ພິທີສະເຫຼີມສະຫຼອງວັນສາຍຕາໂລກແລະວັນສຸຂະພາບຈິດໂລກຄົບຮອບ23ປີ (12/10/2000-12/10/2023)ໄດ້ຈັດຂຶ້ນໃນວັນທີ30ຕຸລານີ້, ທີ່ແຂວງວຽງຈັນໂດຍການເຂົ້າຮ່ວມຂອງທ່ານຄຳພັນສິດທິດຳພາເຈົ້າແຂວງວຽງຈັນ, ທ່ານນາງລາວັນສຸດທິສານຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີຕາງໜ້າໜ່ວຍສະຫະພັນແມ່ຍິງຮາກຖານບັນດາພະແນກການ, ກົມກອງອ້ອມຂ້າງ,ບ້ານອອ້ມຂ້າງແຂວງແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານນາງລາວັນສຸດທິສານໄດ້ຍົກໃຫ້ເຫັນຄວາມເປັນມາຂອງວັນສາຍຕາໂລກແລະການຈັດຕັ້ງປະຕິບັດບັນດາກິດຈະກໍາການສົ່ງເສີມສຸຂະພາບຕາຢູ່ສປປລາວເພື່ອໃຫ້ທຸກຄົນທົ່ວສັງຄົມຍົກສູງຄວາມຮັບຮູ້ແລະເຂົ້າໃຈຕໍ່ການດູແລຮັກສາສຸຂະພາບຕາຕົນເອງ, ຮູ້ຈັກວິທີປ້ອງກັນແລະປິ່ນປົວ, ໃຫ້ຄວາມສຳຄັນຕໍ່ສິດໃນການເບິ່ງເຫັນຂອງລັດຖະບານແຕ່ລະປະເທດທີ່ໄດ້ຮັບຮອງເອົາໃນວາລະກອງປະຊຸມໃຫຍ່ຂອງອົງການອະນາໄມໂລກຄັ້ງທີ56ໃນວັນທີ26ພຶດສະພາ2003ທີ່ປະເທດສະວິດເພື່ອຮັບປະກັນໃຫ້ການບໍລິການຮັກສາສຸຂະພາບຕາມີການຂະຫຍາຍຕົວຢ່າງຕໍ່ເນື່ອງ, ເອົາໃຈໃສ່ວຽກງານປ້ອງກັນແລະປິ່ນປົວຢ່າງທົ່ວເຖິງຢູ່ພາຍໃນປະເທດຂອງຕົນ.ມີຈໍານວນເຖິງ80%ຂອງຄົນຕາບອດທີ່ສາມາດຫຼີກລ່ຽງໄດ້, ໃນນີ້20%ແມ່ນສາມາດປ້ອງກັນແລະ60%ແມ່ນສາມາດປິ່ນປົວໃຫ້ຄົນຕາບອດເຫຼົ່ານັ້ນສາມາດມີສາຍຕາກັບຄືນມາແລະສາມາດເບິ່ງເຫັນໄດ້ເປັນປົກກະຕິ, ການປ້ອງກັນແລະປິ່ນປົວຕາບອດແລະສາຍຕາບົກຜ່ອງຈະມີປະສິດທິຜົນແລະໄດ້ຮັບຜົນສຳເລັດໄດ້ກໍຕໍ່ເມື່ອທຸກຄົນໄດ້ເຂົ້າໃຈແລະສາມາດເຂົ້າເຖິງການບໍລິການຮັກສາສຸຂະພາບຕາບໍ່ວ່າຜູ້ທຸກຍາກ, ຮັ່ງມີ, ຢູ່ຕົວເມືອງ, ຊົນນະບົດຫຼືເຂດຫ່າງໄກສອກຫຼີກມີໂອກາດໄດ້ຮັບການບໍລິການດູແລຮັກສາສຸຂະພາບຕາຢ່າງສະເໝີພາບແລະເທົ່າທຽມກັນ. ການປິ່ນປົວຕາບອດທີ່ສາມາດຫຼີກລ່ຽງໄດ້ສ່ວນໃຫຍ່ແມ່ນ: ພະຍາດແກ່ນຕາຂຸ້ນ, ພະຍາດຊຶມເຊື້ອທາງຕາ, ອຸບັດຕິເຫດທາງຕາແລະພະຍາດເບົາຫວານຂຶ້ນຕາ.
ພ້ອມນີ້, ທ່ານເຈົ້າແຂວງວຽງຈັນຍັງໄດ້ຍົກໃຫ້ເຫັນຄວາມໝາຍສຳຄັນວັນສຸພາບຈິດໂລກສຸຂະພາບຈິດແມ່ນສິດທິມະນຸດພື້ນຖານສໍາລັບທຸກໆຄົນ, ບໍ່ວ່າຈະເປັນຜູ້ໃດແລະຢູ່ບ່ອນໃດກໍຕາມ, ມີສິດໄດ້ຮັບມາດຕະຖານສູງສຸດດ້ານສຸຂະພາບຈິດ. ສຸຂະພາບຈິດທີ່ດີມີຄວາມສໍາຄັນຕໍ່ສຸຂະພາບແລະຄວາມຜາສຸກໂດຍລວມຂອງພວກເຮົາ. ເຖິງຢ່າງໃດກໍຕາມ1ໃນ8ຄົນໃດໃນທົ່ວໂລກກໍາລັງຢູ່ກັບບັນຫາສຸຂະພາບຈິດຊຶ່ງອາດສົ່ງຜົນກະທົບຕໍ່ສຸຂະພາບທາງຮ່າງກາຍ, ຄວາມຜາສຸກຂອງເຂົາເຈົ້າ, ວິທີທີ່ເຂົາເຈົ້າຕິດຕໍ່ພົວພັນກັບຄົນອື່ນໆແລະການດໍາລົງຊີວິດຂອງເຂົາເຈົ້າບັນຫາສຸຂະພາບຈິດຍັງສົ່ງຜົນກະທົບຕໍ່ໄວລຸ້ນແລະຄົນໜຸ່ມສາວຊຶ່ງນັບມື້ນັບເພີ່ມທະວີຂຶ້ນ. ອົງການອານະໄມໂລກສືບຕໍ່ເຮັດວຽກຮ່ວມກັບບັນດາຄູ່ຮ່ວມງານເພື່ອໃຫ້ແນ່ໃຈວ່າສຸຂະພາບຈິດມີຄຸນຄ່າ, ມີການສົ່ງເສີມ, ມີການປົກປ້ອງແລະດໍາເນີນການຢ່າງຮີບດ່ວນເພື່ອໃຫ້ທຸກຄົນສາມາດໃຊ້ສິດທິຄວາມເປັນມະນຸດແລະເຂົ້າເຖິງການດູແລຮັກສາສຸຂະພາບຈິດທີ່ມີຄຸນນະພາບທີ່ພວກເຂົາເຈົ້າຕ້ອງການ.
ໃນພິທີທ່ານໝໍຊ່ຽວຊານດ້ານສຸຂະພາບຕາໄດ້ອະທິບາຍແລະໃຫ້ຄໍາປຶກສາໃຫ້ຮູ້ເຖິງໂຄງປະກອບຂອງຕາ, ສຸຂະພາບຕາແລະຂັ້ນຕອນດູແລຮັກສາຕາ; ພ້ອມດຽວກັນນີ້ຜູ້ເຂົ້າຮ່ວມທີ່ມີບັນຫາດ້ານສາຍຕາຍັງໄດ້ລົງທະບຽນເພື່ອຮັບການກວດສຸຂະພາບຕາ, ວັດແທກສາຍຕາພ້ອມທັງໄດ້ຮັບແວ່ນຕາໂດຍບໍ່ໄດ້ເສຍຄ່າ.ຊຶ່ງມີຜູ້ທີ່ມາຮ່ວມກິດຈະກໍາກວດສຸຂະພາບຕາແລະວັດແທກສາຍຕາຄັ້ງນີ້ເກືອບ400 ຄົນ. ການຈັດງານຄັ້ງນີ້ແມ່ນໄດ້ຮັບການສະໜັບສະໜູນຈາກສະຫະພັນແມ່ຍິງແຂວງ, ມູນນິທິເຟຣດໂຮໂລດແລະໂຮງໝໍແຂວງວຽງຈັນ.
(ຂ່າວ-ພາບ: ແຂວງວຽງຈັນ)
ຄໍາເຫັນ