ໄດ້ພົບປະກັບ ສະຫາຍ ເອັສເຕບານ ລາໂຊ ເຮີນານເດສ ກຳມະການກົມການເມືືອງສູນກາງພັກກອມມູນິດກູບາ ປະທານສະພາແຫ່ງຊາດອຳນາດປະຊາຊົນ ແຫ່ງ ສ ກູບາ ເນື່ອງໃນໂອກາດທີ່ສະຫາຍ ພ້ອມຄະນະເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມພິທີສະເຫຼີມສະຫຼອງ ຄົບຮອບ 50 ປີ ແຫ່ງການສ້າງສາຍພົວພັນການທູດ ລະຫວ່າງ ສປປ ລາວ ແລະ ສ ກູບາ ໃນລະຫວ່າງວັນທີ 3-6 ພະຈິກ 2024 ນີ້.
ການພົບປະຄັ້ງນີ້, ສະຫາຍ ສອນໄຊ ສີພັນດອນ ໄດ້ມີຄວາມປິຕິຍິນດີ ແລະ ຮູ້ສຶກເປັນກຽດຢ່າງສູງ ທີ່ໄດ້ຕ້ອນຮັບ ສະຫາຍ ເອັສເຕບານ ລາໂຊ ເຮີນານເດສ ພ້ອມຄະນະ ແລະ ໄດ້ສະແດງຄວາມຊົມເຊີຍຕໍ່ສະຫາຍ ທີ່ໄດ້ຮັບເລືອກຕັ້ງເປັນປະທານສະພາແຫ່ງຊາດອໍານາດປະຊາຊົນ ແຫ່ງ ສ ກູບາ ອີກເທື່ອໜຶ່ງ ໃນເດືອນເມສາ 2023 ຊຶ່ງສະແດງເຖິງຄວາມໄວ້ເນື້ອເຊື່ອໃຈ ຈາກພັກ, ລັດຖະບານ ແລະ ປະຊາຊົນ ສ ກູບາ ໃນການສືບຕໍ່ຮັບໜ້າທີ່ອັນສູງສົ່ງ ແລະ ມີກຽດສະຫງ່າໃນເທື່ອນີ້; ພ້ອມດຽວກັນ, ກໍໄດ້ຕີລາຄາສູງຕໍ່ການມາຢ້ຽມຢາມທາງການ ແລະ ເຂົ້າຮ່ວມສະເຫຼີມສະຫຼອງການສ້າງຕັ້ງສາຍພົວພັນການທູດ ຄົບຮອບ 50 ປີ ຊຶ່ງເປັນການປະກອບສ່ວນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອອັນດີງາມມາແຕ່ດົນນານບົນພື້ນຖານອຸດົມການສັງຄົມນິຍົມ ລະຫວ່າງ ສອງພັກ, ສອງລັດ ແລະ ປະຊາຊົນ ລາວ-ກູບາ ໃຫ້ແຕກດອກອອກຜົນຍິ່ງຂຶ້ນ. ພ້ອມທັງຕີລາຄາສູງ ທີ່ບັນດາສະຫາຍ ໄດ້ຢືນຢູ່ຄຽງຂ້າງ ແລະ ໃຫ້ກຳລັງໃຈແກ່ ສປປ ລາວ ໃນການເປັນເຈົ້າພາບດຳເນີນກອງປະຊຸມສຸດຍອດອາຊຽນ ຄັ້ງທີ 44, 45 ແລະ ກອງປະຊຸມສຸດຍອດກ່ຽວຂ້ອງ. ສະຫາຍ ນາຍົກລັດຖະມົນຕີ ແຫ່ງ ສປປ ລາວ ຍັງໄດ້ຝາກຄວາມຢື້ຢາມຖາມຂ່າວອັນອົບອຸ່ນ ແລະ ອວຍພອນໄຊອັນປະເສີດຜ່ານສະຫາຍ ໄປຍັງ ສະຫາຍ ມານູເອວ ມາເຣໂຣ ຄຣູດສ ກຳມະການກົມການເມືອງສູນກາງພັກກອມມູນິດກູບາ ນາຍົກລັດຖະມົນຕີ ແຫ່ງ ສ ກູບາ ມານະໂອກາດນີ້ດ້ວຍ.
ສະຫາຍ ເອັສເຕບານ ລາໂຊ ເຮີນານເດສ ກໍໄດ້ສະແດງຄວາມຂອບໃຈທີ່ ສະຫາຍ ສອນໄຊ ສີພັນດອນ ໄດ້ໃຫ້ການຕ້ອນຮັບ ສະຫຼະເວລາເພື່ອພົບປະກັນຄັ້ງນີ້; ພ້ອມທັງໄດ້ແຈ້ງກ່ຽວກັບການມາຢ້ຽມຢາມ ສປປ ລາວ ຢ່າງເປັນທາງການ ແລະ ແຈ້ງກ່ຽວກັບຜົນການພົບປະສອງຝ່າຍຂອງສອງສະພາແຫ່ງຊາດ ໂດຍສະເພາະການເສີມຂະຫຍາຍການຮ່ວມມື ທີ່ໄດ້ລົງນາມໃນບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດອຳນາດປະຊາຊົນ ແຫ່ງ ສ ກູບາ ສະບັບໃໝ່.
ສະຫາຍ ສອນໄຊ ສີພັນດອນ ຍັງກ່າວວ່າ: ລັດຖະບານລາວ ຍິນດີທີ່ສະໜັບສະໜູນ ສອງສະພາແຫ່ຊາດລາວ-ກູບາ ໃນການສືບຕໍ່ຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ໂດຍສະເພາະສືບຕໍ່ແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆນໍາກັນ, ການປະຕິບັດພາລະບົດບາດຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດບັນດາສົນທິສັນຍາ, ສັນຍາ ແລະ ຂໍ້ຕົກລົງຕ່າງໆ ທີ່ສອງລັດຖະບານ ໄດ້ລົງນາມຮ່ວມກັນນັ້ນ ໃຫ້ເປັນຮູບປະທໍາຍິ່ງຂຶ້ນ. ພ້ອມນີ້, ກໍໄດ້ອວຍພອນໃຫ້ການມາຢ້ຽມຢາມທາງການ ແລະ ເຂົ້າຮ່ວມການສະເຫຼີມສະຫຼອງການສ້າງຕັ້ງສາຍພົວພັນການທູດ ສປປ ລາວ ແລະ ສ ກູບາ ຄົບຮອບ 50 ປີ ຈົ່ງປະສົບຜົນສຳເລັດຢ່າງຈົບງາມ.
(ຂ່າວ-ພາບ: ສຸກສະຫວັນ)
ຄໍາເຫັນ