ສະຫະພັນແມ່ຍິງກອງພັນໃຫຍ່ 202ປາຖະກະຖາ ວັນແມ່ຍິງສາກົນ

 ຢູ່ທີ່ສະໂມສອນ ກອງພັນໃຫຍ່ 202 ໂດຍການເປັນປະທານຂອງສະຫາຍ ພັນໂທ ຄຳໄບ ວິໄລພອນ ຮອງຫົວໜ້າພະແນກການເມືອງ ຜູ້ຊີ້ນຳວຽກງານອົງການຈັດຕັ້ງມະຫາຊົນ ກອງພັນໃຫຍ່ 202, ມີບັນດາຜູ້ຊີ້ນໍາອົງການຈັດຕັ້ງມະຫາຊົນຈາກ ພະແນກການ, ກົມກອງ ພ້ອມດ້ວຍເອື້ອຍນ້ອງສະຫະພັນແມ່ຍິງທົ່ວກອງພັນໃຫຍ່ 202 ເຂົ້າຮ່ວມຮັບຟັງ.

ສະຫາຍ ພັນຕີ ນາງ ພຽງວິໄລ ວຽງມະນີ ຫົວໜ້າຂະແໜງສະຫະພັນແມ່ຍິງ ກອງພັນໃຫຍ່ 202 ໄດ້ຂຶ້ນທົບທວນຫວນຄືນປະຫວັດຄວາມເປັນມາກ່ຽວກັບວັນທີ 8 ມີນາ. ວັນແມ່ຍິງສາກົນ ກຳເນີດເກີດຂຶ້ນໃນທ່າມກາງສະພາບເສດຖະກິດຂອງພວກສັກດິນາ ແລະ ນາຍທຶນຂະຫຍາຍຕົວ ໄດ້ສ້າງຄວາມຮັ່ງມີໃຫ້ພວກນາຍທຶນ ຊ້ຳພັດຍິ່ງເພີ່ມຄວາມທຸກຍາກລຳບາກ ໃຫ້ແກ່ຊາວຜູ່ອອກແຮງານ ໂດຍສະເພາະແມ່ນກຳມະກອນເພດຍິງ ຖືກກົດຂີ່ຂູດຮີດຢ່າງໜັກໜ່ວງ, ເຮັດວຽກຫຼາຍຊົ່ວໂມງ ແຕ່ໄດ້ຮັບຄ່າຈ້າງແຮງງານຖືກ, ເຮັດວຽກບໍ່ມີການຮັບປະກັນ, ບໍ່ມີລະບອບປົກປັກຮັກສາ ສຸຂະພາບຂອງແມ່ຍິງ ແລະເດັກນ້ອຍ ຕໍ່ໜ້າສະພາບການ ແລະ ຄວາມທຸກທໍລະມານດັ່ງກ່າວ ກຳມະກອນແມ່ຍິງ ຮູ້ສຶກຄຽດແຄ້ນ ຈຶ່ງໄດ້ສາມັກຄີກັນລຸກຂຶ້ນຕໍ່ສູ້ ທວງໃຫ້ພວກນາຍທຶນ ຕ້ອງແກ້ໄຂຊີວິດການເປັນຢູ່ຂອງເຂົາເຈົ້າ; ມາເຖິງປີ 1910 ຂະບວນການຕໍ່ສູ້ຂອງແມ່ຍິງ ໄດ້ແຜ່ຂະຫຍາຍກວ້າງອອກ ໄປສູ່ປະເທດນາຍທຶນ ແລະ ໄດ້ຈັດກອງປະຊຸມສາກົນກ່ຽວກັບບັນຫາແມ່ຍິງຂຶ້ນເປັນຄັ້ງທຳອິດ ຢູ່ໂກເປນຮາກ ນະຄອນຫຼວງປະເທດເດນມາກ ມີຜູ່ແທນ 100 ກວ່າຄົນ ຈາກ 17 ປະເທດເຂົ້າຮ່ວມ. ກອງປະຊຸມດັ່ງກ່າວ ໄດ້ຕົກລົງຮັບຮອງເອົາ ວັນທີ 8 ມີນາ ຂອງທຸກໆປີ ເປັນວັນແມ່ຍິງສາກົນ.

ໂອກາດນີ້, ສະຫາຍ ພັນໂທ ຄຳໄບ ວິໄລພອນ ຍັງໄດ້ໃຫ້ກຽດໂອ້ລົມ ແລະ ຍົກໃຫ້ເຫັນພາລະບົດບາດຄວາມໝາຍ ຄວາມສຳຄັນຂອງແມ່ຍິງ, ພ້ອມທັງຮຽກຮ້ອງໃຫ້ເອື້ອຍນ້ອງແມ່ຍິງເອົາໃຈໃສ່ຕໍ່ໜ້າທີ່ວຽກງານຂອງຕົນ, ເພີ່ມທະວີຄວາມສາມັກຄີຢູ່ພາຍໃນກົມກອງໃຫ້ແໜ້ນແຟ້ນ, ຍູ້ແຮງຂະບວນການດ້ານຕ່າງໆພາຍໃນກົມກອງໃຫ້ຟົດຟື້ນ, ຈັດຕັ້ງປະຕິບັດມະຕິຄຳສັ່ງຕ່າງໆຂອງຂັ້ນເທິງກໍຄືຂອງກົມກອງວາງອອກໃຫ້ເຂັ້ມງວດ, ພ້ອມກັນເຮັດສຳເລັດໜ້າທີ່ວຽກງານທີ່ການຈັດຕັ້ງມອບໝາຍໃຫ້.

(ພາບ-ຂ່າວ: ຄໍາຊາຍ ກວ່າງຄຸນສີ)