ປິດຊຸດອົບຮົມວິຊາຊີບຕັດຫຍິບ ສໍາລັບໄວໜຸ່ມຍິງ ພິການ ແລະ ດ້ອຍໂອກາດ

ທ່ານ ນາງ ລັດສະໝີ ສຸດທິຈັກ ຫົວໜ້າຂະແໜງພັດທະນາແມ່ຍິງ ແລະ ຝຶກອົບຮົມວິຊາຊີບ ສະຫະພັນແມ່ຍິງແຂວງ ໄດ້ລາຍງານກ່ຽວກັບການຝຶກອົບຮົມ. ຕະຫຼອດໄລຍະເວລາ ເກືອບ 3 ເດືອນ ຊຶ່ງໄດ້ເລີ່ມຈັດຕັ້ງປະຕິບັດ ມາແຕ່ວັນທີ 24 ກັນຍາ 2025 ໂດຍມີຜູ້ມາອົບຮົມ ທັງໝົດ 12 ຄົນ ຊາຍ 1 ຄົນ. ໃນນີ້, 9 ຄົນ ແມ່ນຜູ້ທີ່ໄດ້ຮັບການສະໜັບສະໜູນ ຈາກໂຄງການສ້າງຄວາມເຂັ້ມແຂງດ້ານຮັກສາສຸຂະພາບ ແລະ ພັດທະນາຊຸມຊົນແບບມີສ່ວນຮ່ວມ ແລະ ອີກ 3 ຄົນ ແມ່ນຜູ້ທີ່ສະໝັກໃຈມາຮຽນດ້ວຍຕົນເອງ. ການອົບຮົມຕັດຫຍິບຄັ້ງນີ້, ຜູ້ເຂົ້າຮ່ວມໄດ້ຮຽນຮູ້ພາກທິດສະດີ ແລະ ພາກປະຕິບັດຕົວຈິງ ລວມມີ 9 ບົດຄື: ຄຸນສົມບັດ ຂອງຊ່າງຕັດຫຍິບ, ຄວາມຮູ້ພື້ນຖານກ່ຽວກັບຈັກຫຍິບ, ການຫຍິບດ້ວຍມື, ວິທີຮຽນຫຍິບດ້ວຍຈັກ, ການຕັດ ແລະ ຫຍິບສິ້ນສໍາເລັດ, ການສ້າງແບບເສື້ອແມ່ຍິງ, ການຕັດ ແລະ ຫຍິບເສື້ອຄໍມົນ, ການຕັດ ແລະ ຫຍິບເສື້ອຄໍ 4 ແຈ ແລະ 5 ແຈ. ຜົນໄດ້ຮັບຈາກການຝຶກອົບຮົມ ສາມາດຕັດຫຍິບສິ້ນ ໄດ້ຕາມພາບຄູ່ມື ຈໍານວນ 140 ຜືນ, ຕັດຫຍິບເສື້ອ ໄດ້ 57 ຜືນ ແລະ ສາມາດປະເມີນຜົນຄວາມຮັບຮູ້ ຄວາມສາມາດໄດ້ ເກຼດ A 10 ຄົນ ເທົ່າກັບ 83.33%, ເກຼດ B+ ມີ 2 ຄົນ ເທົ່າກັບ 16.66%. 

       ໂອກາດນີ້, ທ່ານ ນາງ ເພັດດາແກ້ວ ພົນສາລາດ ໄດ້ມີຄໍາເຫັນວ່າ: ພາຍຫຼັງທີ່ໄດ້ຮັບການອົບຮົມ ມີຄວາມຮູ້ ມີຄວາມສາມາດແລ້ວ ຂໍໃຫ້ນໍາເອົາບົດຮຽນໃນຄັ້ງນີ້ ໄປຈັດຕັ້ງປະຕິບັດຕົວຈິງ ເພື່ອປະກອບອາຊີບ, ສ້າງວຽກເຮັດງານທຳ, ສ້າງລາຍຮັບໃຫ້ກັບຕົນເອງ ແລະ ຄອບຄົວໃຫ້ຫຼາຍຂຶ້ນ ກ້າວໄປສູ່ການຫຼຸດພົ້ນອອກຈາກຄວາມທຸກຍາກເທື່ອລະກ້າວ, ພ້ອມນີ້ ກໍໃຫ້ສືບຕໍ່ສຶກສາຮຽນຮູ້ຕື່ມ ນໍາປຶ້ມຄູ່ມືເພື່ອເພີ່ມຄວາມຮູ້, ເພີ່ມຄວາມຊໍານານໃຫ້ແກ່ຕົນເອງ ໃຫ້ສາມາດປະດິດສ້າງ, ອອກແບບຕ່າງໆ ໄປຕາມຍຸກສະໄໝ, ໃຫ້ໄດ້ຕາມຄວາມຕ້ອງການ ຂອງລູກຄ້າ.

(ຂ່າວ: ພຸດທະສອນ)