 |
ໃນພິທີ, ທ່ານ ນາງ ດາລາວອນ ກິດຕິພັນ ກ່າວວ່າ: ໃນຍຸກສະໄໝແຫ່ງການປ່ຽນແປງທາງເຕັກ ໂນໂລຊີດີຈີຕອນທີ່ວ່ອງໄວ, ການຮູ້ໜັງສືບໍ່ໄດ້ໝາຍເຖິງພຽງແຕ່ການອ່ານອອກຂຽນໄດ້ເທົ່ານັ້ນ, ແຕ່ ມັນໄດ້ກາຍເປັນທັກສະທີ່ສຳຄັນໃນການດຳລົງຊີວິດ, ການຮຽນຮູ້ຕະຫຼອດຊີວິດ ແລະ ການປະກອບອາ ຊີບ. ການຮູ້ທັກສະດີຈີຕອນຈຶ່ງເປັນກະແຈສຳຄັນໃນການເຂົ້າເຖິງຂໍ້ມູນຂ່າວສານ, ການສື່ສານ ແລະ ການເຂົ້າຮ່ວມໃນເສດຖະກິດດີຈີຕອນ. ຖ້າປາສະຈາກທັກສະດັ່ງກ່າວ, ພວກເຂົາຈະຖືກປະໄວ້ຂ້າງຫຼັງ ແລະ ບໍ່ສາມາດ ກ້າວທັນກັບໂລກທີ່ກຳລັງປ່ຽນແປງຢ່າງວ່ອງໄວໄດ້, ອີງຕາມບົດລາຍງານຂອງອົງການ ອຸຍແນັດໂກ ໃນປີ 2023, ມີເດັກນ້ອຍ ແລະ ໄວໝຸ່ມ 272 ລ້ານຄົນໄດ້ປະລະການຮຽນໃນທົ່ວໂລກ, ເດັກນ້ອຍ 4 ໃນ 10 ຄົນ ບໍ່ມີຄວາມສາມາດດ້ານການອ່ານ, ໄວໝຸ່ມ ແລະ ຜູ້ໃຫຍ່ຈຳນວນ 739 ລ້ານຄົນ ຍັງຂາດທັກສະການຮູ້ໜັງສືຂັ້ນພື້ນຖານໃນປີ 2024, ສຳລັບ ສປປ ລາວ ພວກເຮົາກໍຍັງປະ ເຊີນກັບບັນຫາທີ່ທ້າທາຍຫຼາຍຢ່າງ, ອີງຕາມຂໍ້ມູນຂອງສູນສະຖິຕິການສຶກສາ ແລະ ກິລາ ມີເດັກ ນ້ອຍທີ່ຢູ່ນອກໂຮງຮຽນໃນເກນຮຽນປະຖົມ ແລະ ມັດທະຍົມສຶກສາ ຈຳນວນ 583,321 ຄົນ ໃນປີ 2024, ບົດລາຍງານ SEA-PLM ປີ 2019 ເຫັນວ່າຜົນການຮຽນຮູ້ ຫຼື ທັກສະດ້ານການອ່ານ ແລະ ຄິດໄລ່ເລກຂອງນັກຮຽນ ປ.5 ແມ່ນຢູ່ໃນລະດັບຕໍ່າຫຼາຍ.
ທ່ານກ່າວຕື່ມວ່າ: ບັນຫາດັ່ງກ່າວບໍ່ພຽງແຕ່ສົ່ງຜົນກະທົບຕໍ່ເດັກນ້ອຍເທົ່ານັ້ນ, ແຕ່ຍັງເປັນການກີດ ຂວາງການພັດທະນາປະເທດຊາດໃນໄລຍະຍາວອີກດ້ວຍ. ສະນັ້ນພວກເຮົາທຸກຄົນຈະຕ້ອງໄດ້ເອົາໃຈໃສ່ ແລະ ຮ່ວມມືກັນແກ້ໄຂບັນຫານີ້ຢ່າງຮີບດ່ວນ ແລະ ແຂງແຮງກວ່າເກົ່າ. ເປັນຕົ້ນການເກັບກຳຂໍ້ມູນເດັກ ນອກ ໂຮງຮຽນພວກເຮົາຕ້ອງສ້າງກົນໄກການເກັບກຳຂໍ້ມູນທີ່ລະອຽດ ແລະ ເປັນລະບົບເພື່ອໃຫ້ຮູ້ຈຳນວນ ທີ່ແນ່ ນອນຂອງເດັກທີ່ຢູ່ນອກໂຮງຮຽນ, ເດັກປະລະການຮຽນ, ລວມທັງສາເຫດ ແລະ ສະຖານທີ່ຢູ່ອາໄສຂອງພວກ ເຂົາ ຊຶ່ງຈະຊ່ວຍໃຫ້ເຮົາສາມາດສ້າງແຜນງານທີ່ເໝາະສົມໃນການແກ້ໄຂໄລ ຍະຍາວ, ການປ້ອງກັນເດັກທີ່ມີຄວາມສ່ຽງບໍ່ໃຫ້ອອກໂຮງຮຽນ, ຕ້ອງສ້າງລະບົບການຊ່ວຍເຫຼືອເດັກນ້ອຍ ທີ່ມີຄວາມສ່ຽງທີ່ຈະອອກໂຮງຮຽນ, ໂດຍສະເພາະເດັກທີ່ມາຈາກຄອບຄົວທີ່ທຸກຍາກ, ຊົນເຜົ່າ ຫຼື ຢູ່ເຂດ ຫ່າງໄກສອກຫຼີ. ດ້ວຍການສະໜັບສະ ໜູນທຶນການສຶກສາ, ອາຫານທ່ຽງ ແລະ ສ້າງກົນໄກໃນການ ປຶກສາຫາລືກັບຄອບຄົວເພື່ອຊ່ວຍໃຫ້ເດັກບໍ່ໃຫ້ ອອກໂຮງຮຽນ ແລະ ສ້າງໂອກາດໃຫ້ເດັກທີ່ຢູ່ນອກໂຮງ ຮຽນໄດ້ກັບຄືນມາຮຽນ, ທຸກພາກສ່ວນສຶກສາ, ວິທະຍາສາດ ແລະ ກິລາ ຈົ່ງພ້ອມກັນຮ່ວມມືກັບກົມ ການສຶກສານອກໂຮງຮຽນໃນການສ້າງແຜນດຳເນີນງານ, ເຮັດ ໃຫ້ອົງກອນຂອງພວກເຮົາກາຍເປັນ ອົງກອນແຫ່ງການຮຽນຮູ້ຕະຫຼອດຊີວິດ ຫຼື ອົງກອນແຫ່ງການຮຽນຮູ້ ເພື່ອກ້າວໄປສູ່ການສ້າງສັງຄົມເຮົາ ໃຫ້ກາຍເປັນສັງຄົມແຫ່ງການຮຽນຮູ້ໃນຕໍ່ໜ້າ ໃນນັ້ນ, ທຸກພາກສ່ວນ ຂອງສັງຄົມ, ໂດຍສະເພາະຄອບ ຄົວ, ຊຸມຊົນ, ພາກທຸລະກິດ, ອົງການຈັດຕັ້ງທາງສັງຄົມ ແລະ ຄູ່ຮ່ວມ ພັດທະນາ ຈົ່ງໄດ້ຮ່ວມກັນປະ ກອບສ່ວນໃຫ້ຄຳແນະນຳ ແລະ ຊຸກຍູ້ລູກຫຼານໃຫ້ເຫັນຄວາມສຳຄັນຂອງ ການຮຽນ, ຈັດກິດຈະກຳ ການຮຽນຮູ້ໃນຊຸມຊົນ, ບໍລິຈາກອຸປະກອນການຮຽນ, ໂດຍສະເພາະເຄື່ອງມືດີຈີ ຕອນ ແລະ ຊ່ວຍສະ ໜອງພື້ນຖານໂຄງລ່າງດີຈີຕອນໃຫ້ສະຖານການສຶກສາ.
 |
ໃນໂອກາດດັ່ງກ່າວຜູ້ເຂົ້າຮ່ວມຍັງໄດ້ຮັບຟັງການເຜີຍແຜ່ຄວາມສຳຄັນຂອງການຮູ້ໜັງສື, ການສ້າງສັງຄົມແຫ່ງການຮຽນຮູ້ ແລະ ຜັນຂະຫຍາຍດຳລັດວ່າດ້ວຍການຮຽນຮູ້ຕະຫຼອດຊີວິດ, ໃນນັ້ນຍັງໄດ້ມີກິດຈະກຳຍ່າງເພື່ອສຸຂະພາບຕ້ອນຮັບວັນວັນສາກົນແຫ່ງການຮູ້ໜັງສືຄົບຮອບ 59 ປີ ຕື່ມອີກ.
(ຂ່າວ-ພາບ: ຍຸພິນທອງ)
ຄໍາເຫັນ