ສ້າງຄວາມຮັບຮູ້ນຳໃຊ້ລະບົບຖານຂໍ້ມູນ ວຽກງານກໍ່ສ້າງຮາກຖານການເມືອງ ໃຫ້ 6 ແຂວງພາກໃຕ້

ກົມທ້ອງຖິ່ນ-ຮາກຖານ, ຫ້ອງວ່າການສູນກາງພັກ ໄດ້ຈັດຝຶກອົບຮົມການນຳໃຊ້ລະບົບຖານຂໍ້ມູນ ວຽກງານກໍ່ສ້າງຮາກຖານການເມືອງ ຫັນເປັນທັນສະໄໝ ໃຫ້ຂະແໜງກໍ່ສ້າງຮາກຖານການເມືອງ ຫ້ອງວ່າການແຂວງ 6 ແຂວງ ເຂດພາກໃຕ້ໃນວັນທີ 20 ພະຈິກ ນີ້ທີ່ແຂວງຈຳປາສັກ. ໂດຍການເປັນປະທານຂອງ ທ່ານ ວິໄຊ ຂຳຕະກຸນ ຮອງຫົວໜ້າກົມທ້ອງຖິ່ນ-ຮາກຖານ ຫ້ອງວ່າການສູນກາງພັກ, ມີ ຄະນະຫ້ອງວ່າການແຂວງ, ວິຊາການ ຂະແໜງກໍ່ສ້າງຮາກຖານການເມືອງ ຂອງ  6 ແຂວງ ພາກໃຕ້ ເຂົ້າຮ່ວມ.
ຈຸດປະສົງຂອງການອົບຮົມໃນຄັ້ງນີ້ເພື່ອເປັນການຊຸກຍູ້, ຕິດຕາມ, ກວດກາການຈັດຕັ້ງຜັນຂະຫຍາຍມະຕິ, ຄຳສັ່ງແນະນໍາຕ່າງໆຂອງພັກ ໂດຍສະເພາະມະຕິ 056/ຄລສພ ແລະ ຄໍາສັ່ງແນະນຳ 233/ຄລສພ ໃຫ້ເຂົ້າສູ່ລວງເລິກ, ເພື່ອຫັນເປັນທັນສະໄໝ ໃນການເຊື່ອມໂຍງລະບົບຖານຂໍ້ມູນວຽກງານກໍ່ສ້າງຮາກຖານການເມືອງທົ່ວປະເທດ ຂອງຫ້ອງວ່າການສູນກາງພັກ ລະຫວ່າງ ແຂວງ ກັບ ສູນກາງ ຢ່າງເປັນລະບົບ,  ຝຶກໃຫ້ພະນັກງານຂະແໜງກ່ຽວຂ້ອງຂອງແຂວງ ສາມາດນໍາໃຊ້ລະບົບໂປແກຣມຖານຂໍ້ມູນວຽກງານກໍ່ສ້າງຮາກຖານການເມືອງໃຫ້ມີປະສິດທິຜົນດີ, ທັງນີ້ກໍເພື່ອສ້າງຄວາມຮັບຮູ້, ເຂົ້າໃຈເປັນເອກະພາບ ຕໍ່ກັບເນື້ອໃນລາຍງານຂໍ້ມູນ, ວິທີການເກັບກໍາ ຂໍ້ມູນຕາມ 4 ກຸ່ມວຽກ ເຊັ່ນ: ການນຳພາ-ຊີ້ນຳໃນການຈັດຕັ້ງຜັນບັນດາຂະຫຍາຍມະຕິຂອງຂັ້ນເທິງ, ການເປັນເສນາທິການວຽກງານກໍ່ສ້າງຮາກຖານການເມືອງໃຫ້ຂັ້ນເທິງຂອງຕົນ, ລະບົບການສ່ອງແສງລາຍງານ ແລະ ທິດທາງວຽກງານໃນຕໍ່ໜ້າ ເພື່ອເປັນເອກະພາບກັນໃນຂອບເຂດທົ່ວປະເທດ; ຮັບປະກັນການປ້ອນຂໍ້ມູນ ໃຫ້ມີຄວາມຖືກຕ້ອງຊັດເຈນ ແລະ ເປັນເອກະພາບກັນໃນຂອບເຂດທົ່ວປະເທດ ພ້ອມທັງໄດ້ປຶກສາຫາລືແລກປ່ຽນບົດຮຽນກ່ຽວກັບວຽກງານກໍ່ສ້າງຮາກຖານການເມືອງ, ການສ່ອງແສງລາຍງານ, ກົນໄກການປະສານງານລະຫວ່າງສາຍຕັ້ງ ແລະ ສາຍຂວາງ ພ້ອມທິດທາງວຽກງານໃນຕໍ່ໜ້າ ເພື່ອປະຕິບັດຕາມທິດຫັນເປັນທັນສະໄໝໃນຂົງເຂດວຽກງານດັ່ງກ່າວ ແລະ ກອງປະຊຸມຝຶກອົບຮົມນີ້ ຈະດຳເນີນເປັນເວລາ 3 ວັນ ຈຶ່ງສຳເລັດ.
ຂ່າວ-ພາບ:ທັດຊະນະ