ທ່ານ ວົງວິໄລ ວົງຄຳຊາວ ມີຄໍາເຫັນວ່າ: ການປ່ຽນແປງຂອງສະພາບດິນຟ້າອາກາດ ແລະ ດ້ານເສດຖະກິດ-ສັງຄົມ ໄດ້ສົ່ງຜົນກະທົບທາງກົງ ຕໍ່ກັບການຜະລິດກະສິກໍາ ໂດຍສະເພາະແມ່ນການຜະລິດເຂົ້າ ເພື່ອຄໍ້າປະກັນດ້ານສະບຽງອາຫານ ແລະ ຜະລິດເປັນສິນຄ້າ ຕາມທິດສີຂຽວ ຂອງລັດຖະບານ, ໄພນໍ້າຖ້ວມ ແລະ ໄພແຫ້ງແລ້ງ ຖືວ່າເປັນຂໍ້ຈໍາກັດໃນການຜະລິດເຂົ້າ. ຖ້າຫາກໄພດັ່ງກ່າວເກີດຂຶ້ນແມ່ນສົ່ງຜົນກະທົບໂດຍກົງຕໍ່ກັບຜົນຜະລິດ. ສະນັ້ນ ເພື່ອແກ້ໄຂບັນຫາທີ່ໄດ້ກ່າວມານັ້ນ ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ ໄດ້ມີແຜນງານຄົ້ນຄວ້າ ແລະ ປັບປຸງແນວພັນພືດ ໂດຍສະເພາະແມ່ນການຄົ້ນຄວ້າ ແລະ ປັບປຸງແນວພັນເຂົ້າໃຫ້ມີຄວາມທົນທານຕໍ່ກັບໄພນ້ຳຖ້ວມ ແລະ ທົນທານຕໍ່ກັບພະຍາດສັດຕູພືດ, ການພັດທະນາແນວພັນເຂົ້າແມ່ນໄດ້ຮັບການສະໜັບສະໜູນດ້ານງົບປະມານຈາກສູນຄົ້ນຄວ້າກະສິກໍາ ສ. ເກົາຫຼີ ໂດຍຜ່ານສູນໂກເປຍປະຈໍາລາວ ແລະ ໃນປີ 2023 ຈຶ່ງໄດ້ປ່ອຍແນວພັນພັດທະນາຂຶ້ນມາໃໝ່ ຈຳນວນ 1 ແນວພັນ ເອີ້ນວ່າ: “ຫອມທ່າສະໂນ 13’’ ຊຶ່ງເປັນແນວພັນເຂົ້າຫອມທົນທານຕໍ່ກັບນ້ຳຖ້ວມ ແລະ ທົນຕໍ່ກັບພະຍາດເຂົ້າ ໃນ ສປປ ລາວ ເພື່ອເຮັດໃຫ້ຊາວນາໄດ້ເຂົ້າເຖິງການນຳໃຊ້ແນວພັນໃໝ່.
ແນວພັນເຂົ້າທົນນໍ້າຖ້ວມ ທີ່ມອບໃຫ້ພະແນກ ກະສິກໍາ ແລະ ປ່າໄມ້ແຂວງສະຫວັນນະເຂດ ມີຈຳນວນ 2 ໂຕນ, ສູນຄົ້ນຄວ້າກະສິກຳທ່າຊະໂນ 2 ໂຕນ ແລະ ວິທະຍາໄລກະສິກຳ ແລະ ປ່າໄມ້ແຂວງສະຫວັນນະເຂດ 1 ໂຕນ ລວມເປັນ 5 ໂຕນ ເພື່ອນໍາໄປ ແຈກຢາຍໃຫ້ ປະຊາຊົນ ແລະ ບ້ານທີ່ມີຄວາມສ່ຽງຕໍ່ນໍ້າຖ້ວມ ໃຫ້ມີໂອກາດໄດ້ເຂົ້າເຖິງແນວ ພັນໃໝ່ໆ ທີ່ມີຄຸນນະພາບ ແລະ ມີຜົນຜະລິດຫຼາຍຂຶ້ນ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ