ຜ່ານມາ ທີ່ສະຖາບັນເຕັກໂນໂລຊີສື່ສານ ແລະ ຂໍ້ມູນຂ່າວສານ.
ເປັນກຽດໃນພິທີ, ມີ ທ່ານ ໄຊລືຊາ ອິນສີຊຽງໃໝ່ ຮອງລັດຖະມົນຕີກະຊວງເຕັກໂນໂລຊີ ແລະ ການສື່ ສານ, ມີບັນດາທ່ານຫົວໜ້າ, ຮອງຫ້ອງການ, ກົມ, ອົງການ, ສູນ, ສະຖາບັນ, ທ່ານຜູ້ອຳນວຍການ ບໍລິສັດຜູ້ປະກອບການໄປສະນີ ພ້ອມແຂກຖືກເຊີນ.
ໃນພິທີ, ທ່ານ ສຸລິຍາ ຄຳບູຣາວົງ ຫົວໜ້າກົມໄປສະນີ ກ່າວເປີດໃນພິທີສະເຫຼີມສະຫຼອງວັນໄປສະນີໂລກ ຄົບຮອບ 150 ປີ (9 ຕຸລາ 1874 - 9 ຕຸລາ 2024) ພາຍໃຕ້ຄຳຂັວນ “150 ປີແຫ່ງການເປີດນຳໃຊ້ການສື່ສານ ແລະ ການເສີມສ້າງຄວາມເຂັ້ມແຂງແກ່ປວງຊົນ ໃນທົ່ວໂລກ” “150 years of enabling the Communication and empowering the peoples across nations”.
ຈຸດປະສົງຂອງພິທີໃນມື້ນີ້ ແມ່ນເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ 2 ຂອງໜ່ວຍພັກກົມໄປສະນີ ແລະ ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ 3 ຂອງອົງຄະນະພັກກະຊວງເຕັກໂນໂລຊີ ແລະ ການສື່ສານ ທີ່ຈະມາເຖິງໃນມໍ່ໆນີ້. ທ່ານໄດ້ກ່າວອີກວ່າ: ສະຫະພາບ ໄປສະນີ ສາກົນ ໄດ້ກຳນົດເອົາວັນທີ 9 ຕຸລາ ເປັນວັນໄປສະນີໂລກ ຊຶ່ງໃນແຕ່ລະປີ ບັນດາປະເທດສະມາຊິກ ໄດ້ມີການສະເຫຼີມສະຫຼອງວັນສຳຄັນດັ່ງກ່າວ ຢ່າງເປັນຂະບວນຟົດຟື້ນ ເພື່ອລະນຶກເຖິງ ວັນສ້າງຕັ້ງສະຫະພາບໄປສະນີສາກົນ ໃນປີ 1874. ສຳລັບ ສປປ ລາວ ໃນປິ 2024 ນີ້ ກົມໄປສະນີ ຮ່ວມກັບບັນດາຜູ້ປະກອບການໄປສະນີ ທັງພາກລັດ ແລະ ເອກະຊົນ ໄດ້ພ້ອມກັນຈັດພິທີສະເຫຼີມສະຫຼອງ ວັນສຳຄັນດັ່ງກ່າວຂຶ້ນ ດ້ວຍຮູບການ ປາຖະກະຖາ ແລະ ຈັດກິດຈະກຳຕ່າງໆ ການສະເຫຼີມສະຫຼອງຄັ້ງນີ້ ບັນດາທ່ານທີ່ເຂົ້າຮ່ວມ ຈະໄດ້ຮັບຮູ້ເຖິງປະຫວັດຄວາມເປັນມາຂອງວັນໄປສະນີໂລກ ແລະ ສະພາບການພັດທະນາຂະແໜງການໄປສະນີ ພ້ອມທັງໄດ້ຮັບຊົມ ວິດີໂອ ຖະແຫຼງການ ຂອງທ່ານ ມາຊາຮີໂກະ ເມໂຕກິ Masahiko METOKI ເລຂາທິການໃຫຍ່ສະຫະພາບໄປສະນີສາກົນ, ສະພາບການພັດທະນາ ແລະ ການຮ່ວມມື, ການຫັນເປັນດີຈີຕອນ ຂອງບັນດາຜູ້ປະກອບການໄປສະນີ ທັງພາກລັດ ແລະ ເອກະຊົນ. ປີນີ້ ເປັນປີທີ 55 ຂອງການສະເຫຼີມສະຫຼອງວັນໄປສະນີໂລກ ລວມທັງການສະເຫຼີມສະຫຼອງການສ້າງຕັ້ງສະຫະພາບໄປສະນີສາກົນ ຄົບຮອບ 150 ປີ ສະຫະພາບໄປສະນີສາກົນ ໄດ້ມີການຈັດກິດຈະກໍາທີ່ຍິ່ງໃຫຍ່, ຫຼາຍປະເທດສະມາຊິກ ກໍໄດ້ຈັດງານສະເຫຼີມສະຫຼອງດ້ວຍຫຼາຍຮູບແບບ ເຊັ່ນ: ການສໍາມະນາປາຖະກະຖາ, ການວາງສະແດງຜະລິດຕະພັນໄປສະນີ, ການຜະລິດສະແຕມຊຸດພິເສດ, ການເປີດຜະລິດຕະພັນໃໝ່ ລວມທັງການຫຼຸດລາຄາພິເສດໃນການບໍລິການ ແລະ ສົ່ງຈົດໝາຍພາຍໃນປະເທດໂດຍບໍ່ເສຍຄ່າ.
ໃນໂອກາດດັ່ງກ່າວ, ທ່ານ ໄຊລືຊາ ອິນສີຊຽງໃໝ່ ໄດ້ມີຄໍາເຫັນໂອ້ລົມ ວ່າ: ຂະແໜງການໄປສະນີ ຕ້ອງໄດ້ສຸມໃສ່ປັບປຸງບາງວຽກງານ ຄື: ຕ້ອງມີການປັບປຸງ ແລະ ພັດທະນາບັນດານິຕິກໍາຂະແໜງການໄປສະນີ ເປັນຕົ້ນກົດໝາຍວ່າດ້ວຍໄປສະນີ, ສ້າງ ແລະ ປັບປຸງບັນດາຂໍ້ຕົກລົງຕ່າງໆໃຫ້ສອດຄ່ອງ ແລະ ເໝາະສົມໃນສະພາບປັດຈຸບັນ, ເພື່ອຈະເປັນກຳລັງແຮງໃນການພັດທະນາ ແລະ ຄຸ້ມຄອງວຽກງານໄປສະນີໃນຕໍ່ໜ້າ, ສ້າງ ແລະ ພັດທະນາໂຄງລ່າງພື້ນຖານດ້ານໄປສະນີ ດ້ວຍການຫັນເປັນດີຈີຕອນ ເຊັ່ນ: ພັດທະນາລະຫັດໄປສະນີຫັນເປັນດີຈີຕອນ, ສ້າງສູນກວດກາເຄື່ອງຝາກໄປສະນີລະຫວ່າງປະເທດ, ຕ້ອງພັດທະນາຊັບພະຍາກອນມະນຸດດ້ານໄປສະນີ ແນໃສ່ການສ້າງຕັ້ງສູນຝຶກອົບຮົມເພື່ອເພີ່ມຄວາມຮູ້ ແລະ ຄວາມສາມາດຂອງພະນັກງານໄປສະນີລາວ ປະກອບສ່ວນເຂົ້າໃນການພັດທະນາເສດຖະກິດຂອງລາວ ໂດຍການເພີ່ມຄວາມສາມາດໃນການໃຫ້ບໍລິການດ້ານໄປສະນີທີ່ມີຄຸນນະພາບ ແລະ ຮ່ວມກັບບັນດາສະຖາບັນການສຶກສາໃນການສ້າງກິດຈະກຳຕ່າງໆ ເພື່ອໃຫ້ເຍົາວະຊົນ ແລະ ຊາວໜຸ່ມລາວຮັບຮູ້ ແລະ ເຂົ້າໃຈກ່ຽວກັບວຽກງານໄປສະນີ, ຕ້ອງມີການພັດທະນາຜະລິດຕະພັນ ແລະ ການບໍລິການດ້ານໄປສະນີ ເພື່ອຫັນໄປສູ່ການບໍລິການແບບດີຈີຕອນ ເຊັ່ນ: ສ້າງລະບົບມາດຕະຖານການຄຸ້ມຄອງຜູ້ປະກອບການໄປສະນີພາຍໃນປະເທດ, ສ້າງລະບົບເຊື່ອມໂຍງການອອກອະນຸຍາດດໍາເນີນທຸລະກິດບໍລິການໄປສະນີ, ສ້າງລະບົບສະຖິຕິໄປສະນີແບບເອເລັກໂຕຣນິກ, ຊຸກຍູ້ສົ່ງເສີມການນໍາໃຊ້ເຕັກໂນໂລຊີດ້ານໄປສະນີ ໃຫ້ບັນດາຜູ້ປະກອບການໄປສະນີນຳໃຊ້ພື້ນຖານໂຄງລ່າງ, ຜະລິດຕະພັນ ແລະ ການບໍລິການດ້ານໄປສະນີທີ່ພາກລັດສ້າງຂຶ້ນ, ຊຸກຍູ້ ແລະ ສົ່ງເສີມໃຫ້ຜູ້ປະກອບການໄປສະນີ ພັດທະນາແພັລດຟອມ ແລະ ນໍາໃຊ້ນະວັດຕະກຳການບໍລິການດ້ານໄປສະນີໃຫ້ມີຄວາມຫຼາກຫຼາຍ, ເປີດກວ້າງການຮ່ວມມື ແລະ ເຊື່ອມໂຍງກັບພາກພື້ນ ແລະ ສາກົນ ເປັນຕົ້ນ ກັບສະຫະພາບໄປສະນີສາກົນ ແລະ ສະຫະພາບໄປສະນີອາຊີ-ປາຊີຟິກເພື່ອແລກປ່ຽນຄວາມຮູ້, ປະສົບການ, ບົດຮຽນໃໝ່ທາງດ້ານເຕັກນິກ ເພື່ອຍົກລະດັບຄວາມຮູ້ໃຫ້ແກ່ບຸກຄະລາກອນໄປສະນີ, ພົວພັນຮ່ວມມືກັບປະເທດຄູ່ຮ່ວມຍຸດທະສາດ ແລະ ປະເທດສະມາຊິກດ້ວຍກັນ ເພື່ອຍາດແຍ່ງການຊ່ວຍເຫຼືອ ໃນການພັດທະນາຂະແໜງການໄປສະນີ.
(ຂ່າວ: ກຕສ)
ຄໍາເຫັນ