 |
ສະຫາຍ ພັນໂທ ຄໍາຮັກ ລິນນາວົງ ເລຂາຄະນະພັກ ຫົວໜ້າສາງນໍ້າມັນເຊື້ອໄຟເລກ 9 ກອງທັບໃຫ້ຮູ້ວ່າ: ພາຍຫຼັງໄດ້ຮັບການສ້າງຕັ້ງຂຶ້ນໃນປີ 1979 ໃນເວລານັ້ນມີຊື່ວ່າ: ສາງນໍ້າມັນຫ້ວຍໄລ່ ເພາະບ່ອນຕັ້ງສາງຢູ່ໃກ້ກັບຫ້ວຍນໍ້າຊື່ວ່າ ຫ້ວຍໄລ່ ແລະໃກ້ກັບເສັ້ນທາງເລກ 9 ມາຮອດປີ 2001 ຈຶ່ງໄດ້ປ່ຽນຊື່ມາເປັນສາງນໍ້າມັນເຊື້ອໄຟເລກ 9 ຈົນເຖິງປັດຈຸບັນ. ດ້ານໂຄງປະກອບການຈັດຕັ້ງມີ 4 ຂະແໜງການຄື: ຂະແໜງແຜນການ, ຂະແໜງບໍລິຫານ, ຂະແໜງນໍ້າມັນເຊື້ອໄຟ ແລະ ຂະແໜງເຕັກນິກ.
ຕະຫຼອດໄລຍະຜ່ານມາ, ຄະນະພັກ-ຄະນະບັນຊາໄດ້ເອົາໃຈໃສ່ວຽກງານສຶກສາອົບຮົມການເມືອງນໍາພາແນວຄິດເປັນປະຈຳ ເພື່ອເຮັດໃຫ້ພະນັກງານ-ນັກຮົບໃນກົມກອງມີແນວຄິດອຸ່ນອ່ຽນເຊື່ອໝັ້ນການນໍາພາຂອງພັກ ໄດ້ນໍາເອົາ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດວາງອອກມາຈັດຕັ້ງຜັນຂະຫຍາຍເຂົ້າໃສ່ວຽກງານບັນຊາ-ນໍາພາພາຍໃນກົມກອງຕາມເງື່ອນໄຂ ແລະ ວຽກງານຕົວຈິງຂອງກົມກອງໃຫ້ໄດ້ຮັບຜົນດີ. ສາມາດຮັກສາໄດ້ທາງດ້ານ ຈໍານວນພົນເປັນປົກກະຕິ, ຈັດຕັ້ງປະຕິບັດມະຕິຄໍາສັ່ງແຈ້ງການຕ່າງໆຂອງຂັ້ນເທິງໄດ້ຢ່າງເຂັ້ມງວດ ແລະ ທັນເວລາ ປ້ອງກັນວັນບຸນວັນສໍາຄັນຕ່າງໆຂອງພັກ-ຂອງຊາດ ແລະ ໄດ້ຈັດຕັ້ງປະຈຳການປ້ອງກັນເວນຍາມລະບົບສາງມີຄວາມປອດໄພ 100%, ໄດ້ຮັບຮອງຈາກຂັ້ນເທິງເປັນກອງ 3 ປອດ ແລະ ໜ່ວຍພັກປອດໃສເຂັ້ມແຂງ ໜັກແໜ້ນຫຼາຍສະໄໝຕິດຕໍ່ກັນ.
ຢ່າງໃດກໍຕາມ, ການຈັດຕັ້ງປັບປຸງວຽກງານຕ່າງໆໃນໄລຍະຜ່ານມາສາງນໍ້າມັນເຊື້ອໄຟເລກ 9 ມີຂໍ້ສະດວກຂໍ້ຫຍຸ້ງຍາກຫຼາຍດ້ານ ເປັນຕົ້ນຂໍ້ສະດວກຍ້ອນມີຄະນະພັກຂັ້ນເທິງໄດ້ເອົາໃຈໃສ່ຊີ້ນໍາຕໍ່ຄະນະພັກ-ຄະນະບັນຊາໃນການບັນຊານໍາພາພະນັກງານ-ນັກຮົບພາຍໃນກົມກອງ ເພື່ອເຮັດສຳເລັດໜ້າທີ່ການເມືອງມີຄວາມສະຫງົບໂດຍພື້ນຖານ, ຍ້ອນຄະນະພັກ-ຄະນະບັນຊາໄດ້ເອົາໃຈໃສ່ປັບປຸງແບບແຜນວິທີການເຮັດວຽກຂອງຕົນໃຫ້ຖືກຕ້ອງຕາມຂໍ້ກຳນົດກົດລະບຽບຂອງກົມນໍ້າມັນເຊື້ອໄຟຈຶ່ງເຮັດສຳເລັດໜ້າທີ່ ແລະ ຖືກຕ້ອງຕາມຫຼັກການວິຊາສະເພາະ, ຍ້ອນພະນັກງານ-ນັກຮົບໃນກົມກອງມີແນວຄິດເຊື່ອມຊຶມຢ່າງເລິກເຊິ່ງຕໍ່ການນໍາພາຂອງພັກໄດ້ຕັ້ງໜ້າປະກອບສ່ວນເປັນກຳລັງແຮງສັງລວມເຂົ້າໃນຂະບວນການຕ່າງໆໃນກົມກອງ ແລະ ເຮັດໃຫ້ກົມກອງມີຄວາມສະຫງົບທາງດ້ານການເມືອງ ແລະ ເຂັ້ມແຂງທາງດ້ານການຈັດຕັ້ງ.
ຍ້ອນກົມກອງມີການຈັດຕັ້ງຄົບຊຸດຕາມການປະກອບຂອງຂັ້ນເທິງ, ຂໍ້ຫຍຸ້ງຍາກ: ສາງນໍ້າມັນເຊື້ອໄຟເລກ 9 ຕັ້ງຢູ່ເຂດໃກ້ບ້ານປະຊາຊົນມີທົ່ງນາປະຊາຊົນອ້ອມຂ້າງຮອບສາງເຊິ່ງມີຄວາມຫຍຸ້ງຍາກໃນການປ້ອງກັນຢ້ານເກີດໄຟລາມປ່າຫຍ້າຕາມທົ່ງນາລາມມາເຂົ້າສາງເພາະສາງດັ່ງກ່າວບໍ່ມີກຳແພງ ມີແຕ່ຮົ້ວໜາມໝາກຈັບ ແລະ ຕາໜ່າງບໍ່ມີຄວາມສາມາດກັນໄຟລາມໄດ້, ລະບົບສາງຄັງຢູ່ໃນລະບົບເກົ່າແກ່ເຖິງແມ່ນວ່າມີການສ້ອມແປງຫຼາຍຄັ້ງແຕ່ຄວາມຮັບ ປະກັນບໍ່ໃຫ້ຮົ່ວຊຶມ ແຕ່ກໍ່ຍັງມີຢູ່ລະບົບຖັງນອນຢູ່ເທິງໜ້າດິນບໍ່ມີຫຼັງຄາມຸງ ແລະ ຖັງບັນຈຸນໍ້າມັນກາຊວນບໍ່ມີຂັ້ນໄດຂຶ້ນ ເຮັດໃຫ້ມີຄວາມຫຍຸ້ງຍາກໃນການກວດກາວັດແທກ ແລະ ຮັບນໍ້າມັນເຂົ້າຖັງໃນເວລາຝົນຕົກ.
ແຜນການພັດທະນາ ແລະ ປັບປຸງສາງຕໍ່ໜ້າ ຈະຕ້ອງໄດ້ເອົາໃຈໃສ່ວຽກງານສຶກສາອົບຮົມວຽກງານການນໍາພາແນວຄິດໃຫ້ພະນັກງານ-ນັກຮົບໃນກົມກອງ ເຊື່ອມຊຶມ ແລະ ເຂົ້າໃຈຕໍ່ແບບແຜນການນໍາພາຂອງພັກ-ລັດ, ເອົາໃຈ ໃສ່ຝຶກຝົນຫຼໍ່ຫຼອມ ແລະ ສ້າງຕົນເອງໃຫ້ມີຄວາມຮູ້ຄວາມສາມາດ, ມີຄຸນສົມບັດສິນທຳປະຕິວັດ ເພິ່ງຕົນເອງ ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ, ສືບຕໍ່ນໍາພາເອົາມະຕິຂອງກະຊວງປ້ອງກັນປະເທດວາງອອກວ່າດ້ວຍ 4 ໜ້າທີ່ໃຫຍ່ 26 ແຜນງານມາຈັດຕັ້ງຜັນຂະຫຍາຍເຂົ້າໃນວຽກງານຕົວຈິງຂອງກົມກອງໃຫ້ໄດ້ຮັບຜົນດີ, ສືບຕໍ່ປັບປຸງປົວ ແປງທີ່ພັກອາໃສ ເຮືອນນອນໂສດ, ເຮືອນຄົວ, ຫ້ອງການໃຫ້ມີຄວາມສະອາດສວຍງາມ ແລະ ເປັນລະບຽບຮຽບຮ້ອຍ.
 |
ໃນໂອກາດຄົບຮອບ 50 ປີ ວັນສະຖາປະນາ ສປປລາວ ແລະ ວັນເກີດປະທານ ໄກສອນ ພົມວິຫານຄົບຮອບ 105 ປີທີ່ຈະມາເຖິງນີ້, ສະຫາຍ ພັນໂທ ຄໍາຮັກ ລິນນາວົງ ເລຂາຄະນະພັກ ຫົວໜ້າສາງນໍ້າມັນເຊື້ອໄຟເລກ 9 ກອງທັບໃຫ້ທັດສະນະວ່າ: ຕະຫຼອດໄລຍະຜ່ານມາ, ການນໍາພັກ-ລັດທີ່ສະຫຼາດສ່ອງໃສໄດ້ຊີ້ນໍາ-ນໍາພາປົກປັກຮັກສາ, ສ້າງສາພັດທະນາປະເທດຊາດໃຫ້ມີຄວາມສະຫງົບທາງດ້ານການເມືອງ, ມີຄວາມເຂັ້ມແຂງທາງດ້ານການຈັດຕັ້ງ ແລະ ມີຄວາມເປັນລະບຽບຮຽບຮ້ອຍທາງສັງຄົມ ແລະ ເປັນການລະນຶກເຖິງຄຸນງາມຄວາມດີ ແລະ ສະແດງຄວາມຮູ້ບຸນຄຸນຕໍ່ປະທານໄກສອນ ພົມວິຫານ ອາດີດຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ.
ເນື່ອງໃນໂອກາດກະກຽມສະເຫຼີມສະຫຼອງວັນປະຫວັດສາດສຳຄັນດັ່ງກ່າວນີ້, ສະຫາຍ ພັນໂທ ຄຳຮັກ ລິນນາວົງ ຕາງໜ້າພະນັກງານ-ນັກຮົບສາງນໍ້າມັນເຊື້ອໄຟເລກ 9 ຂໍສະແດງຄວາມຮູ້ບຸນຄຸນຕໍ່ການນໍາພັກ-ລັດຖະບານ ແລະ ກະຊວງປ້ອງກັນປະເທດທີ່ນໍາພາປົກປັກຮັກສາ ແລະ ສ້າງສາພັດທະນາປະເທດຊາດຕະຫຼອດໄລຍະ 50 ປີຜ່ານມາ ອວຍພອນໄຊອັນປະເສີດແດ່ການນໍາພັກ-ລັດຖະບານ ແລະ ກະຊວງປ້ອງກັນປະເທດ ຈົ່ງມີສຸຂະພາບເຂັ້ມແຂງຊີ້ນຳ ແລະ ນໍາພາປະເທດຊາດກ້າວຂຶ້ນຢ່າງບໍ່ຢຸດຢັ້ງນໍາພາກອງທັບໃຫ້ເຕີບໃຫຍ່ເຂັ້ມແຂງຮອບດ້ານ ແລະ ທັນສະໄໝຂຶ້ນເລື້ອຍໆໄປ.
ຄໍາເຫັນ