ສະຫຼອງວັນມູນເຊື້ອທະຫານອາສາສະໝັກແລະຊ່ຽວຊານຫວຽດນາມຢູ່ລາວ ຄົບຮອບ 74 ປີ

ພິທີ ສະເຫຼີມສະຫຼອງ ວັນມູນເຊື້ອທະຫານອາສາສະໝັກ ແລະ ຊ່ຽວຊານຫວຽດນາມຢູ່ ລາວ (30 ຕຸລາ 1949 - 30 ຕຸລາ 2023) ຄົບ ຮອບ 74 ປີ ໄດ້ຈັດຂຶ້ນໃນວັນທີ 19 ຕຸລາ ທີ່ຜ່ານມາ, ທີ່ສະໂມສອນກອງບັນຊາການທະຫານແຂວງຫຼວງພະບາງ, ໃຫ້ກ້ຽດເຂົ້າຮ່ວມມີ ທ່ານ ນາງ ກຽວທິຮັງຟຸກ ຫົວໜ້າກົງສຸນໃຫຍ່ ສສ ຫວຽດນາມ ປະຈຳ ພາກເໜືອທີ່ ແຂວງຫຼວງພະບາງ, ທ່ານ ບຸນເລື່ອມ ມະນີວົງ ຮອງເຈົ້າແຂວງແຂວງຫຼວງພະບາງ ແລະ ສະຫາຍ ພັນເອກ ສີວິໄລ ເພັງສັນຕິສຸກ ຫົວໜ້າການເມືອງກອງບັນຊາການທະຫານແຂວງຫຼວງພະບາງ, ມີເຈົ້າເມືອງ 11 ເມຶອງ, ຄະນະກົງສຸນໃຫຍ່ຫວຽດນາມ ປະຈໍາພາກເໜືອ, ຄະນະພັກ-ຄະນະບັນຊາກອງບັນຊາການທະຫານແຂວງຫຼວງພະບາງ, ປກສ ແຂວງ, ສະຫະພັນນັກຮົບເກົ່າແຂວງ, ສະມາຄົມ ຊາວຫວຽດນາມ ທີ່ອາໄສຢູ່ແຂວງຫຼວງພະບາງ ແລະ ພະນັກງານອາວຸໂສບໍານານ ຕະຫຼອດຮອດນັກຮຽນນນັກສຶກສາເຂົ້າຮ່ວມ.
ທ່ານ ນາງ ກຽວທິຮັງຟຸກ ຫົວໜ້າກົງສຸນໃຫຍ່ ສສ ຫວຽດນາມ ປະຈຳພາກເໜືອທີ່ ແຂວງຫຼວງພະບາງໄດ້ຂຶ້ນກ່າວຄໍາປາໄສວ່າ: ກ່ອນໜ້ານີ້ 74 ປີ, ພາຍຫຼັງ ຫວຽດນາມ ແລະ ລາວ ໄດ້ຂຶ້ນກຳອໍານາດ ການກຳເນີດຂອງລັດຖະບານ ສາທາລະນະລັດ ປະຊາທິປະໄຕ ຫວຽດນາມ ວັນທີ 2 ກັນຍາ ແລະ ລັດຖະບານລາວອິດສະຫຼະ ໃນວັນທີ 12 ຕຸລາ 1945, ລັດຖະບານສອງປະເທດ ໄດ້ລົງນາມໃນສົນທິສັນຍາຊ່ວຍເຫຼືອ ເຊິ່ງກັນ ແລະ ກັນ ລາວ-ຫວຽດນາມ ແລະ ສັນຍາວ່າດ້ວຍການຈັດຕັ້ງກໍາລັງປະສົມ ລາວ-ຫວຽດນາມ. ເພື່ອຄຽງບ່າຄຽງໄຫຼ່ກັບບັນດາກໍາລັງປະກອບອາວຸດລາວທີ່ຮັກຊາດຕໍ່ສູ້, ກໍ່ສ້າງ ແລະ ພັດທະນາກໍາລັງປະຕິວັດ. ວັນທີ 30 ຕຸລາ 1949, ຄະນະປະຈຳສູນກາງພັກອມມູນິດອິນດູຈິນ ໄດ້ຕັດສິນໃຈ ນໍາກໍາລັງທະຫານຂອງຫວຽດນາມ ດໍາເນີນຕໍ່ສູ້, ເຮັດວຽກເພື່ອຊ່ວຍເຫຼືອ ລາວ ໄດ້ຈັດຕັ້ງເປັນລະບົບຂອງຕົນ ໂດຍເອີ້ນວ່າ; “ທະຫານອາສາສະໝັກ”. ນັບແຕ່ມື້ນັ້ນມາ, ວັນທີ 30 ຕຸລາ ຂອງທຸກໆປີ ໄດ້ມີພິທີສະເຫຼີມສະຫຼອງວັນມູນເຊື້ອຂອງບັນດາທະຫານອາສາສະໝັກ ແລະ ນັກຊ່ຽວຊານຫວຽດນາມ ຢູ່ລາວ ຈົນເຖິງປັດຈຸບັນ. 
ໂອກາດທີ່ມີຄວາມໝາຍສໍາຄັນນີ້, ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ທ່ານ ພັນ ເອກ ສີວິໄລ ເພັງສັນຕິສຸກ ຫົວໜ້າການເມືອງກອງບັນຊາການທະຫານແຂວງຫຼວງພະບາງ ແລະ ທ່ານ ພັນ ໂທ ໄຊພອນ ຄົມອາລຸນ ປະທານສະຫະພັນນັນຮົບເກົ່າແຂວງ ໄດ້ຜັດປ່ຽນກັນມີຄຳເຫັນກ່າວລະນຶກເຖິງຄຸນງາມຄວາມດີການເສຍສະຫຼະ, ອຸທິດເລືອດເນື້ອເຫື່ອແຮງ, ສະຕິປັນຍາ ຂອງທະຫານອາສາສະໝັກ ແລະຊ່ຽວຊານຫວຽດນາມ ຢູ່ ລາວ ໃນເມື່ອກ່ອນ ຊຶ່ງກາຍເປັນຂີດໝາຍທີ່ສໍາຄັນ ທາງປະຫວັດສາດ ຂອງປະຊາຊົນ ສອງຊາດ ລາວ-ຫວຽດນາມ.