 |
ໃນພິທີ ທ່ານ ສຸນັນທາ ຈຸນລະມະນີ ຫົວໜ້າພະແນກ ກະສິກໍາ ແລະ ປ່າໄມ້ແຂວງ ໄດ້ລາຍງານການກະກຽມສະເຫຼີມສະຫຼອງເນື່ອງໃນວັນປ່ອຍປາ ແລະ ສັດນໍ້າແຫ່ງຊາດ ປະຈໍາປີ 2025 ວ່າ: ໃນວັນທີ 13 ກໍລະກົດຂອງທຸກໆປີ ແມ່ນວັນປ່ອຍປາ ແລະ ສັດນໍ້າແຫ່ງຊາດທີ່ໄດ້ກໍານົດໃນກົດໝາຍວ່າດ້ວຍການປະມົງ (ສະບັບເກົ່າ) ແລະ ກົດໝາຍວ່າດ້ວຍສັດນໍ້າ ແລະ ການປະມົງ (ສະບັບປັບປຸງ) 2023.
 |
ໃນໄລຍະຜ່ານມາ, ພະແນກກະສິກຳ ແລະ ປ່າໄມ້ໄດ້ໃຫ້ຄວາມສຳຄັນຕໍ່ວັນດັ່ງກ່າວໂດຍການສົມທົບກັບທຸກພາກສ່ວນ ທີ່ກ່ຽວຂ້ອງທັງຂັ້ນແຂວງ ແລະ ຂັ້ນເມືອງຈັດພິທີສະເຫຼີມສະຫຼອງ ແລະ ໂຄສະນາເຜີຍແຜ່ບັນດາກົດໝາຍ ແລະ ນິຕິກຳຕ່າງໆທີ່ກ່ຽວຂ້ອງຢ່າງກວ້າງຂວາງໃນທົ່ວແຂວງ, ເພື່ອເຮັດໃຫ້ທຸກພາກສ່ວນໃນສັງຄົມໄດ້ຮັບຮູ້ເຂົ້າໃຈ ແລະ ເຫັນໄດ້ຄວາມສຳຄັນຂອງວຽກງານການຄຸ້ມຄອງ, ອະນຸລັກ, ປົກປັກຮັກສາ, ພັດທະນາ ສັດນໍ້າໃຫ້ມີຄວາມຍືນຍົງເພື່ອປະກອບສ່ວນເຂົ້າໃນການຄໍ້າປະກັນສະບຽງອາຫານ ແລະ ໂພຊະນາການ, ພ້ອມທັງຜະລິດເປັນສິນຄ້າເພື່ອສ້າງລາຍຮັບໃຫ້ປະຊາຊົນຊາວແຂວງສະຫວັນນະເຂດນັບມື້ຫຼາຍຂຶ້ນ. ໃນໄລຍະຜ່ານມາການຈັດຕັ້ງປະຕິບັດວຽກງານດັ່ງກ່າວ ເຮັດໃຫ້ຈຳນວນການປ່ອຍປາ ແລະ ສັດນໍ້າເພີ່ມຂຶ້ນໃນແຕ່ລະປີຄື: ປີ 2022 ປ່ອຍໄດ້ 27 ລ້ານໂຕ, ປີ 2023ປ່ອຍ 28 ລ້ານໂຕ, ປີ 2024 ປ່ອຍ 30 ລ້ານໂຕ ແລະ ໃນປີ 2025 ນີ້, ມີແຜນການຈະປ່ອຍປາ ແລະ ສັດນໍ້າໃຫ້ໄດ້ 38 ລ້ານໂຕ. ໃນນັ້ນ, ປ່ອຍລົງໜອງຂອງຜູ້ປະກອບການ ແລະ ໜອງສະລ້ຽງປາຂອງປະຊາຊົນ 25,700,000 ໂຕ, ປາກະຊັງ 4,500,000 ໂຕ, ປ່ອຍລົງນາເຂົ້າ 110,000 ໂຕ, ໜອງລວມຂອງບ້ານ 5,100,000 ໂຕ, ໜອງປາຊຸມຊົນ 1,200,000 ໂຕ, ປ່ອຍລົງວັງສະຫງວນ 1,005,000 ໂຕ,ປ່ອຍເນື່ອງໃນວັນທີ 13 ກໍລະກົດ ມີ 450,000 ໂຕ ສັງລວມແລ້ວພາກລັດປ່ອຍ 1,455,000 ໂຕ,ປະຊາຊົນປ່ອຍ 36,610,000 ໂຕ.
 |
ຈາກນັ້ນ, ທ່ານ ຄໍາຜຸຍ ສີບຸນເຮືອງ ຮັກສາການເຈົ້ານະຄອນໄກສອນພົມວິຫານ ໄດ້ກ່າວເປີດພິທີວ່າ: ການສະເຫຼີມສະຫຼອງ ວັນປ່ອຍປາ ແລະ ສັດນໍ້າ ແຫ່ງຊາດປີນີ້ ແມ່ນຄົບຮອບ 28 ປີນັບແຕ່ປີ 1997 ເປັນຕົ້ນມາ.
ໃນພິທີ, ຍັງໄດ້ປ່ອຍສັດປ່າປະເພດນົກເຂົາຈໍານວນ 30 ໂຕ, ທີ່ທາງເຈົ້າໜ້າທີ່ກອງກວດກາປ່າໄມ້ຢຶດໄດ້ແລ້ວນຳມາປ່ອຍເພື່ອຄືນສູ່ທຳມະຊາດ, ສຳລັບການປ່ອຍປາແມ່ນໄດ້ປ່ອຍລູກປາຈຳນວນທັງໝົດ 150,000 ໂຕ. ໃນນັ້ນ, ມີ ປາປາກ, ປາກິນຫຍ້າ, ປາເກັດແລບ, ປາໂຣຮູ້, ປາຄັດລາ (ຂາວມັນ) ແລະ ປາຊະນິດອຶ່ນໆ.
ໂອກາດນີ້, ທ່ານ ເຈົ້າແຂວງສະຫວັນນະເຂດ ໄດ້ເນັ້ນໜັກໃຫ້ອໍານາດການປົກຄອງບ້ານບຶງວະໃຫ້ເປັນເຈົ້າການຫຼັກ ໃນການຄຸ້ມຄອງ, ນໍາໃຊ້ ແລະ ປົກປັກຮັກສາອ່າງເກັບນໍ້າບຶງວະແຫ່ງນີ້ ທີ່ເປັນສູນລວມອູ່ເຂົ້າ-ອູ່ປາ ແລະ ແຫຼ່ງທ່ອງທ່ຽວ, ເພື່ອສະພາບແວດລ້ອມທີ່ດີ ໂດຍສະເພາະບັນຫາຂີ້ເຫື້ອຕ້ອງໄດ້ວາງກົດລະບຽບ ແລະ ປັບໄໝຜູ້ທີ່ລະເມີດຢ່າງຈິງຈັງ ແລະ ໃນພິທີດັ່ງກ່າວຄອບຄົວທ່ານເຈົ້າແຂວງຍັງໄດ້ປະກອບສ່ວນມອບເງິນຈໍານວນ 10 ກີບ ແລະ ຄອບຄົວທ່ານຮອງເຈົ້າແຂວງ ມອບຕື່ມອີກຈໍານວນ 5 ລ້ານກີບ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ