ປກສ ເມືອງແມດສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 2021 – 2023

ເມື່ອບໍ່ດົນມານີ້ ທີ່ສະໂມສອນຂອງເມືອງແມດ ແຂວງວຽງຈັນ ກອງບັນຊາການ ປກສ ເມືອງແມດ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດປີ 2021 – 2023, ໂດຍເປັນປະທານຂອງທ່ານ ພັທ ໄຊຊະນະ ແກ້ວກຸນນະວົງ ກຳມະການພັກເມືອງ ຫົວໜ້າກອງບັນຊາການ ປກສ ເມືອງແມດ, ເປັນກຽດເຂົ້າຮ່ວມຂອງທ່ານ ພັອ ສົມຄິດ ດວງພະຈັນ ກຳມະການພັກແຂວງ ຫົວໜ້າກອງບັນຊາການ ປກສ ແຂວງວຽງຈັນ, ທ່ານ ຄຳປ່ຽນ ແສງສະຫວັດ ກຳມະການພັກແຂວງ ເລຂາພັກມືອງ ເຈົ້າເມືອງແມດ ທັງເປັນປະທານປ້ອງກັນຊາດ-ປ້ອງກັນຄວາມສະຫງົບຂັ້ນເມືອງ, ມີບັນດາສະຫາຍຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການອ້ອມຂ້າງເມືອງ, ເລຂາຄະນະພັກຮາກຖານ, ຫົວໜ້າກຸ່ມບ້ານ, ເລຂາພັກບ້ານ-ນາຍບ້ານ ແລະ ຄະນະພັກ - ຄະນະບັນຊາ, ຕະຫຼອດຮອດພະນັກງານນັກຮົບພາຍໃນກົມກອງເຂົ້າຮ່ວມ.
ກອງປະຊຸມທ່ານຫົວໜ້າ ປກສ ເມືອງ ກໍໄດ້ຂຶ້ນຜ່ານບົດສະຫຼຸບຜົນການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ (2021 – 2023)ເປົ້າໝາຍທົ່ວເມືອງມີ 5 ກຸ່ມບ້ານ ແລະ 33 ໝູ່ບ້ານ, ຜົນການຈັດຕັງປະຕິບັດ 6 ວຽກຈຸດສຸມວາລະແຫ່ງຊາດ ຊຶ່ງໄດ້ເລີ່ມຈັດຕັ້ງປະຕິບັດມາແຕ່ວັນທີ 20 ທັນວາ 2021ຊຶ່ງໄດ້ເຜີຍແຜ່ເຊື່ອມຊຶມເອກະສານຂັ້ນເມືອງ ແລະ ຂັ້ນຮາກຖານ, ຈຳນວນ 33 ບ້ານ ເປົ້າໝາຍລວມທັງໝົດ  1.032 ຄົນຍິງ 14 ຄົນ, ມາເຂົ້າຮ່ວມສຶກສາອົບຮົມຈຳນວນ 558 ຄົນຍິງ 12 ຄົນ, ຍັງບໍ່ໄດ້ເຂົາສຶກສາອົບຮົມຈຳນວນ 474 ຄົນຍິງ 2ຄົນ, ພ້ອມກັນນັ້ນຜູ້ແທນກອງປະຊຸມຍັງໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນແລກປ່ຽນບົດຮຽນຊຶ່ງກັນ ແລະ ກັນ ເຖິງວິທີການຈັດຕັ້ງປະຕິບັດ ແລະ ວິທີແກ້ໄຂໃນຕໍ່ໜ້າ ເພື່ອເຮັດໃຫ້ບັນຫາຢາເສບຕິດຫຼຸດໜ້ອຍຖອຍລົງເທື່ອລະກ້າວ. 
ໃນຕອນທ້າຍ, ທ່ານຫົວໜ້າກອງບັນຊາການ ປກສ ແຂວງ ກໍໄດ້ມີຄຳເຫັນໂອ້ລົມຕໍ່ກອງປະຊຸມ ຊຶ່ງທ່ານໄດ້ຍົກໃຫ້ເຫັນຄວາມໝາຍ, ຄວາມສຳຄັນຂອງວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ທ່ານຍັງໄດ້ຮຽກຮ້ອງມາຍັງອຳນາດການປົກຄອງທຸກຂັ້ນຈົ່ງພ້ອມກັນເປັນຫູເປັນຕາຊ່ວຍເຈົ້າໜ້າທີ່, ໃຫ້ເອົາໃຈໃສ່ສືບຕໍ່ເຮັດວຽກງານການເມືອງ-ແນວຄິດ, ຮຽກຮ້ອງມາຍັງຜູ້ປົກຄອງຈົ່ງເອົາໃຈໃສ່ສຶກສາອົບຮົມລູກຫຼານຂອງຕົນ, ໃຫ້ປະສານສົມທົບກັບອຳນາດການປົກຄອງທຸກຂັ້ນໃຫ້ມີການວາງແຜນ ເພື່ອຫາວີທີແກ້ໄຂບໍ່ໃຫ້ບັນຫາຢາເສບຕິດແຜ່ລາມເປັນວົງກວ້າງ ແລະ ພ້ອມກັນກຳຈັດປັດເປົ່າກ່ຽວບັນຫາຢາເສບຕິດໃຫ້ໝົດໄປ.  
ຂ່າວ-ພາບ:  ເມືອງແມດ   ບຸນລ້ອມ