 |
ພິທີມອບ-ຮັບການສະໜັບສະໜູນເງິນດັ່ງກ່າວ ໄດ້ຈັດຂຶ້ນໃນວັນທີ 16 ກໍລະກົດ ນີ້ ທີ່ກະຊວງປ້ອງກັນຄວາມສະຫງົບ, ຕາງໜ້າມອບໂດຍ ທ່ານ ພົຕ ສຸລິນະ ແກ້ວປະເສີດ ຄະນະປະຈຳພັກກະຊວງ ເລຂາຄະນະພັກ ຫົວໜ້າຫ້ອງວ່າການກະຊວງປ້ອງກັນຄວາມສະຫງົບ ແລະ ຕາງໜ້າຮັບໂດຍທ່ານ ວຽງໄຊ ວິໄລກຸນ ປະທານສະໂມສອນ ດັບເບິນຢູໄອຈີ ນາຄາ, ມີທ່ານ ແສງສະເດັນ ບຸນລາວົງ ວ່າການແທນຫົວໜ້າຫ້ອງການກະຊວງສຶກສາທິການ ແລະ ກິລາ ແລະ ທ່ານ ສີຈັນ ຈິດຕະປັນຍາ ວ່າການແທນຫົວໜ້າກົມກິລາລະດັບສູງ ພ້ອມດ້ວຍບັນດາພະນັກງານທີ່ກ່ຽວຂ້ອງ, ຄູຝຶກ ແລະ ນັກກິລາ ເຂົ້າຮ່ວມເປັນສັກຂີພິຍານ.
ກ່ອນໜ້ານີ້ ທາງຄອບຄົວຂອງພະນະທ່ານນາຍົກລັດຖະມົນຕີແຫ່ງ ສປປ ລາວ ກໍຍັງໄດ້ມອບເງິນຈຳນວນໜຶ່ງ ເພື່ອເປັນຂວັນກຳລັງໃຈໃຫ້ແກ່ຫຼານນ້ອຍທີມດັ່ງກ່າວອີກດ້ວຍ ແລະ ໃນໂອກາດນີ້ ທ່ານ ວຽງໄຊ ວິໄລກຸນ ກໍໄດ້ໃຫ້ສຳພາດຕໍ່ສື່ມວນຊົນວ່າ: ຢາກຊີ້ແຈງໃຫ້ສັງຄົມຮັບຮູ້ເລື່ອງເງິນລາງວັນຈາກບັນດາພາກສ່ວນທັງພາກລັດ ແລະ ເອກະຊົນມອບໃຫ້ ກໍຄື ຈາກການນຳຂັ້ນສູງ ແລະ ນໍ້າໃຈຈາກສັງຄົມລາວມອບໃຫ້ ຂໍຢືນຢັນວ່າຈະນຳໃຊ້ເຂົ້າໃນການບໍລິຫານທີມ ແລະ ບິ່ແບ່ງປັນສ່ວນໜຶ່ງໃຫ້ນັກກິລາທຸກໆຄົນຢ່າງທົ່ວເຖິງ ຄືຮູ້ກັນແລ້ວວ່າ ໃນການເຂົ້າຮ່ວມແຂ່ງຂັນທຸກລາຍການທັງພາຍໃນ ແລະ ຕ່າງປະເທດ ລ້ວນແລ້ວແຕ່ມີການໃຊ້ຈ່າຍສູງ ຊຶ່ງຂ້າພະເຈົ້າເປັນຜູ້ຈ່າຍເອງທັງໝົດ ສາມາດເວົ້າໄດ້ວ່າ ຕະຫຼອດໄລຍະ 3 ປີ ຜ່ານມາ ທີ່ມີການກໍ່ຕັ້ງສະໂມສອນ ແລະ ເຄື່ອນໄຫວຕ່າງໆ ໄດ້ໃຊ້ຈ່າຍງົບປະມານໄປແລ້ວຫຼາຍລ້ານໂດລາ ແຕ່ກໍຄຸ້ມຄ່າ ພວກເຮົາສາມາດສ້າງຜົນງານສາມາດແຊັມຫຼາຍກວ່າ 40 ລາຍການ ໂດຍສະເພາະຜົນງານຫຼ້າສຸດຊຶ່ງເປັນຄັ້ງປະຫວັດສາດ ໃນເວທີສາກົນ ໃນການຍາດໄດ້ແຊັມລາຍການ ໄອເບີ ຄັບ 2025 ທີ່ປະເທດປັອກຕຸຍການ ສ້າງກຽດສັກສີ ແລະ ຊື່ສຽງມາສູ່ປະເທດຊາດ. ເຖິງແນວໃດກໍດີ, ໃນຕໍ່ໜ້າພວກເຮົາຈະສືບຕໍ່ຄັດເລືອກນັກກິລາຜູ້ທີ່ມີຄວາມສາມາດເພີ່ມອີກ ແລະ ຈະນຳພາລູກຫຼານລາວອອກເຄື່ອນໄຫວພັດທະນາຕົນເອງຢ່າງຕໍ່ເນື່ອງໃຫ້ດີກວ່າເກົ່າ ເພື່ອຮັບປະກັນໃນການສ້າງຜົນງານໃນຕໍ່ໜ້າໃຫ້ປະສົບຜົນສຳເລັດຕາມເປົ້າໝາຍທີ່ວາງໄວ້.
ສຳລັບແຜນການເຄື່ອນໄຫວຂອງ ສະໂມສອນ ດັບເບິນຢູໄອຈີ ນາຄາ ໃນຕໍ່ໜ້າ ແມ່ນຈະເຂົ້າຮ່ວມແຂ່ງຂັນລາຍການ ບັນຍີ ອີໄລ ຄັບ 2025 ທີ່ນະຄອນຊຽງໄຮ້ ສປ ຈີນ ຊຶ່ງຈະອອກເດີນທາງໃນວັນທີ 20 ກໍລະກົດ ນີ້ ແລະ ອີກ 2 ລາຍການໃຫຍ່ ລະດັບສາກົນ ຊຶ່ງຈະຈັດຂຶ້ນທີ່ປະເທດບຣາຊິນ ແລະ ອີກໜຶ່ງລາຍການທີ່ປະເທດອາຟຣິກາໃຕ້ ຈະຈັດຂຶ້ນ ໃນປີ 2026.
(ຂ່າວ-ພາບ: ສົງການ)
ຄໍາເຫັນ