 |
ໂຄງການສ້າງຄວາມເຂັ້ມແຂງໃຫ້ແກ່ວຽກງານປຸກລະດົມບໍລິຈາກເລືອດແລະສະໜອງເລືອດປອດໄພໂດຍໄດ້ຮັບການສະໜັບສະໜູນຈາກ ອົງການກາແດງສະວິດສ໌,ລວມມີມູນຄ່າງົບປະມານ 716,641ຝຼັ່ງສະວິດສ(ສະກຸນເງິນສະວິດສ),ໄລຍະ 4 ປີ (2025-2028),ໂດຍມີຈຸດປະສົງເພື່ອສົ່ງເສີມການບໍລິຈາກເລືອດແບບສະໝັກໃຈ ໂດຍບໍ່ຮຽກຮ້ອງຄ່າຕອບແທນ ແລະ ຮັບປະກັນການສະໜອງເລືອດທີ່ປອດໄພ ແລະ ພຽງພໍໃນຂອບເຂດທົ່ວປະເທດ.
ກອງປະຊຸມຄັ້ງນີ້ໄດ້ສະຫຼຸບຕີລາຄາຜົນສຳເລັດທີ່ພົ້ນເດັ່ນໃນໄລຍະ 6 ເດືອນຕົ້ນປີຜ່ານມາ:ໄດ້ຈັດກອງປະຊຸມວາງແຜນອອກຮັບບໍລິຈາກເລືອດຢູ່ນະຄອນຫຼວງວຽງຈັນ ແລະ ບັນດາແຂວງໃນທົ່ວປະເທດ, ໄດ້ປັບປຸງພື້ນຖານໂຄງລ່າງໂດຍໄດ້ສ້ອມແປງສູນເລືອດແຂວງຈໍານວນ 5 ແຂວງເພື່ອໃຫ້ເຮັດວຽກໄດ້ດີ,ໄດ້ຕອບສະໜອງອຸປະກອນການແພດ, ຄອມພີວເຕີ ຈໍານວນ 5 ໜ່ວຍໃຫ້ສູນເລືອດແຂວງ,ໄດ້ຕອບສະ ໜອງພາຫະນະຮັບໃຊ້ທາງດ້ານວິຊາການ 3 ຄັນຄື: ລົດສຳລັບອົບຮົມແລະຊຸກຍູ້ຕິດຕາມ 1 ຄັນ ໃຫ້ສະຖາບັນເລືອດແຫ່ງຊາດ, ລົດຕູ້ຮັບບໍລິຈາກເລືອດ ໃຫ້ແກ່ແຂວງໄຊສົມບູນ 1 ຄັນ ແລະ ແຂວງເຊກອງ 1 ຄັນ,ໄດ້ຕອບສະໜອງຄອມພິວເຕີໃຫ້ 3 ແຂວງຄື:ແຂວງຫຼວງພະບາງ, ໄຊຍະບຸລີ ແລະ ແຂວງວຽງຈັນ,ໄດ້ຝຶກອົບຮົມທາງດ້ານວິຊາການ ການປຸກລະດົມບໍລິຈາກເລືອດ, ຄວາມປອດໄພຂອງເລືອດ ແລະ ການນໍາໃຊ້ເລືອດ ໃນລະດັບສູນກາງແລະລະດັບແຂວງ ມີຜູ້ເຂົ້າຮ່ວມຫຼາຍກວ່າ 150 ເທື່ອຄົນ,ໄດ້ສ້າງຂະບວນການໃນວັນສຳຄັນຕ່າງໆຂອງພັກຂອງຊາດ ແລະ ສາກົນ ເຊໍັ່ນ: ວັນຜູ້ບໍລິຈາກເລືອດໂລກ,ຈັດຢູ່ນະຄອນຫຼວງວຽງຈັນ, ຈໍາປາສັກ, ຫຼວງພະບາງ, ສະຫວັນນະເຂດ ແລະ ແຕ່ລະແຂວງກໍໄດ້ຈັດເຊັ່ນດຽວກັນ,ໄດ້ຈັດກອງປະຊຸມເຮັດການອົບຮົມໃຫ້ຜູ້ປະສານງານ ຮ່ວມກັບບັນດາໂຮງຈັກໂຮງງານແລະຫົວໜ່ວຍທຸລະກິດ ໂດຍມີຜູ້ບໍລິຈາກເລືອດໃນກຸ່ມເປົ້າໝາຍນີ້ເພີ້ມຂຶ້ນ 25% ທຽບຈາກປີ 2024,ໄດ້ສຸມໃສ່ຊຸກຍູ້ໃຫ້ແຂວງເພີ່ມທະວີການປຸກລະດົມບໍລິຈາກເລືອດໃຫ້ຫຼາຍຂຶ້ນ ໂດຍສະເພາະແຂວງທີ່ມີທ່າແຮງໃຫ້ສາມາດກຸ້ມຕົນເອງ ຄື: ແຂວງສະຫວັນນະເຂດ, ຈໍາປາສັກ, ຄໍາມ່ວນ ແລະ ແຂວງສາລະວັນ,ໄດ້ຈັດກອງປະຊຸມຄະນະກຳມະການສົ່ງເສີມການບໍລິຈາກເລືອດສົ່ງເລືອດແຫ່ງຊາດ, ໄດ້ຈັດກອງປະຊຸມຮ່ວມກັບພາກສວ່ນສາທາລະນະສຸກໃນການປ້ອງກັນແລະຄວບຄຸມພະຍາດທາລາດເຊເມຍ.ຜ່ານມາເຖິງຈະມີຜົນສຳເລັດໃນຫຼາຍໆດ້ານແຕ່ກໍຍັງມີບັນຫາສິ່ງທ້າທາຍທີ່ສະຖາບັນເລືອດແຫ່ງຊາດ ແລະ ພາກສ່ວນທີ່ກ່ຽວຂ້ອງຕ້ອງໄດ້ເອົາໃສ່ແກ້ໄຂຊ່ວຍກັນ ໂດຍສະເພາະ 3 ເຫດຜົນຫຼັກ ທີ່ບໍ່ຢາກບໍລິຈາກເລືອດ ຄື: ໜຶ່ງ:ຢ້ານ ແລະ ບໍ່ທັນເຂົ້າໃຈກ່ຽວກັບການບໍລິຈາກເລືອດທີ່ເລິກເຊິ່ງ,ສອງ:ຄິດວ່າເປັນເລື່ອງທີ່ໄກໂຕ, ບໍ່ໄດ້ກ່ຽວຂ້ອງ ແລະ ບໍ່ຈໍາເປັນ,ສາມ:ຕ້ອງໄດ້ຮັບອະນຸຍາດຈາກຜູ້ປົກຄອງ, ຕ້ອງໄດ້ຮັບການຊຸກຍູ້ຂອງຄະນະນໍາ/ກົມກອງ.
 |
ທ່ານຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ໄດ້ລາຍລາຍງານວ່າ: ໃນໄລຍະ 6 ເດືອນຕົ້ນປີ, ໄດ້ຮັບເລືອດທັງໝົດ 35,771 ຖົງ, ກວມເອົາ 44% ຂອງເປົ້າໝາຍປະຈໍາປີ 80,400 ຖົງ. ໃນນັ້ນ 15.504 ຖົງ (43%) ແມ່ນບໍລິຈາກເລືອດແບບສະໝັກໃຈ ແລະ ອີກຈໍານວນ 20.267 ຖົງ (57%) ແມ່ນບໍລິຈາກເລືອດຈາກສະມາຊິກຄອບຄົວຂອງຄົນເຈັບ,ຊຶ່ງຈໍານວນເລືອດທັງໝົດທີ່ໄດ້ມາເຫັນວ່າ: ການບໍລິຈາກເລືອດດ້ວຍຄວາມສະໝັກໃຈຍັງຕ່ຳກວ່າເປົ້າໝາຍແຫ່ງຊາດ 70%, ຊຶ່ງໄດ້ເນັ້ນໜັກເຖິງຄວາມຕ້ອງການສືບຕໍ່ສູ້ຊົນ ແລະ ເພີ່ມທະວີການບໍລິຈາກເລືອດດ້ວຍຄວາມສະໝັກໃຈໃຫ້ເພີ່ມຂຶ້ນໃນທົ່ວປະເທດ.
(ຂ່າວ-ພາບ: ສຳນານ)
ຄໍາເຫັນ