ສະຫາຍ ກິແກ້ວ ໄຂຄໍາພິທູນ ຕ້ອນຮັບ ສະຫາຍ ຫຼີ ຊູ ເຫຼີຍ ພ້ອມຄະນະຜູ້ແທນຂັ້ນສູງຂອງ ສປ ຈີນ

ໃນຕອນບ່າຍວັນທີ 9 ມັງກອນ ນີ້ ທີ່ນະຄອນຫຼວງວຽງຈັນ ກ່ອນກອງປະຊຸມສຳມະນາທິດສະດີ ລະຫວ່າງພັກປະຊາຊົນປະຕິວັດລາວ ແລະ ພັກກອມມູນິດຈີນ ຄັ້ງທີ XI ທີ່ຈັດຂຶ້ນໃນລະຫວ່າງວັນທີ 9-10 ມັງກອນ 2024 ຈະເປີດຂຶ້ນ, ສະຫາຍ ກິແກ້ວ ໄຂຄໍາພິທູນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າພົບປະຢ້ຽມຢາມຂອງ ສະຫາຍ ຫຼີ ຊູ ເຫຼີຍກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະໂຄສະນາສູນກາງພັກກອມມູນິດຈີນ ພ້ອມຄະນະ ຊຶ່ງການພົບປະຄັ້ງນີ້ ສອງຝ່າຍຕາງຍິນດີທີ່ຈະຮໍ່າຮຽນແລກປ່ຽນບົດຮຽນຊຶ່ງກັນ ແລະ ກັນ ໃນດ້ານການປົກປັກຮັກສາສິ່ງແວດລ້ອມ.
    ສະຫາຍ ກິແກ້ວ ໄຂຄໍາພິທູນ ໄດ້ກ່າວສະແດງຄວາມຕ້ອນຮັບອັນອົບອຸ່ນ ແລະ ຕີລາຄາສູງຕໍ່ ສະຫາຍ ຫຼີ ຊູ ເຫຼີຍ ພ້ອມຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສະເພາະມາເຂົ້າຮ່ວມກອງປະຊຸມສຳມະນາດັ່ງກ່າວນີ້ ຊຶ່ງເປັນການປະກອບສ່ວນສຳຄັນ ໃນການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ການພົວພັນຮ່ວມມືຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ລະຫວ່າງ ສອງພັກ ສອງລັດ ກໍຄືປະຊາຊົນສອງຊາດ ລາວ-ຈີນ ທີ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ, ຄວາມສາມັກຄີ ມິດຕະພາບອັນເປັນມູນເຊື້ອລະຫວ່າງ ສອງພັກ, ສອງລັດ ແລະ ປະຊາຊົນສອງຊາດຂອງພວກເຮົາ ໄດ້ກ້າວໄປສູ່ສະໄໝທີ່ເຫັນວ່າມີການພັດທະນາທີ່ສູງທີ່ສຸດ, ມີຄຸນນະພາບທີ່ສູງທີ່ສຸດ ນໍາເອົາຜົນປະໂຫຍດມາສູ່ປະຊາຊົນສອງຊາດຂອງພວກເຮົາ. ພັກ, ລັດ ແລະ ປະຊາຊົນລາວບັນດາເຜົ່າ ຕິດຕາມຢ່າງໃກ້ຊິດ ແລະ ຕີລາຄາສູງທີ່ສຸດ ຕໍ່ຜົນສຳເລັດທີ່ປະຊາຊົນຈີນ ກໍຄືລັດຖະບານຈີນ ຍາດມາໄດ້ພາຍໃຕ້ການນໍາພາຂອງພັກກອມມູນິດຈີນ ອັນມີ ສະຫາຍ ສີຈິ້ນຜິງເປັນແກນກາງ ແລະ ພາຍໃຕ້ແສງສະຫວ່າງຂອງມະຕິກອງປະຊຸມໃຫຍ່ ຄັ້ງທີ XX ຂອງພັກກອມມູນິດຈີນ ແລະ ມີຄວາມເຊື່ອຢ່າງໜັກແໜ້ນວ່າ ພາຍໃຕ້ການນໍາພາອັນເຂັ້ມແຂງໜັກແໜ້ນ ແລະ ສະຫຼາດສ່ອງໃສຂອງພັກກອມມູນິດຈີນ ປະຊາຊົນຈີນ ຈະຍາດໄດ້ຜົນສໍາເລັດທີ່ໃຫຍ່ຫຼວງກວ່າເກົ່າ ພາປະເທດຊາດກ້າວໄປສູ່ຄາດໝາຍ “100 ປີເຫດການທີສອງ” ຈະສາມາດບັນລຸໄດ້ຢ່າງແນ່ນອນ. ພ້ອມດຽວກັນນີ້, ສະຫາຍ ກິແກ້ວ ໄຂຄໍາພິທູນ ກໍໄດ້ແຈ້ງສະພາບການພົ້ນເດັ່ນແກ່ຝ່າຍຈີນໄດ້ຮັບຊາບ.
    ສະຫາຍ ຫຼີ ຊູ ເຫຼີຍ ກໍໄດ້ກ່າວຂອບໃຈຕໍ່ການຕ້ອນຮັບອັນອົບອຸ່ນ ແລະ ໄດ້ກ່າວຈຸດປະສົງໃຫ້ຊາບວ່າ: ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ມີຈຸດປະສົງເພື່ອຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກຳ ຈີນ-ລາວ ຊຶ່ງເດືອນຕຸລາປີກາຍນີ້ ເມື່ອ ສະຫາຍ ເລຂາທິການໃຫຍ່ ທອງລຸນ ສີສຸລິດ ໄປຢ້ຽມຢາມ ສປ ຈີນ ແລະ ເຂົ້າຮ່ວມກອງປະຊຸມສຸດຍອດ ຊຶ່ງເພິ່ນໄດ້ລົງນາມຮ່ວມກັນກັບ ສະຫາຍ ເລຂາທິການໃຫຍ່ ສີຈິ້ນຜິງ. ພ້ອມທັງສະແດງຄວາມຮູ້ສຶກປິຕິຊົມຊື່ນເປັນຢ່າງຍິ່ງ ທີ່ໄດ້ເຫັນວ່າພາຍໃຕ້ການຊີ້ນໍາ-ນໍາພາຂອງ ສອງເລຂາທິການໃຫຍ່, ສູນກາງພັກ ຈີນ ແລະ ລາວ ຊຶ່ງສາຍພົວພັນສອງພັກ, ສອງລັດ ຈີນ-ລາວ ພວມຢູ່ໃນໄລຍະດີທີ່ສຸດໃນປະຫວັດສາດ, ການຮ່ວມມືຂອງສອງຝ່າຍ ຈີນ-ລາວ ຖືວ່າທຸກຂົງເຂດລ້ວນແລ້ວແຕ່ມີຄວາມຄືບໜ້າທີ່ດີ. ພ້ອມດຽວກັນ, ກໍໄດ້ແຈ້ງຜົນການພົບປະລະຫວ່າງ ສອງຫົວໜ້າຄະນະໂຄສະນາສູນກາງພັກ ຈີນ ແລະ ລາວ ໂດຍສອງຝ່າຍໄດ້ປະສົບຜົນສຳເລັດອັນຈົບງາມ ຄືສອງຝ່າຍໄດ້ບັນລຸຄວາມຮັບຮູ້ອັນສຳຄັນຫຼາຍປະການ ແລະ ໄດ້ມີຄໍາເຫັນທີ່ເປັນເອກະພາບກັນ ກ່ຽວກັບທິດທາງການພັດທະນາການຮ່ວມມືໃນບາດກ້າວຕໍ່ໄປ. 
ນອກນີ້, ສະຫາຍ ຫຼີ ຊູ ເຫຼີຍ ກໍກ່າວວ່າ: ໃນຄວາມເຫັນທີ່ເປັນເອກະພາບອັນສຳຄັນ ລະຫວ່າງ ສະຫາຍ ສີຈິ້ນຜິງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຈີນ ແລະ ສະຫາຍ ທອງລຸນ ສີສຸລິດເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ“ການແລກປ່ຽນ ແລະ ການຮ່ວມມືໃນວຽກງານການໂຄສະນາແນວຄິດຂອງສອງພັກ, ການຮ່ວມມືທາງດ້ານວັດທະນະທໍາ, ການໄປມາຫາສູກັນລະຫວ່າງປະຊາຊົນ ແລະ ການທ່ອງທ່ຽວ ຖືວ່າແມ່ນພາກສ່ວນອັນສໍາຄັນ” ຊຶ່ງສະຫາຍກິແກ້ວ ໄຂຄຳພິທູນ ກໍຮັບຜິດຊອບວຽກງານດ້ານວັດທະນະທໍາ, ຫວັງວ່າໃນໄລຍະຕໍ່ໄປສອງຝ່າຍສາມາດຊຸກຍູ້ສົ່ງເສີມການແລກປ່ຽນ ແລະ ການຮ່ວມມືທາງດ້ານວັດທະນະທໍາ, ການໄປມາຫາສູກັນລະຫວ່າງປະຊາຊົນ ໄດ້ຮັບການພັດທະນາ ນັບມື້ເຂົ້າສູ່ລວງເລິກ ແລະ ກວ້າງຂວາງກວ່າເກົ່າ. ສຳລັບກອງປະຊຸມສໍາມະນາທິດສະດີ ລະຫວ່າງສອງພັກເຮົາ ກໍໄດ້ຈັດຂຶ້ນຢ່າງສຳເລັດຜົນໃນ X ຄັ້ງຜ່ານມາ ຊຶ່ງທຸກຄັ້ງແມ່ນສຸມໃສ່ບັນຫາ ທີ່ສອງຝ່າຍຕາງມີຄວາມສົນໃຈນໍາກັນ, ການແລກປ່ຽນບົດຮຽນໃນກອງປະຊຸມແຕ່ລະຄັ້ງ ກໍລ້ວນແລ້ວແຕ່ມີຄວາມເລິກເຊິ່ງ ແລະ ປະສົບຜົນສຳເລັດອັນສວຍງາມ, ການຈັດກອງປະຊຸມດັ່ງກ່າວ ໃນຄັ້ງທີ XI ກໍຈະປະສົບຜົນສຳເລັດທີ່ສວຍງາມຄືເກົ່າ.
    ໃນຕອນທ້າຍ, ສະຫາຍ ກິແກ້ວ ໄຂຄໍາພິທູນ ກໍໄດ້ກ່າວວ່າ: ພັກກອມມູນິດຈີນ ໂດຍສະເພາະ ສະຫາຍ ສີຈິ້ນຜິງ ເລຂາທິການໃຫຍ່ ໄດ້ໃຫ້ຄວາມສຳຄັນ ແລະ ຊີ້ນໍາໂດຍກົງ ຕໍ່ວຽກງານການປົກປັກຮັກສາລະບົບນິເວດ ແລະ ສິ່ງແວດລ້ອມ ທີ່ເປັນຫົວຂໍ້ໃຫຍ່ ຫົວຂໍ້ທີ່ສຳຄັນຂອງກອງປະຊຸມສຳມະນາຂອງສອງພັກໃນຄັ້ງນີ້, ຝ່າຍຈີນ ໄດ້ມີບົດຮຽນອັນໃຫຍ່ຫຼວງ ແລະ ມີຜົນສຳເລັດຫຼາຍດ້ານ ຊຶ່ງຫວັງຢ່າງຍິ່ງວ່າ ໃນກອງປະຊຸມເທື່ອນີ້ ບັນດາສະຫາຍຈະປິແບ່ງບົດຮຽນປະສົບປະການ ກໍຄືທັດສະນະແນວຄວາມຄິດຕ່າງໆ ເພື່ອໃຫ້ລາວເຮົາ ໄດ້ຮໍ່າຮຽນແລກປ່ຽນກັບບັນດາສະຫາຍ. ຄຽງຄູ່ກັນ, ສະຫາຍ ຫຼີ ຊູ ເຫຼີຍ ກໍໄດ້ກ່າວ່າ: ຝ່າຍຈີນຍິນດີຮໍ່າຮຽນ ຖອດຖອນບົດຮຽນນໍາຝ່າຍລາວ ໃນດ້ານການປົກປັກຮັກສາສິ່ງແວດລ້ອມ.
(ຂ່າວ-ພາບ: ສຸກສະຫວັນ)