ໃນພິທີ, ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກໍາ ແລະ ປ່າໄມ້ກ່າວວ່າ: “ຂ້າພະເຈົ້າຂໍຂອບໃຈ EU, ອົງການຝຣັ່ງເພື່ອການພັດທະນາ (AFD) ແລະ WCS ທີ່ໄດ້ຮ່ວມມືກັນມາຍາວນານ ແລະ ພະຍາຍາມປະກອບສ່ວນເຂົ້າໃນຜົນສຳເລັດອັນສຳຄັນດັ່ງກ່າວ ເພື່ອຮັກສາປ່າໄມ້ ແລະ ຊີວະນານາພັນທີ່ເປັນເອກະລັກຂອງ ສປປ ລາວ. ຜົນສຳເລັດຂອງ ECILL ເປັນການຢັ້ງຢືນເຖິງຄວາມມຸ່ງໝັ້ນຮ່ວມກັນຂອງພວກເຮົາຕໍ່ກັບເປົ້າໝາຍການອະນຸລັກ ແລະ ຊີວະນານາພັນ. ພວກເຮົາຫວັງວ່າ ຈະສືບຕໍ່ການມີສ່ວນພົວພັນ ແລະ ການຮ່ວມມືຂອງພວກເຮົາ ຫຼັງຈາກໂຄງການ ECILL”.
ທ່ານ ມາກ ກະລາເກີ ກ່າວວ່າ: "ໃນໄລຍະ 5 ປີຜ່ານມາ, ໂຄງການ ECILL ໄດ້ທົດລອງວິທີການຮ່ວມມືຢ່າງຮອບດ້ານ ເພື່ອສ້າງຄວາມເຂັ້ມແຂງໃນການປົກປັກຮັກສາປ່າໄມ້ ແລະ ລະບົບນິເວດທໍາມະຊາດ , ອະນຸລັກຊີວະນານາພັນທີ່ເປັນເອກະລັກ ແລະ ອຸດົມສົມບູນຂອງ ສປປ ລາວ, ພ້ອມທັງສ້າງໂອກາດທາງເສດຖະກິດ ແລະ ຊີວິດການເປັນຢູ່ທີ່ຍືນຍົງໃຫ້ແກ່ຊຸມຊົນທ້ອງຖິ່ນ. ຂໍສະແດງຄວາມຂອບໃຈຢ່າງເລິກເຊິ່ງ ມາຍັງບັນດາຄູ່ຮ່ວມງານຂອງພວກເຮົາ, ລວມທັງພະແນກກະສິກໍາ ແລະ ປ່າໄມ້, ອົງການປົກຄອງແຂວງ, ອົງການພັດທະນາຝຣັ່ງ, ແລະ ອົງການອະນຸລັກສັດປ່າ. ການອຸທິດຕົນ ແລະ ການສະໜັບສະໜູນຂອງທ່ານ ແມ່ນສໍາຄັນຕໍ່ກັບການບັນລຸເປົ້າໝາຍລວມຂອງພວກເຮົາ.”
ພິທີສະຫຼອງຜົນງານ ແລະ ປິດໂຄງການ ECILL ໄດ້ມີຂຶ້ນກ່ອນກອງປະຊຸມທີ່ມີສ່ວນຮ່ວມຂອງຫົວໜ້າກອງຄຸ້ມຄອງປ່າສະຫງວນແຫ່ງຊາດ 26 ແຫ່ງ ແລະ ອົງການຈັດຕັ້ງທີ່ບໍ່ສັງກັດລັດ (NGOs), ຄູ່ຮ່ວມງານ ເພື່ອສ້າງການຮ່ວມມືລະຫວ່າງ ອົງການຄຸ້ມຄອງປ່າສະຫງວນ ແລະ ກິດຈະການແຮ່ທາດ ເພື່ອຫາທາງອອກສູ່ການພັດທະນາແບບຍືນຍົງ. ຈຸດປະສົງຂອງກອງປະຊຸມ ແມ່ນເພື່ອແນໃສ່ລະດົມຄວາມຄິດເຫັນກ່ຽວກັບວິທີສະໜັບສະໜູນການຈັດຕັ້ງປະຕິບັດຄຳສັ່ງນາຍົກລັດຖະມົນຕີ ສະບັບເລກທີ 06 ແລະ 11, ນິຕິກໍາກ່ຽວກັບປ່າສະຫງວນ ໃຫ້ມີປະສິດທິຜົນ ໂດຍຜ່ານການຕິດຕາມກວດກາການສຳປະທານບໍ່ແຮ່, ການປະເມີນຜົນກະທົບຕໍ່ສິ່ງແວດລ້ອມທີ່ເຂັ້ມແຂງ ແລະ ການຈັດຕັ້ງປະຕິບັດກົດໝາຍປ່າໄມ້ ແລະ ທີ່ດິນປ່າໄມ້ໃຫ້ເຂັ້ມແຂງກວ່າເກົ່າ.
ນັບຕັ້ງແຕ່ເລີ່ມໂຄງການ ໃນເດືອນມີນາ 2020 ຈົນຮອດປັດຈຸບັນ, ໂຄງການ ECILL ໄດ້ເຮັດໜ້າທີ່ຊ່ວຍຫຼຸດຜ່ອນອັດຕາຄວາມຫຼາກຫຼາຍທາງດ້ານຊີວະນານາພັນ ແລະ ການສູນເສຍທີ່ຢູ່ອາໄສ ໂດຍຮັບຮອງເອົາວິທີການຄຸ້ມຄອງພູມີທັດແບບປະສົຝປະສານ.
ໂຄງການດັ່ງກ່າວ, ແມ່ນສຸມໃສ່ 3 ພູມີທັດບຸລິມະສິດທີ່ມີຄວາມຫຼາກຫຼາຍທາງດ້ານຊີວະນານາພັນ, ການບໍລິການລະບົບນິເວດ ແລະ ຄຸນຄ່າທາງທຳມະຊາດຄື: (1) ອຸທິຍານແຫ່ງຊາດນ້ຳແອດ-ພູເລີຍ, (2) ເຂດຄຸ້ມຄອງລະບົບນິເວດ ແລະ ສັດປ່າແບບປະສົມປະສານ ຢູ່ແຂວງບໍລິຄຳໄຊ ແລະ (3) ທີ່ດິນບໍລິເວນນໍ້າຣາມຊາ ເຊຈໍາພອນ ແຂວງສະຫວັນນະເຂດ. ໂຄງການ ECILL, ມີມູນຄ່າທັງໝົດ 6,8 ລ້ານເອີໂຣ, ໄດ້ຮັບທຶນສົມທົບຈາກ EU ແລະ AFD ແລະ ຈັດຕັ້ງປະຕິບັດໂດຍ ອົງການອະນຸລັກສັດປ່າ ປະຈໍາ ສປປ ລາວ ໃນຄວາມພະຍາຍາມຮ່ວມກັນກັບລັດຖະບານລາວ ແລະ ຊຸມຊົນທ້ອງຖິ່ນ. ຜົນງານ 5 ປີ ຜ່ານມາ, ໂຄງການ ECILL ໄດ້ປັບປຸງການຄຸ້ມຄອງປ່າສະຫງວນແບບປະສົມປະສານ ແລະ ປັບປຸງປະສິດທິພາບການຄຸ້ມຄອງຢ່າງກ້ວາງຂວາງ ບັນລຸໄດ້ດ້ວຍແຫຼ່ງທີ່ຢູ່ອາໄສທີ່ມີຄວາມຫຼາກຫຼາຍທາງດ້ານຊີວະນາໆພັນສູງຫຼາຍກວ່າ 740,000 ເຮັກຕາ ລວມທັງປ່າໄມ້, ທີ່ດິນບໍລິເວນນໍ້າ. ສ້າງຄວາມເຂັ້ມແຂງທາງດ້ານນະໂຍບາຍ ທີ່ກ່ຽວຂ້ອງກັບການອະນຸລັກຊີວະນາໆພັນ, ປ່າໄມ້, ແລະ ການປົກປ້ອງດິນຊຸ່ມ ເພື່ອສະໜັບສະໜູນການຈັດຕັ້ງລະບົບປ່າສະຫງວນແຫ່ງຊາດໃນ ສປປ ລາວ; ສ້າງຕັ້ງ ຫຼື ຂະຫຍາຍວິສາຫະກິດອະນຸລັກ ທີ່ມີຄວາມສະຫຼາດດ້ານສະພາບອາກາດ, ຕິດພັນກັບຜົນການອະນຸລັກ ທີ່ສົ່ງຜົນປະໂຫຍດທາງດ້ານເສດຖະກິດໃຫ້ຊຸມຊົນ, ລວມທັງການທ່ອງທ່ຽວຊຸມຊົນ ແລະ ກະສິກຳແບບຍືນຍົງ ທີ່ເປັນມິດກັບສິ່ງແວດລ້ອມ.
(ຂ່າວ-ພາບ: ອົງການອະນຸລັກສັດປ່າ)
ຄໍາເຫັນ