ເມືອງຕະໂອ້ຍ ແລະ ເມືອງສະໝ້ວຍ, ໃນວັນທີ 6 ພຶດສະພາຜ່ານມາ, ພາຍໃຕ້ການເປັນປະທານຂອງ ສະຫາຍ ປະເດີມພອນ ສົນທະນີ ຮອງເລຂາພັກແຂວງ ຮອງເຈົ້າແຂວງສາລະວັນ, ຜູ້ຊີ້ນຳອະນຸກໍາມະການເນື້ອໃນ ແລະ ກອງເລຂາຂັ້ນແຂວງ.
ສະຫາຍ ປະເດີມພອນ ສົນທະນີ ໄດ້ກ່າວໃຫ້ຮູ້ວ່າ: ການສຳມະນາຄັ້ງນີ້, ມີຄວາມສຳຄັນທີ່ສຸດແນໃສ່ຄົ້ນຄວ້າທາງດ້ານເນື້ອໃນ ເພື່ອໃຫ້ມີເນື້ອໃນທີ່ເລິກເຊິ່ງ, ຄົບຖ້ວນ, ຖືກຕ້ອງສອດຄ່ອງ ຢ່າງພາວະວິໃສ ແລະ ເພື່ອເຮັດໃຫ້ກຳນົດທິດທາງໄປໃນລວງດຽວກັນ, ນັບແຕ່ຂັ້ນຮາກຖານບ້ານ, ເມືອງໃຫ້ຖືກທິດ, ມີລັກສະນະວິທະຍາສາດ ໂດຍສະເພາະການກໍານົດແນວທາງການເມືອງ, ການພັດທະນາເສດຖະກິດ-ສັງຄົມແຂວງ ໃນໄລຍະ 5 ປີຕໍ່ໜ້າ, ຖືເປັນເນື້ອໃນພື້ນຖານເພື່ອໃຫ້ອະນຸກຳມະການເນື້ອໃນນໍາໄປຄົ້ນຄວ້າ, ປັບປຸງ ໃຫ້ແທດເໝາະກັບສະພາບຄວາມເປັນຈິງຂອງແຂວງສາລະວັນ.
ສະຫາຍ ສົມໃຈ ອຸ່ນຈິດ ຮອງເຈົ້າແຂວງ ຫົວໜ້າອະນຸກຳມະການເນື້ອໃນຂັ້ນແຂວງໄດ້ຜ່ານຮ່າງລາຍງານການເມືອງໂດຍສັງເຂບ ຊຶ່ງຍົກໃຫ້ເຫັນເຖິງການຈັດຕັ້ງປະຕິບັດມະຕິ IX ຂອງອົງຄະນະພັກແຂວງ, ຜົນສຳເລັດຫຼາຍດ້ານໃນການຊີ້ນຳໆພາໃນໄລຍະ 5 ປີຜ່ານມາ, ຕີລາຄາດ້ານຕັ້ງໜ້າ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ການກຳນົດຈຸດສຸມ, ທິດທາງໃນຕໍ່ໜ້າ, ທັງໄດ້ສະເໝີດ້ານເນື້ອໃນຄຳຂວັນຂອງການດຳເນີນກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ. ໂຄງສ້າງຂອງຮ່າງບົດລາຍງານການເມືອງ, ດ້ານເນື້ອໃນລາຍລະອຽດໃນແຕ່ລະຂົງເຂດວຽກງານ, ທັງໄດ້ຊີ້ໃຫ້ເຫັນເຖີງການນຳພາ-ຊີ້ນຳຂອງຄະນະພັກ ໃນສະໄໝທີ IX ໂດຍສະເພາະວຽກງານທີ່ມີຄວາມພົ້ນເດັ່ນ ເປັນຕົ້ນ: ວຽກງານປ້ອງກັນຊາດ-ປ້ອງກັນຄວາມສະຫງົບ, ດ້ານເສດຖະກິດ, ບ້ານວັດທະນະທຳ-ສັງຄົມ, ວຽກບູລະນະກົງຈັກລັດ ແລະ ອົງການປົກຄອງ, ວຽກງານແນວລາວສ້າງຊາດ-ອົງການຈັດຕັ້ງມະຫາຊົນ, ການຕ່າງປະເທດ ແລະ ວຽກງານການກໍ່ສ້າງຮາກຖານການເມືອງ, ພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານ 3 ສ້າງ. ທັງໄດ້ມີການຜ່ານຮ່າງແຜນພັດທະນາເສດຖະກິດ-ສັງຄົມຂອງແຂວງ ໄດ້ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ, ຄັ້ງທີ IX. ຈາກນັ້ນ, ຜູ້ເຂົ້າຮ່ວມກໍໄດ້ປະກອບຄຳຄິດເຫັນໃສ່ຮ່າງເນື້ອໃນທັງສອງບົດຢ່າງກົງໄປກົງມາ ມີເນື້ອໃນທີ່ສອດຄ່ອງກັບການຊີ້ນຳໆພາ, ການກໍານົດແນວທາງການເມືອງ, ການພັດທະນາເສດຖະກິດ-ສັງຄົມຂອງທັງສອງເມືອງ ຕິດພັນກັບການກໍານົດທິດທາງແຜນການ, ຈຸດສຸມຂອງແຂວງ.
(ຂ່າວ-ພາບ: ວິໄລວອນ ສິດທິໄຊ)
ຄໍາເຫັນ