 |
1) ສືບຕໍ່ເຮັດວຽກງານສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ ແລະປະຊາຊົນ, ຊັ້ນຄົນຕ່າງໆໃຫ້ແຂງແຮງກວ່າເກົ່າ. 2) ເພີ່ມທະວີຄວາມຮັບຜິດຊອບໃນການນໍາພາ-ຊີ້ນໍາ, ຈັດຕັ້ງຜັນຂະຫຍາຍຜົນສໍາເລັດກອງປະຊຸມຄົບຄະນະ ຄັ້ງທີ 10 ສະໄໝທີ XI ຂອງຄະນະບໍລິຫານງານສູນກາງພັກ ແລະຈັດຕັ້ງຜັນຂະຫຍາຍມະຕິ 04/ກມສພ, ຂໍ້ກໍານົດເລກທີ 416/ຄລສພ, ຄໍາສັ່ງ 411/ຄລສພ, ຄໍາແນະນໍາ ແລະນິຕິກໍາອື່ນໆກ່ຽວກັບການກະກຽມ ແລະດໍາເນີນກອງປະຊຸມໃຫຍ່ 3 ຂັ້ນຂອງພັກ, ໂດຍສະເພາະແມ່ນໃຫ້ສືບຕໍ່ສຸມໃສ່ກະກຽມດໍາເນີນກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ໃຫ້ມີຂະບວນການຫັນປ່ຽນທີ່ຕັ້ງໜ້າກວ່າເກົ່າ. 3) ເອົາໃຈໃສ່ນໍາພາ-ຊີ້ນໍາປັບປຸງກົງຈັກການຈັດຕັ້ງຂັ້ນແຂວງ-ຂັ້ນເມືອງ ຕາມມະຕິຂອງຄະນະບໍລິຫານງານສູນກາງພັກສະໄໝທີ XI, ຂອງສະພາແຫ່ງຊາດ ແລະຄໍາແນະນໍາຂອງຄະນະເລຂາທິການສູນກາງພັກ ກ່ຽວກັບຄົ້ນຄວ້າສັບຊ້ອນ-ຈັດວາງພະນັກງານນໍາພາ-ຄຸ້ມຄອງໃຫ້ສອດຄ່ອງກັບຄວາມຮູ້-ຄວາມສາມາດ ແລະຄວາມຮຽກຮ້ອງຕ້ອງການຂອງໜ້າທີ່ການເມືອງໃນແຕ່ລະໄລຍະ; ສ້າງເງື່ອນໄຂອັນດີ ຫັນເອົາພະນັກງານໜຸ່ມນ້ອຍ ລົງໄປຝຶກຝົນຫຼໍ່ຫຼອມ ແລະທົດສອບກໍ່ສ້າງຢູ່ຂັ້ນຕາແສງ ເພື່ອສ້າງເປັນພະນັກງານນໍາພາ-ຄຸ້ມຄອງສືບທອດປ່ຽນແທນ ທີ່ມີຄຸນະພາບຢ່າງເປັນລະບົບ. 4) ໃຫ້ບັນດາຮາກຖານພັກ, ຄະນະພັກເມືອງ-ນະຄອນ, ຄະນະພັກ ປກຊ-ປກສ ແຂວງ, ສະຫະພັນນັກຮົບເກົ່າ, ແນວລາວສ້າງຊາດແຂວງ ແລະບັນດາອົງການຈັດຕັ້ງມະຫາຊົນແຕ່ລະຂັ້ນ ຮີບຮ້ອນ ພ້ອມທັງຜັນຂະຫຍາຍຈັດຕັ້ງແບ່ງຄວາມຮັບຜິດຊອບຂອງຄະນະພັກ ແລະຄະນະປະຈໍາພັກຄືນໃໝ່ ໃຫ້ສອດຄ່ອງຕາມຄໍາສັ່ງຂອງຄະນະເລຂາທິການສູນກາງພັກ; ພ້ອມທັງຜັນຂະຫຍາຍຈັດຕັ້ງປະຕິບັດຜົນສໍາເລັດ ກໍ່ຄືມະຕິກອງປະຊຸມຂອງຕົນ ເຂົ້າສູ່ຂະບວນການຕົວຈິງໃຫ້ໄວ ໂດຍຫັນເປັນແຜນການ ແລະໂຄງການລະອຽດໃນແຕ່ລະດ້ານ ເພື່ອນໍາພາຈັດຕັ້ງປະຕິບັດແຕ່ປີທໍາອິດເປັນຕົ້ນໄປ. 5) ເພິ່ມທະວີຄວາມເອົາໃຈໃສ່ນໍາພາ-ຊີ້ນໍາການຜະລິດລະດູຝົນ ຕິດພັນກັບການຕ້ານຖ້ວມ, ສະກັດກັ້ນການແຜ່ລະບາດພະຍາດຕິດແປດຕ່າງໆ; ເປັນເຈົ້າການກຽມຮອບດ້ານ ເພື່ອຮັບມືກັບໄພພິບັດທີ່ອາດເກີດຂຶ້ນ ເພື່ອບໍ່ໃຫ້ຖືກທ່າຮັບ ແລະເກີດຜົນເສຍຫານທີ່ໜັກໜ່ວງ, ກະກຽມແນວພັນປູກ, ແນວພັນລ້ຽງ, ຝຸ່ນ-ປຸ໋ຍຕ່າງໆ ເພື່ອສະໜອງໃຫ້ຊາວກະສິກອນໃຫ້ທັນກັບລະດູການ; ປຸກລະດົມປະຊາຊົນສຸມໃສ່ການຜະລິດເປັນສິນຄ້າ ເພື່ອສົ່ງອອກ ແລະທົດແທນການນໍາເຂົ້າ, ພ້ອມກັນປູກພືດ ແລະຕົ້ນໄມ້ອຸດສາຫະກໍາສະໜອງໂຮງງານປຸງແຕ່ງທີ່ມີຢູ່ພາຍໃນແຂວງ. 6) ສືບຕໍ່ສຸມໃສ່ນໍາພາແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ພວມສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດ ແລະປະຊາຊົນບັນດາເຜົ່າ. 7) ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານປະຈໍາປີຂອງແຂວງ ໃຫ້ບັນລຸຄາດໝາຍ ແລະລະດັບຄາດໝາຍທີ່ວາງໄວ້, ເອົາໃຈໃສ່ແກ້ໄຂສະພາບຂາດແຄນຄູ ແລະການປະລະການຮຽນຂອງນັກຮຽນ ໂດຍມີການເຂົ້າຮ່ວມຂອງປະຊາຊົນ. 8) ສືບຕໍ່ເອົາໃຈໃສ່ການກະກຽມສະເຫຼີມສະຫຼອງ 2 ວັນປະຫວັດສາດ ຕາມກິດຈະກໍາຕ່າງໆທີ່ວາງໄວ້ ແລະ 9) ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຢ່າງແຂງແຮງ, ທົ່ວເຖິງ.
 |
ເຂົ້າຮ່ວມຮັບຟັງໃນຄັ້ງນີ້, ມີສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ມີສະຫາຍຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ເລຂາພັກເມືອງ-ນະຄອນ ຕະຫຼອດເຖິງພະນັກງານການນຳຫຼັກແຫຼ່ງພາຍໃນແຂວງເຂົ້າຮ່ວມ.
ໂອກາດນີ້, ສະຫາຍ ຮອງປະທານປະເທດ ຍັງໄດ້ມອບເງິນຈຳນວນ 100 ລ້ານກີບໃຫ້ແຂວງສະຫວັນນະເຂດ ເພື່ອແກ້ໄຂຜົນກະທົບຈາກໄພນ້ຳຖ້ວມ ພ້ອມທັງໄດ້ມອບອຸປະກອນການຮຽນ-ອຸປະກອນກິລາ ມູນຄ່າ120 ລ້ານກີບ, ມອບຜ້າຫົ່ມ 100 ຜືນ ແລະມຸ້ງອີກຈຳນວນ 100 ຜືນໃຫ້ເມືອງທ່າປາງທອງນຳອີກ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ