ລັດຖະມົນຕີ ກະຊວງການເງິນ, ມີບັນດາລັດຖະມົນຕີ, ຫົວໜ້າອົງການລັດທຽບເທົ່າກະຊວງ ອ້ອມຂ້າງສູນກາງ, ຮອງເຈົ້າຄອງນະຄອນຫຼວງ, ບັນດາເຈົ້າແຂວງ, ຮອງເຈົ້າແຂວງ, ຮອງລັດຖະມົນຕີ, ຫົວໜ້າກົມ, ຮອງກົມ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໂອກາດດັ່ງກ່າວ, ທ່ານ ສັນຕິພາບ ພົມວິຫານ ໃຫ້ຮູ້ວ່າ: ກອງປະຊຸມໃນຄັ້ງນີ້, ໄດ້ພ້ອມກັນຄົ້ນຄວ້າເຊື່ອມຊຶມ, ຕີລາຄາ ແລະ ປະກອບຄໍາຄິດເຫັນຕໍ່ກັບວຽກງານທີ່ສໍາຄັ ຕົ້ນຕໍໃນຫຼາຍດ້ານ ເປັນຕົ້ນ ສະຫຼຸບຕີລາຄາການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2024 ແລະ ທິດທາງແຜນການປະຈໍາປີ 2025 ຕິດພັນກັບວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ມະຕິ ຂອງສະພາແຫ່ງຊາດ ສະບັບເລກທີ 154/ສພຊ, ລົງວົນທີ 12 ທັນວາ 2024 ວ່າດ້ວຍການຮັບຮອງເອົາບົດລາຍງານ ຂອງລັດຖະບານ ກ່ຽວກັບ ການສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023, ການຈັດຕັ້ງປະຕິບັດແຜນງົບປະມານແຫ່ງລັດ ແລະ ແຜນເງິນຕາປະຈໍາປີ 2024 ແລະ ທິດທາງແຜນການປະຈໍາປີ 2025; ຄໍາແນະນໍາການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2025; ສະຫຼຸບຕີລາຄາວຽກງານປັບປຸງກົງຈັກການຈັດຕັ້ງ ແລະ ບຸກຄະລາກອນ, ວຽກງານກວດສອບ-ກວດກາ, ການຫັນເປັນທັນສະໄໝ ແລະ ວຽກງານສາມສ້າງ ຂອງຂະແໜງການເງິນ; ວຽກງານຈຸດສຸມອື່ນໆຂອງກົມລາຍຮັບ-ລາຍຈ່າຍ ແລະ ກົມວິຊາການທີ່ກ່ຽວຂ້ອງ ທີ່ໄດ້ປຶກສາຫາລື ແລະ ເປັນເອກະພາບ ໃນກອງປະຊຸມວິຊາການ ຂອງແຕ່ລະຂະແໜງການ; ການປະກອບຄໍາເຫັນ ຕໍ່ການສະຫຼຸບຜົນການຈັດຕັ້ງປະຕິບັດງົບປະມານ ປະຈໍາປີ 2024 ແລະ ທິດທາງແຜນການປີ 2025 ແລະ ວຽກງານອື່ນໆທີ່ຕິດພັນ.
ນອກນັ້ນ, ຍັງຈະໄດ້ເອກະພາບກ່ຽວກັບ ທິດນໍາໃນການສ້າງບາດລ້ຽວໃໝ່ ໃນການສ້າງແຜນງົບປະມານປົກກະຕິ ປີ 2025 ແບບສົມດຸນ ແລະ ເກີນດຸນ, ໝາຍວ່າ ລາຍຮັບປົກກະຕິພາຍໃນກຸ້ມລາຍຈ່າຍປົກກະຕິພາຍໃນ ແລະ ມີສ່ວນເກີນດຸນ ເພື່ອສະສົມໃນການແກ້ໄຂໜີ້ສິນພາຍໃນ ແລະ ຕ່າງປະເທດ ແລະ ສ່ວນການຂາດດຸນນັ້ນ ແມ່ນການຂາດດຸນພາຍນອກ ໃນການພັດທະນາຈາກການກູ້ຢືມ ແລະ ຊ່ວຍເຫຼຶອຮູບແບບໂຄງການ ຊຶ່ງເປັນແຜນງົບປະມານທີ່ທ້າທາຍທີ່ສຸດ ເພື່ອຮັບປະກັນໃຫ້ ສປປ ລາວ ມີຄວາມຍືນຍົງດ້ານໜີ້ສິນ, ມີທຶນຮອນສະສົມໄວ້ ເພື່ອແກ້ໄຂສະພາບຄວາມຫຍຸ້ງຍາກທີ່ອາດຈະເກີດຂຶ້ນໃນອະນາຄົດຈາກປັດໄຈທັງພາຍໃນ ແລະ ພາຍນອກ.
ທ່ານ ສັນຕິພາບ ພົມວິຫານ ໃຫ້ຮູ້ອີກວ່າ: ໃນປີ 2025, ຂະແໜງການເງິນໄດ້ຮັບໜ້າທີ່ການເມືອງອັນໜັກໜ່ວງ, ມີແຜນການຈັດເກັບລາຍຮັບທັງໝົດ 68,100 ຕື້ກີບ, ປະມານ 18.16% ຂອງຈີດີພີ ໃນນັ້ນ, ລາຍຮັບພາຍໃນ 62,700 ຕື້ກີບ, ລາຍຈ່າຍທັງໝົດ 71,850 ຕື້ກີບ ປະມານ 19.16% ຂອງຈີດີພີ ແລະ ການຂາດດຸນງົບປະມານ 3,750 ຕື້ກີບ ປະມານ 1% ຂອງຈີດີພີ. ທາງດ້ານແຜນລາຍຮັບ ເຫັນວ່າເປັນໂຕເລກທີ່ສູງສົມຄວນ ທີ່ຈະຕ້ອງບຸກທະລຸ ຈັດເກັບລາຍຮັບໃຫ້ຄົບຖ້ວນ ຮັບປະກັນໃຫ້ໄດ້ຕາມແຜນ ຫຼື ລື່ນແຜນ ເພື່ອໃຫ້ພຽງພໍກັບລາຍຈ່າຍ, ຊໍາລະໜີ້ສິນ ມີສ່ວນສະສົມ. ພ້ອມນັ້ນ, ລາຍຈ່າຍ ກໍຕ້ອງເຂັ້ມງວດຈໍາກັດ, ຈ່າຍໃຫ້ຖືກຕ້ອງຕາມຕົວຈິງ ຖືກກັບລະບຽບກົດໝາຍ ຊຶ່ງການບຸກທະລຸວຽກງານດັ່ງກ່າວ ໄດ້ຮຽກຮ້ອງໃຫ້ພວກເຮົາຕ້ອງມີຄວາມສາມັກຄີພາຍໃນອັນໜັກແໜ້ນ ພ້ອມກັນຈັດຕັ້ງປະຕິບັດໜ້າທີ່ການເມືອງ, ຕ້ອງຍົກສູງຄວາມເປັນເຈົ້າການ, ເປັນແບບຢ່າງທີ່ດີໃຫ້ຂະແໜງການອື່ນໆ, ເອົາໃຈໃສ່ຈັດຕັ້ງປະຕິບັດ ແລະ ຜັນຂະຫຍາຍ ທິດຊີ້ນຳຂອງກົມການເມືອງສູນກາງພັກ ໂດຍສະເພາະເນື້ອໃນມະຕິ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ສະບັບເລກທີ 04/ກມສພ, ລົງວັນທີ 11 ເມສາ 2024. ແຕ່ນີ້ຮອດປີ 2025 ຕ້ອງສຸມທຸກກໍາລັງແຮງສັງລວມ ເພື່ອຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໄລຍະທ້າຍສະໄໝໃຫ້ປະກົດຜົນເປັນຈິງ ດ້ວຍຄຸນນະພາບ ແລະ ປະສິດທິຜົນຕົວຈິງ ຕາມຈິດໃຈສ້າງການຫັນປ່ຽນໃໝ່ ທີ່ແຂງແຮງ, ເລິກເຊິ່ງ ແລະ ຮອບດ້ານ.
ຂ່າວ: ທະນູທອງ, ພາບ: ເກດສະໜາ
ຄໍາເຫັນ