ຫວ່າງບໍ່ດົນມານີ້ ວ່າ: ມາຮອດປັດຈຸບັນ, ໂຄງການປັບປຸງ ແລະ ສ້ອມແປງ ເສັ້ນທາງເລກ 13 ເໜືອ ຊຶ່ງມີໄລຍະທາງແຕ່ ສີໄຄ-ສີເກີດນະຄອນຫຼວງວຽງຈັນມີຄວາມຍາວກວ່າ 6 ກິໂລແມັດ ໂດຍລວມແລ້ວແມ່ນ ໄດ້ສຳເລັດ 80%. ໃນນີ້ ກໍ່ສ້າງຮ່ອງນໍ້າແຄມທາງສໍາເລັດແລ້ວ 100%, ເທເບຕົງ ໜ້າທາງ ສໍາເລັດ 65% ແລະ ພວມສືບຕໍ່ເທເບຕົງໜ້າທາງຢ່າງຕໍ່ເນື່ອງ ໂດຍສາມາດເທໄດ້ 1,4 ກິໂລແມັດຕໍ່ໜຶ່ງອາທິດ (ເຮັດວຽກທັງກາງເວັນ ແລະ ກາງຄືນ). ສ່ວນການວາງລະບົບດອນກາງ ແລະ ເສົາໄຟເຍືອງທາງ ໂດຍໃຊ້ໂຊລາເຊວ ສໍາເລັດແລ້ວປະມານ 40%, ສໍາເລັດການເທເບຕົງໜ້າທາງຈະໃຫ້ສໍາເລັດ 100% ພາຍໃນເດືອນມັງກອນ 2025, ຈາກນັ້ນ ຈະໃຫ້ສໍາເລັດໜ້າວຽກຕ່າງໆ ໃນທ້າຍເດືອນກຸມພາ, ກ່ອນມີພິທີມອບ-ຮັບໂຄງການຢ່າງເປັນທາງການ ໃນທ້າຍເດືອນມີນາ 2025. ສໍາລັບຄວາມຫຍຸ້ງຍາກໃນການປັບປຸງ ແລະ ກໍ່ສ້າງເສັ້ນທາງດັ່ງກ່າວໃນປັດຈຸບັນ ແມ່ນບັນຫາການສັນຈອນຂອງລົດບັນທຸກຈໍານວນຫຼາຍ ທີ່ສັນຈອນຜ່ານເສັ້ນທາງນີ້. ສ່ວນຈຸດທີ່ມາຄວາມຫຍຸ້ງຍາກຫຼາຍກວ່າໝູ່ແມ່ນເຂດໜ້າຕະຫຼາດສີໄຄ ເນື່ອງຈາກມີລົດແອອັດ. ນອກຈາກນີ້ ແມ່ນເສັ້ນທາງຈາກສາມແຍກໜອງໜ້ຽວເບື້ອງຂວາມື ເຂົ້າຫາຖະໜົນສີທອງ-ຄິວລົດເມສາຍເໜືອ ຊຶ່ງມີຄວາມຈໍາເປັນຕ້ອງປິດເສັ້ນທາງກ່ອນ ໃນນີ້ນັບແຕ່ວັນທີ 11 ທັນວາ 2024 ເປັນຕົ້ນມາເພື່ອຄວາມສະດວກໃນການສ້ອມແປງເສັ້ນທາງຂອງບໍລິສັດ ດັ່ງນັ້ນຈຶ່ງຂໍຮຽກຮ້ອງມາຍັງຜູ້ໃຊ້ລົດໃຊ້ຖະໜົນຫຼີກລ່ຽງການສັນຈອນ ໃຫ້ໄປນຳໃຊ້ເສັ້ນທາງດົງນາທອງ ແລະ ຖະໜົນພົງຊັບ ຫຼື ເສັ້ນທາງອື່ນທົດແທນກ່ອນ ໂດຍຄາດວ່າຈຸດດັ່ງກ່າວຈະໃຊ້ເວລາປະມານ 1 ເດືອນຈຶ່ງສໍາເລັດ.
ທ່ານ ດາລາວຽງ ຈັນທະລັງສີ ຍັງໄດ້ຂໍຄວາມຮ່ວມມືມາຍັງສັງຄົມ ກໍຄື ຜູ້ໃຊ້ລົດໃຊ້ຖະໜົນທີ່ຜ່ານເສັ້ນທາງເລກ 13 ເໜືອ ໄລຍະທາງແຕ່ ສີໄຄ-ສີເກີດ ໃນໄລຍະນີ້ໃຫ້ອົດທົນ, ຄ່ອຍໄປຄ່ອຍມາ, ປະຕິບັດຕາມການແນະນໍາຂອງເຈົ້າໜ້າທີ່ກ່ຽວຂ້ອງຢ່າງເຂັ້ມງວດ ແລະ ເຂົ້າໃຈຄວາມຈໍາເປັນຂອງບໍລິສັດຮັບເໝົາກໍ່ສ້າງ ທີ່ມີຄວາມຈໍາເປັນຕ້ອງປິດເສັ້ນທາງບາງຈຸດ ໃນແຕ່ໄລຍະເພື່ອຄວາມສະດວກໃນການກໍ່ສ້າງ ແລະ ສ້ອມແປງເສັ້ນທາງດັ່ງກ່າວອີກດ້ວຍ.
(ຂ່າວ: ຍຸຸພິນທອງ) ຂໍ້ມູນຈາກ: ວິທະຍຸກະຈາຍສຽງ ແຫ່ງຊາດ
ຄໍາເຫັນ