ປິດລັບຫຼອນຕີ, ບັ່ນທອນກໍາລັງຂອງສັດຕູ ສ້າງເງື່ອນໄຂໃຫ້ເຫຼົ່າຮົບອື່ນໆ ບຸກຕີດັບສູນສັດຕູ

 ໃນນີ້, ເວົ້າສະເພາະກຳລັງຕີພິເສດ ພາຍຫຼັງໄດ້ສ້າງຕັ້ງຂຶ້ນ ກໍໄດ້ເອົາໃຈໃສ່ປະຕິບັດໜ້າທີ່ວິຊາສະເພາະຂອງຕົນຢ່າງຕັ້ງໜ້າ ໃນການເຄື່ອນໄຫວສູ້ຮົບປິດລັບຫຼອນຕີ, ບັ່ນທອນກໍາລັງຂອງສັດຕູ ສ້າງເງື່ອນໄຂໃຫ້ເຫຼົ່າຮົບອື່ນໆບຸກຕີດັບສູນສັດຕູ. ໃນພາລະກິດຕໍ່ສູ້ປົດປ່ອຍຊາດໄດ້ປະກອບສ່ວນຢ່າງສໍາຄັນ ເຂົ້າໃນໄຊຊະນະລວມຂອງກອງທັບ ແລະ ຂອງປະຊາຊົນເຮົາ, ກ້າວສູ່ໄລຍະແຫ່ງການປົກປັກຮັກສາ ແລະ ພັດທະນາປະເທດ, ເຫຼົ່າຮົບຕີພິເສດ ກໍໄດ້ພ້ອມກັບເຫຼົ່າຮົບອື່ນ ສູ້ຮົບຢ່າງພິລະອາດຫານ ຕ້ານການເຊື່ອມຢຶດຊາຍແດນເຮົາຂອງສັດຕູ, ເຄື່ອນໄຫວສະກັດກັ້ນ ແລະ ກວາດລ້າງກຸ່ມຄົນບໍ່ດີທີ່ລີ້ຊ່ອນຢູ່ພູຜາປ່າດົງ ເຂດທຸລະກັນດານ, ເຂົ້າຮ່ວມປ້ອງກັນກອງປະຊຸມ ແລະ ວັນບຸນປະຫວັດສາດສໍາຄັນຕ່າງໆລະດັບຊາດ, ພາກພື້ນ ແລະ ສາກົນທີ່ລາວເຮົາເປັນເຈົ້າພາບ.

ສະຫາຍ ພັນເອກ ທອງດຳ ດວງມາລາ ຫົວໜ້າການທະຫານ ກອງພັນໃຫຍ່ 497 ຕາງໜ້າໃຫ້ນາຍ ແລະ ພົນທະຫານທົ່ວກອງພັນໃຫຍ່ 497 ໄດ້ສະແດງຄວາມຮູ້ສຶກເປັນກຽດ ແລະ ພາກພູມໃຈທີ່ສຸດ ຕໍ່ກັບການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວໃນຕະຫຼອດໄລຍະ 77 ປີຜ່ານມາ ຊຶ່ງໃນປີ 2025 ຜ່ານມາ ກອງພັນໃຫຍ່ 497 ໄດ້ປະກອບສ່ວນຜົນງານຫຼາຍດ້ານທີ່ໂດດເດັ່ນ ເປັນກົມກອງໜຶ່ງທີ່ຂັ້ນເທິງໄດ້ໄວ້ເນື້ອເຊື່ອໃຈ, ໄດ້ຄັດເລືອກເຂົ້າຮ່ວມການຊ້ອມຮົບລາໂຣສ 2025 ຮ່ວມກັບສະຫະພັນຣັດເຊຍ, ຜ່ານການເຂົ້າຮ່ວມຊ້ອມຮົບຕົວຈິງນັ້ນ ເຫັນວ່າພະນັກງານ-ນັກຮົບທຸກສະຫາຍມີຄວາມຈູບຈ້າວຫ້າວຫັນ, ມີຄວາມມານະອົດທົນຮໍ່າຮຽນຖອດຖອນເອົາບົດຮຽນຄວາມຮູ້ຈາກເພື່ອນມິດ ໂດຍສະເພາະແມ່ນສົງຄາມສະໄໝໃໝ່ ໃນການເຂົ້າຮ່ວມຕົວຈິງນັ້ນ ບັນດາສະຫາຍມີຄວາມອົດທົນຜ່ານຜ່າ ຍາດແຍ່ງເອົາບົດຮຽນອັນລໍ້າຄ່າ ໃນການນຳໃຊ້ອາວຸດເຕັກນິກທີ່ທັນສະໄໝ ເຂົ້າໃນການສູ້ຮົບ ກໍຄືການປະຕິບັດໜ້າທີ່ຕົວຈິງ ທີ່ພວກເຮົາບໍ່ເຄີຍໄດ້ນຳໃຊ້, ບໍ່ເຄີຍໄດ້ເຂົ້າເຖິງວັດຖຸດັ່ງກ່າວ ແລະ ສາມາດເຂົ້າເຖິງໄດ້ ໂດຍສະເພາະການນຳໃຊ້ໂດຣນສືບຂ່າວ, ໂດຣນໂຈມຕີ ກໍຄືການນຳໃຊ້ອາວຸດທີ່ທັນສະໄໝໃນການດັບສູນເປົ້າໝາຍທີ່ແໝ້ນຢໍາ. ນອກນີ້, ຍັງເຂົ້າຮ່ວມການຊ້ອມສວນສະໜາມສະເຫຼີມສະຫຼອງວັນສະຖາປະ ນາ ສປປ ລາວ ຄົບຮອບ 50 ປີ ແລະ ງານສຳຄັນຕ່າງໆ ສາມາດເຮັດສຳເລັດໜ້າທີ່ການເມືອງຂອງຕົນທີ່ຂັ້ນເທິງມອບໝາຍໃຫ້.

ໃນປີ 2026 ນີ້, ຄະນະພັກ, ຄະນະບັນຊາຂອງກອງພັນໃຫຍ່ 497 ຈະສືບຕໍ່ສຸມໃສ່ນຳພາກົມກອງປະຕິບັດໜ້າທີ່ວຽກງານປິ່ນອ້ອມ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ ເປັນຕົ້ນວຽກງານເຮັດໃຫ້ສະພາບການມີຄວາມສະຫງົບ, ໄດ້ຈັດຕັ້ງກຳລັງປະຈຳການກຽມພ້ອມສູ້ຮົບ ເຄື່ອນໄຫວກໍ່ສ້າງລົງຮາກຖານໃນ 2 ກຸ່ມບ້ານ 19 ໝູ່ບ້ານ ທີ່ກົມກອງຮັບຜິດຊອບ, ຖືເອົາວຽກງານສຶກສາອົບຮົມການເມືອງແນວຄິດເປັນກົກ ເພື່ອສອດຫ້ອຍເຂົ້າໃນທຸກຂົງເຂດວຽກງານ, ເອົາໃຈໃສ່ປັບປຸງກໍ່ສ້າງກຳລັງຕີພິເສດໃຫ້ຮັບປະກັນທາງດ້ານປະລິມານ ແລະ ຄຸນນະພາບ ເພື່ອກຽມພ້ອມເຄື່ອນໄຫວໜ້າທີ່ຕ່າງໆ, ຕໍ່ກັບວຽກງານປູກຝັງ-ລ້ຽງສັດ ກອງພັນໃຫຍ່ ສາມາດກຸ້ມຕົນເອງທາງດ້ານສະບຽງອາຫານ ສາມາດປະຕິບັດໄດ້, ວຽກງານພົວພັນຮ່ວມມືໂດຍອາໄສໝູ່ບ້ານອ້ອມຂ້າງ, ໝູ່ບ້ານແຮກສ່ຽວ ແລະ ບັນດາກົມກອງແຮກສ່ຽວ ໄດ້ລົງໃກ້ສິດຕິດແທດຊ່ວຍເຫຼືອຊຶ່ງກັນ ແລະ ກັນເພື່ອກຳສະພາບການຕ່າງໆ ໂດຍສະເພາະໃນຂອບເຂດເມືອງທຸລະຄົມ ແຂວງວຽງຈັນ ເຮັດໃຫ້ສະພາບການດັ່ງກ່າວມີຄວາມສະຫງົບ.

ໂອກາດນີ້, ສະຫາຍ ພັນເອກ ທອງດຳ ດວງມາລາ ຕາງໜ້າໃຫ້ນາຍ ແລະ ພົນທະຫານທົ່ວກອງພັນໃຫຍ່ 497 ອວຍພອນໄຊໃຫ້ບັນດາການນຳພັກ-ລັດຈົ່ງມີສຸຂະພາບເຂັ້ມແຂງ, ສືບຕໍ່ຊີ້ນຳ-ນຳພາປະເທດຊາດໃຫ້ມີຄວາມຈະເລີນກ້າວໜ້າ, ອວຍພອນບັນດາສະຫາຍ ຄະນະນຳກະຊວງປ້ອງກັນປະເທດ ຈົ່ງມີສຸຂະພາບເຂັ້ມແຂງ ສືບຕໍ່ນຳພາກອງທັບປະຊາຊົນລາວ ໃຫ້ເປັນກອງທັບທີ່ມີແບບແຜນທີ່ທັນສະໄໝ, ອວຍພອນກຳລັງຕີພິເສດ ຈົ່ງມີສຸຂະ ພາບເຂັ້ມແຂງກ້າວຂຶ້ນ ເຮັດສຳເລັດໜ້າທີ່ອັນມີກຽດສະຫງ່າຂອງຕົນທີ່ຊາດ ແລະ ປະຊາຊົນມອບໝາຍໃຫ້.