວ: ວັນເພັງ; ພາບ: ຕຸໄລເພັດ)
ຄໍາເຫັນ