ສະຫາຍ ບົວສອນ ມະຫາວົງ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ກ່າວເປີດກອງປະຊຸມວ່າ: ກອງປະຊຸມໃນຄັ້ງນີ້, ພວກເຮົາໄດ້ພ້ອມກັນສະຫຼຸບຕີລາຄາວຽກງານການປັບປຸງກົງຈັກການຈັດຕັ້ງ ຕິດພັນກັບການປັບປຸງກົງຈັກການຈັດຕັ້ງພາຍໃນແຂວງເຮົາ ແລະ ຮັບຟັງການປະກອບຄຳຄິດຄຳເຫັນຈາກພາກສ່ວນຕ່າງໆກ່ຽວກັບວຽກງານຈັດຕັ້ງ ເພື່ອຕີລາຄາໃຫ້ເລິກເຊິ່ງ, ຍົກໃຫ້ເຫັນຜົນງານທີ່ຍາດມາໄດ້ເພື່ອສຶບຕໍ່ເສີມຂະຫຍາຍ, ຕີລາຄາຈຸດອ່ອນ-ຂໍ້ຄົງຄ້າງ, ຊອກໃຫ້ເຫັນສາເຫດເພື່ອຈະໄດ້ເອົາໃຈໃສ່ປັບປຸງແກ້ໄຂ ແລະ ຖອດຖອນບັນດາບົດຮຽນຈາກການຈັດຕັ້ງປະຕິບັດວຽກງານຕົວຈິງໃນປີຜ່ານມາ ເພື່ອນໍາໄປຜັນຂະຫຍາຍ ພ້ອມທັງຄົ້ນຄວ້າປະກອບຄຳເຫັນໃສ່ທິດທາງຄາດໝາຍ ແລະໜ້າທີ່ວຽກງານຈັດຕັ້ງກໍ່ສ້າງພັກ-ພະນັກງານທີ່ຈະຕ້ອງສູ້ຊົນ ຈັດຕັ້ງປະຕິບັດໃນ 1 ປີຕໍ່ໜ້າ ແນໃສກໍ່ສ້າງ, ປັບປຸງພັກເຮົາໃຫ້ປອດໃສ, ເຂັ້ມແຂງ, ໜັກແໜ້ນ ເພື່ອຍົກສູງຄວາມສາມາດນຳພາຂອງຄະນະພັກແຕ່ລະຂັ້ນໃນເງື່ອນໄຂໃໝ່. ຈາກນັ້ນ, ສະຫາຍ ໄກ່ສອນ ອິນທິຈັກ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງທົ່ວແຂວງ ປະຈໍາປີ 2024 ແລະ ທິດທາງໜ້າທີ່ ປີ 2025 ໂດຍສັງເຂບ: ປັດຈຸບັນທົ່ວແຂວງມີ 1 ອົງຄະນະພັກນະຄອນ, 14 ອົງຄະນະພັກເມືອງ, 2 ຄະນະພັກກອງບັນຊາການ ປກຊ-ປກສ ແຂວງ, ມີການຈັດຕັ້ງຮາກຖານພັກທັງໝົດ 2,182 ຮາກຖານ. ໃນຈໍານວນທັງໝົດໄດ້ສໍາເລັດກອງປະຊຸມໃຫຍ່ຂັ້ນຕົນແລ້ວ 2,119 ຮາກຖານ ເທົ່າກັບ 97.11%. ປັດຈຸບັນ, ໃນທົ່ວແຂວງ ມີ 33 ພະແນກການ, 13 ອົງການທຽບເທົ່າ, ຂັ້ນເມືອງມີ 324 ຫ້ອງການ, 135 ຫ້ອງການທຽບເທົ່າ, ໃນຈຳນວນນີ້ ໄດ້ສໍາເລັດການປັບປຸງພາລະບົດບາດ 100%, ບັນດາພະແນກການ-ອົງການທຽບເທົ່າຂັ້ນແຂວງ ໄດ້ສໍາເລັດການຂຽນກໍານົດຕໍາແໜ່ງງານ 28 ພະແນກການ, ຍັງບໍ່ທັນສໍາເລັດ 5 ພະແນກການ ແລະ ຂັ້ນເມືອງ ສໍາເລັດ 147 ຫ້ອງການ, ຍັງບໍ່ທັນສໍາເລັດ 177 ຫ້ອງການ.
ໃນພິທີ ຍັງໄດ້ມີການປະດັບຫຼຽນກາລະນຶກ 70 ປີ ວັນສ້າງຕັ້ງພັກ ປະຊາຊົນປະຕິວັດລາວ ໃຫ້ພະນັກງານ-ລັດຖະກອນຂະແໜງຈັດຕັ້ງແຂວງ ແລະ ບັນດາສະຫາຍຜູ້ຕາງໜ້າຂອງແຕ່ລະພາກສ່ວນ ມີ ທັງໝົດ 163 ສະຫາຍ ຍິງ 44 ສະຫາຍ ໂດຍໃຫ້ກຽດປະດັບຂອງສະຫາຍເລຂາພັກແຂວງ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ