ຕະຫຼອດໄລຍະເຈັດທົດສະວັດທີ່ຜ່ານມາ, ສາຍພົວພັນລະຫວ່າງ ຣາຊະອານາຈັກກຳປູເຈຍ ແລະ ສປປ ລາວ ໄດ້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ຊຶ່ງສະແດງໃຫ້ເຫັນໂດຍຜ່ານມິດຕະພາບອັນໝັ້ນຄົງ, ການຮ່ວມມືທີ່ມີໝາກມີຜົນ ແລະ ການແລກປ່ຽນການຢ້ຽມຢາມຢ່າງເປັນປົກກະຕິໃນທຸກລະດັບ. ສາຍພົວພັນມິດຕະພາບແບບອ້າຍນ້ອງລະຫວ່າງປະຊາຊົນສອງຊາດຂອງພວກເຮົາສືບຕໍ່ມີຄວາມໝັ້ນຄົງຂະໜົງແກ່ນ ແລະ ຍືນຍົງ ປຽບດັ່ງກະແສຂອງແມ່ນ້ຳຂອງ ຊຶ່ງໄດ້ເພີ່ມພູນຄູນສ້າງ ແລະ ເຊື່ອມໂຍງສອງປະເທດຂອງພວກເຮົາ.
ໃນຂະນະທີ່ພວກເຮົາພວມສະເຫຼີມສະຫຼອງຂີດໝາຍທີ່ສຳຄັນນີ້, ຂ້າພະເຈົ້າຂໍຢືນຢັນຄືນຄຳໝັ້ນສັນຍາຂອງຣາຊະອານາຈັກກຳປູເຈຍໃນການສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນ ເຊື້ອ ແລະ ການຮ່ວມມືອັນໃກ້ຊິດພາຍໃຕ້ການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານເພື່ອສັນຕິພາບ, ການພັດທະນາ ແລະ ຄວາມຈະເລີນຮຸ່ງເຮືອງຂອງສອງປະເທດ ແລະ ປະຊາ ຊົນສອງຊາດຂອງພວກເຮົາ.
ຂໍອວຍພອນໃຫ້ພະນະທ່ານປະທານປະເທດ ຈົ່ງມີສຸຂະພາບເຂັ້ມແຂງ ແລະ ສືບຕໍ່ປະສົບຜົນສຳເລັດໃນໜ້າທີ່ວຽກງານອັນມີກຽດສູງສົ່ງຂອງພະນະທ່ານເພື່ອຄວາມຜາສຸກຂອງປະຊາຊົນແຫ່ງ ສປປ ລາວ; ດ້ວຍຄວາມເຄົາລົບ ແລະ ນັບຖືຢ່າງສູງ.
ໃນໂອກາດດຽວກັນ, ສົມເດັດມະຫາ ບໍວໍທິບໍດີຮຸນມາແນດ ນາຍົກລັດຖະມົນຕີແຫ່ງ ຣາຊະອານາຈັກກຳປູເຈຍ ກໍໄດ້ສົ່ງສານຊົມເຊີຍເຖິງ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ຊຶ່ງມີເນື້ອໃນວ່າ: ໃນນາມລັດຖະບານແຫ່ງຣາຊະອານາຈັກ ແລະ ປະຊາຊົນກຳປູເຈຍ, ຂ້າພະເຈົ້າມີຄວາມຍິນດີເປັນຢ່າງຍິ່ງຂໍສົ່ງຄໍາຊົມເຊີຍຢ່າງຈິງໃຈມາຍັງພະນະທ່ານ, ລັດຖະບານ ແລະ ປະຊາຊົນແຫ່ງ ສປປ ລາວ ເພື່ອນມິດເນື່ອງໃນໂອກາດສະເຫຼີມສະຫຼອງຄົບຮອບ 70 ປີແຫ່ງການສ້າງຕັ້ງສາຍພົວພັນການທູດລະຫວ່າງຣາຊະອານາ ຈັກກຳປູເຈຍ ແລະ ສປປ ລາວ; ສາຍພົວພັນຂອງພວກເຮົາທີ່ໄດ້ຮັບການພັດທະນາໃນຕະຫຼອດໄລຍະເວລາກວ່າເຈັດທົດສະວັດທີ່ຜ່ານມາມີຮາກເຫງົ້າມາຈາກສາຍພົວພັນອັນຍາວນານທີ່ສືບຕໍ່ກັນມາຫຼາຍສະ ຕະວັດໃນປະຫວັດສາດອັນໃກ້ຊິດ ແລະ ຕິດພັນກັນຜ່ານມາ. ໃນປັດຈຸບັນ, ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດຂອງພວກເຮົາກວມເອົາຫຼາຍຂົງເຂດ ແລະ ສືບຕໍ່ໄດ້ຮັບການເສີມຂະຫຍາຍໂດຍຜ່ານການແລກປ່ຽນການຢ້ຽມຢາມຂອງການນໍາຂັ້ນສູງຢ່າງເປັນປະຈຳ ຊຶ່ງສະແດງໃຫ້ເຫັນເຖິງຄວາມເຂັ້ມແຂງ ແລະ ຄວາມມີຊີວິດຊີວາຂອງສາຍພົວພັນລະຫວ່າງສອງປະເທດພວກເຮົາ; ວັນຄົບຮອບທີ່ສຳຄັນໃນຄັ້ງນີ້ ເປັນກາລະໂອກາດອັນມີຄຸນຄ່າເພື່ອຢໍ້າຄືນຄວາມໝາຍໝັ້ນຂອງພວກເຮົາໃນການສືບຕໍ່ຮັດແໜ້ນ ແລະ ເພີ່ມທະວີການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານຂອງພວກເຮົາໃຫ້ເຂັ້ມແຂງ ແລະ ເຂົ້າສູ່ລວງເລິກ. ພວກເຮົາຈະຮ່ວມມືກັນສົ່ງເສີມເປົ້າ ໝາຍການພັດທະນາແຫ່ງຊາດ ແລະ ແກ້ໄຂບັນຫາສິ່ງທ້າທາຍຕ່າງໆໃນພາກພື້ນ ແລະ ສາກົນ ແລະ ສືບຕໍ່ປະກອບສ່ວນເຂົ້າໃນການສົ່ງເສີມສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂຶ້ນກວ່າເກົ່າເພື່ອປະຊາຊົນຂອງສອງປະເທດພວກເຮົາ, ກໍຄືປະຊາຄົມອາຊຽນ ແລະ ສາກົນ.
ຂໍອວຍພອນໃຫ້ພະນະທ່ານຈົ່ງມີສຸຂະພາບແຂງແຮງ ແລະ ສືບຕໍ່ປະສົບຜົນສຳເລັດໃນໜ້າທີ່ອັນສູງສົ່ງຂອງພະນະທ່ານໃນການນຳເອົາຄວາມສຸກ ແລະ ຊີວິດການເປັນຢູ່ທີ່ດີມາສູ່ປະຊາຊົນ ສປປ ລາວ.
ໃນຂະນະດຽວກັນ, ພະນະທ່ານ ປຣາກໂຊຄົນ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແລະ ການຮ່ວມມືສາກົນ ແຫ່ງ ຣາຊະອານາຈັກ ກຳປູເຈຍ ກໍໄດ້ສົ່ງສານຊົມເຊີຍເຖິງ ພະນະທ່ານ ທອງສະຫວັນ ພົມວິຫານ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ສາທາລະນະລັດ ປະຊາທິປະໄຕ ປະຊາຊົນລາວ ເຊັ່ນດຽວກັນ.
ຄໍາເຫັນ