 |
ສະຫາຍ ດາວວົງ ພອນແກ້ວ ກ່າວໄຂກອງປະຊຸມວ່າ: ເພື່ອຕີລາຄາຄືນຜົນຂອງການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ໃນໄລຍະ 5 ປີຜ່ານມາ, ຍົກໃຫ້ເຫັນດ້ານຕັ້ງໜ້າ ທີ່ຕ້ອງເອົາໃຈໃສ່ເສີມຂະຫຍາຍ ແລະ ບັນດາຂໍ້ຄົງຄ້າງ, ປະກົດການຫຍໍ້ທໍ້ຕ່າງໆ ທີ່ຍັງເປັນອຸປະສັກ, ສິ່ງທ້າທາຍຕ່າງໆ, ໄດ້ຄົ້ນຄວ້າລົງເລິກໃສ່ເນື້ອໃນທີ່ສໍາຄັນເປັນຕົ້ນ: ຕີລາຄາສະພາບການໂດຍລວມ, ການກໍ່ສ້າງກຳລັງ, ການແກ້ໄຂບັນຫາປະກົດການຫຍໍ້ທໍ້ຂອງສັງຄົມ ແລະ ແຜນດໍາເນີນງານວຽກງານ ປກຊ-ປກສ ໄລຍະ 5 ປີຕໍ່ໜ້າ, ພ້ອມທັງສຸມໃສ່ຄົ້ນຄວ້າເຖີງບັນຫາສາເຫດ ແລະ ບັນຫາປະກົດການຫຍໍ້ທໍ້ ເຊັ່ນ: ບັນຫາຂີ້ລັກງັດແງະ, ອຸບັດເຫດຕາມທ້ອງຖະໜົນ, ບັນຫາຢາເສບຕິດ ຢ່າງລະອຽດ, ຖີ່ຖ້ວນ, ພາວະວິໄສ ເພື່ອວາງຄາດໝາຍສູ້ຊົນໃນໄລຍະ 5 ປີຕໍ່ໜ້າ, ວາງແຜນການຢ່າງລະອຽດ, ຮັດກຸມ, ຮອບດ້ານ, ແທດເໝາະກັບສະພາບຄວາມເປັນຈິງຂອງແຂວງ ແນໃສ່ເຮັດໃຫ້ການດຳເນີນກອງປະຊຸມຄັ້ງນີ້ ໄດ້ຮັບໝາກຜົນ ແລະ ຮອງຮັບໃຫ້ແກ່ການຈັດຕັ້ງປະຕິບັດວຽກງານ ຢ່າງມີປະສິດທິພາບ ຮັບປະກັນໃຫ້ແຂວງສາລະວັນ, ມີສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມ ມີຄວາມສະຫງົບ ແລະ ເປັນລະບຽບຮຽບຮ້ອຍ.
 |
ສະຫາຍ ພົ.ວ ສີເສີດ ສອນດາລາ ຫົວໜ້າກອງບັນຊາການ ປກສ ແຂວງຮອງປະທານປ້ອງກັນຊາດ-ປ້ອງກັນຄວາມສະຫງົບຂັ້ນແຂວງ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານ ປກສ-ປກຊ ໄລຍະ 5 ປີຜ່ານມາ, ໄດ້ຍົກໃຫ້ເຫັນຜົນສຳເລັດທີ່ພົ້ນເດັ່ນຫຼາຍດ້ານ ເປັນຕົ້ນ: ໄດ້ຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ລົງສູ່ຮາກຖານ ສອດຫ້ອຍເຂົ້າໃນຂະແໜງການ-ທ້ອງຖິ່ນ ໄດ້ທັງໝົດ 8 ເມືອງ 42 ຂະແໜງການ 578 ບ້ານ, ປະຕິບັດຫຼັກສູດການຮຽນ-ການສອນວິຊາສຶກສາປ້ອງກັນຊາດເຂົ້າໃນບັນດາໂຮງຮຽນຂັ້ນຕ່າງໆ, ສ້າງບ້ານປ້ອງກັນຊາດເຂັ້ມແຂງໄດ້ 462 ບ້ານ ທຽບໃສ່ 2020 ເພີ່ມຂຶ້ນ 372 ບ້ານ, ບ້ານປ້ອງກັນຄວາມສະຫງົບດີ 517 ບ້ານ ທຽບໃສ່ 2020 ເພີ່ມຂຶ້ນ 256 ບ້ານ, ປະກາດ 4 ເມືອງເປັນເມືອງປ້ອງກັນຊາດເຂັ້ມແຂງ ແລະປ້ອງກັນຄວາມສະຫງົບດີ ແລະ ອີກ 1 ເມືອງ ຄືເມືອງວາປີ ຈະໄດ້ປະກາດໃນທ້າຍປີນີ້, ເອົາໃຈໃສ່ຮັກສາຄວາມສະຫງົບຄວາມເປັນລະບຽບຮຽບຮ້ອຍຕາມບໍລິເວນຊາຍແດນ, ປ້ອງກັນ-ສະກັດກັ້ນ ແລະ ແກ້ໄຂບັນຫາຢາເສບຕິດ, ມ້າງຄະດີຢາເສບຕິດໄດ້ 786 ເລື່ອງ, ຢຶດຢາບ້າ 2 ລ້ານກວ່າເມັດ, ຢາໄອສ 500 ກວ່າກິໂລ ແລະວັດຖຸປະເພດອື່ນໆ. ປັບປຸງ ແລະ ກໍ່ສ້າງກໍາລັງທາງດ້ານການເມືອງ-ແນວຄິດ, ສິນລະປະຍຸດ, ຍຸດທະວິທີ ແລະ ວິຊາສະເພາະ ໃຫ້ກໍາລັງແຕ່ລະຂັ້ນ, ປັບປຸງລະບຽບແບບແຜນຕາມ 7 ລະບອບ 18 ວຽກ, ປະຕິບັດນະໂຍບາຍປະກັນສັງຄົມ, ບຳລຸງສ້າງພະນັກງານດ້ານທິດສະດີ, ວິຊາສະເພາະ ເລື່ອນຊັ້ນ-ເລື່ອນຂັ້ນ ແລະ ຍ້ອງຍໍ ໃຫ້ກໍາລັງໃນຂັ້ນຕ່າງໆຢ່າງເໝາະສົມ ແລະວຽກງານອື່ນໆທີ່ປິ່ນອ້ອມກໍໄດ້ຮັບການຈັດຕັ້ງປະຕິບັດຢ່າງເຂັ້ມງວດ ແລະ ມີຜົນສໍາເລັດ.
(ພາບ-ຂ່າວ: ທິດລານີ ໂຄດໂຍທາ)
ຄໍາເຫັນ