 |
ທ່ານ ໃຈເພັດ ພັນທະວົງ ກຳມະການພັກແຂວງຫົວໜ້າອະນຸກຳມະການເລຂານຸການຄະນະກຳມະການເລືອກຕັ້ງຂັ້ນແຂວງ ລາຍງານວ່າ: ຜ່ານການຈັດຕັ້ງປະຕິບັດການກະກຽມ ແລະດຳເນີນການເລືອກຕັ້ງ ສສຊ, ສສຂ ເຫັນໄດ້ຜົນສຳເລັດຫຼາຍດ້ານ ພ້ອມທັງຖືກຕ້ອງສອດຄ່ອງຕາມລະບຽບການ ແລະ ຮັບປະກັນຄວາມສະຫງົບ, ຄວາມປອດໄພໂດຍພື້ນຖານ.
ສຳລັບຜົນການປ່ອນບັດເລືິອກຕັ້ງສະມາຊິກສະພາແຫ່ງຊາດຊຸດທີ X ແລະສະມາຊິກສະພາປະຊາຊົນຂັ້ນແຂວງຊຸດທີ V ແມ່ນສຳເລັດຕາມຄາດໝາຍທີ່ວາງໄວ້ ໂດຍສັງລວມຜູ້ມີສິດປ່ອນບັດເລືອກຕັ້ງ ໄດ້ທັງໝົດ 87,503 ຄົນຍິງ 42,160 ຄົນ (ຕາມສຳມະໂນຄົວ) ຜູ້ມາປ່ອນບັດຕົວຈິງ 79,985 ຄົນຍິງ 38,653 ຄົນ ຖ້າທຽບໃສ່ຜູ້ໄປໃຊ້ສິດປ່ອນບັດເລືອກຕັ້ງຊຸດຜ່ານມາ ແມ່ນເພີ່ມຂຶ້ນ 644 ຄົນ; ສ່ວນຜົນການເລືອກຕັ້ງສະມາຊິກສະພາແຫ່ງຊາດ ຊຸດທີ X ເຂດເລືອກຕັ້ງທີ 16 ແຂວງເຊກອງ ເລືອກໄດ້ 7 ທ່ານຍິງ 2 ທ່ານ ແລະ ຜົນການເລືອກຕັ້ງສະມາຊິກສະພາປະຊາຊົນແຂວງ ຊຸດທີ V ເລືອກໄດ້ທັງໝົດ 25 ທ່ານຍິງ 7 ທ່ານ (ຜູ້ສະໝັກຈາກຂັ້ນເມືອງ 16 ທ່ານຍິງ 4 ທ່ານ).ຈາກຜົນສຳເລັດເຫຼົ່ານັ້ນ, ເຮັດໃຫ້ການເລືອກຕັ້ງ ສສຊ, ສສຂ ບັນລຸຜົນສຳເລັດຕາມ ສີ່ຄາດໝາຍຄື: ຜູ້ມີສິດປ່ອນບັດເລືອກຕັ້ງ ມາໃຊ້ສິດໃນວັນເລືອກຕັ້ງໄດ້ 100%; ຜູ້ມາໃຊ້ສິດປ່ອນບັດເລືອກຕັ້ງ ຖືກຕ້ອງຕາມລະບຽບການເລືອກຕັ້ງ ຮັບປະກັນບໍ່ມີບັດເສຍ, ບັດຕາຍໄດ້ 100%; ວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ແກ່ການເລືອກຕັ້ງມີຄວາມສະຫງົບປອດໄພ 100%; ການດໍາເນີນການປ່ອນບັດເລືອກຕັ້ງ ມີຄວາມໂປ່ງໃສ, ຍຸຕິທຳ ແລະ ສໍາເລັດຕາມກໍານົດເວລາ 100%.
ພ້ອມນີ້, ກອງປະຊຸມ ກໍໄດ້ມີການປະກອບຄໍາຄິດຄໍາເຫັນ ແລະ ຍົກໃຫ້ເຖິງບັນຫາຄວາມຫຍຸ້ງຍາກໃນໄລຍະຈັດຕັ້ງປະຕິບັດ ເພື່ອເປັນການແລກປ່ຽນບົດຮຽນແນວທາງແກ້ໄຂ ຕໍ່ການປະຕິບັດ ໃນຊຸມປີຕໍ່ໜ້າ ໃຫ້ມີຜົນສຳເລັດດີຂຶ້ນກວ່າເກົ່າ.
(ຂ່າວ: ອັດສະວິນ)
ຄໍາເຫັນ