ກອງບັນຊາການປ້ອງກັນຄວາມສະຫງົບ (ປກສ) ເມືອງພຽງ ແຂວງໄຊຍະບູລີ ຈັດຊຸດຝຶກອົບຮົມວຽກງານວິຊາສະເພາະໃຫ້ກຳລັງ ປກສ ບ້ານ, ປກສ ກຸ່ມບ້ານນາຊິງ ຕາແສງນາສະຫວັນ ຂຶ້ນໃນລະຫວ່າງວັນທີ 21-22 ກໍລະກົດຜ່ານມາ, ທີ່ຫ້ອງປະຊຸມບ້ານນາຊິງ ໂດຍການເປັນກຽດເຂົ້າຮ່ວມຂອງທ່ານ ເສນ ພັນລັກ ເລຂາຄະນະບໍລິຫານງານພັກເມືອງ, ມີທ່ານ ຈິດຕະພົງ ພົງວິໄລ ຫົວໜ້າກອງບັນຊາການ ປກສ ເມືອງ, ມີບັນດາຄະນະພັກ, ຄະນະບັນຊາ ນາຍ ແລະ ພົນຕຳຫຼວດເຂົ້າຮ່ວມ.
ການຝຶກອົບຮົມຄັ້ງນີ້, ບັນດາສຳມະກອນທີ່ເຂົ້າຮ່ວມໄດ້ຮຽນຮູ້ ກ່ຽວກັບຄໍາສັ່ງຂອງທ່ານນາຍົກລັດຖະ ມົນຕີ ວ່າດ້ວຍການເພີ່ມທະວີວຽກງານສະກັດກັ້ນ ຕ້ານປະກົດການຫຍໍ້ທໍ້ໃນສັງຄົມ, ຄຳສັ່ງຂອງລັດຖະມົນຕີກະຊວງ ປກສ ວ່າດ້ວຍການເພີ່ມທະວີວຽກງານກໍ່ສ້າງຮາກຖານການເມືອງຂອງກໍາລັງ ປກສ, ວຽກງານສືບ ສວນ-ສອບສວນຂັ້ນພື້ນຖານ, ວຽກງານຈົດທະບຽນສໍາມະໂນຄົວ ແລະ ຄຸ້ມຄອງກວດກາອາຊີບພິເສດ, ວຽກງານຈົດທະບຽນສໍາມະໂນຄົວຕ່າງດ້າວ, ວຽກງານຄຸ້ມຄອງເປົ້າໝາຍ, ເອກະສານປ້ອງກັນສະຖານທີ່ເກີດເຫດ, ເອກະສານສ້າງຄອບຄົວ ແລະ ບ້ານປ້ອງກັນຄວາມສະຫງົບ, ເອກກະສານຈັດຕັ້ງການເຄື່ອນໄຫວຂອງກຳລັງ ປກສ ກຸ່ມບ້ານ ແລະ ປກສ ບ້ານ, ບົດບັນທຶກຄອບຄົວວຽກງານປ້ອງກັນຄວາມສະຫງົບດີ ແລະ ບົດບັນທຶກສັນຍາຄວາມສະຫງົບຂອງບ້ານ ເພື່ອຍົກລະດັບຄວາມຮັບຮູ້ ຄວາມສາມາດຂອງກໍາລັງ ປກສ ບ້ານ ຢູ່ກຸ່ມບ້ານນາຊິງໃຫ້ຮູ້ສິດ ໜ້າທີ່ ພາລະບົດບາດຂອງຕົນ ເຮັດໃຫ້ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍດີຂຶ້ນເທື່ອລະກ້າວ ປະຕິບັດໄດ້ 4 ຄາດໝາຍ 4 ບຸກທະລຸ, 13 ວຽກຍຸດທະສາດຂອງກະຊວງວາງອອກ ກໍຄືທິດທາງແຜນການຂອງກອງບັນຊາການ ປກສ ເມືອງໃນປີ 2025 ໃຫ້ປະກົດຜົນເປັນຈິງ.
ຂ່າວ: ວົງສະຫວັນ ສຸທິໂວຫານ
ຄໍາເຫັນ