Vietjet ແລະ Pratt & Whitney (ທຸລະກິດໃນເຄືອ RTX), ຜູ້ນໍາລະດັບໂລກດ້ານເຄື່ອງຈັກເຮືອບິນ ໄດ້ລົງນາມໃນຂໍ້ຕົກລົງຄັດເລືອກເຄື່ອງຈັກ Pratt & Whitney GTF™ ແລະ ບໍລິການບຳລຸງຮັກສາແບບຄົບວົງຈອນສຳລັບເຮືອບິນ Airbus A321NEO ແລະ A321XLR ຈຳນວນ 44 ລຳ. ມູນຄ່າຂອງສັນຍາປະມານ 5.4 ຕື້ໂດລາ.
Pratt & Whitney ຈະສະໜອງເຄື່ອງຈັກລຸ້ນໃໝ່ເພື່ອເພີ່ມປະສິດທິພາບໃນການເຮັດວຽກ, ຫຼຸດຜ່ອນຄ່າໃຊ້ຈ່າຍໃນການດໍາເນີນງານ ແລະ ຫຼຸດຜ່ອນການປ່ອຍອາຍພິດ, ເພື່ອສະໜັບສະໜູນຍຸດທະສາດການພັດທະນາແບບຍືນຍົງ ແລະ ການຫັນປ່ຽນສູ່ພະລັງງານສີຂຽວຂອງ Vietjet ແລະ ໄດ້ລົງນາມໃນຂໍ້ຕົກລົງການຈັດຫາທຶນສຳລັບເຮືອບິນຮ່ວມກັບ Griffin Global Asset Management ເພື່ອຈັດຫາເຮືອບິນ Boeing 737-8 ຈໍານວນ 6 ລໍາ ຊຶ່ງມີມູນຄ່າປະມານ 965 ລ້ານໂດລາ ຕາມລາຄາຕະຫຼາດ.
ທ່ານ ຫງວຽນ ແທັງ ເຊີນ (Nguyen Thanh Son) ຜູ້ອໍານວຍການໃຫຍ່ຂອງ Vietjetກ່າວວ່າ: ການລົງນາມຂໍ້ຕົກລົງ ໄດ້ສະແດງໃຫ້ເຫັນເຖິງຄວາມມຸ່ງໝັ້ນອັນແຮງກ້າຂອງ Vietjet ໃນການຂະຫຍາຍຂອບເຂດການເປັນພັນທະມິດລະຫວ່າງປະເທດ ແລະ ການພັດທະນາຝູງເຮືອບິນທີ່ທັນສະໄໝ ແລະ ຍືນຍົງ. ພ້ອມທັງສ້າງຮາກຖານອັນໜັກແໜ້ນ ເພື່ອເສີມສ້າງຄວາມເຂັ້ມແຂງທາງດ້ານການເງິນ, ຍົກລະດັບມາດຕະຖານການດຳເນີນງານ ແລະ ສະໜັບສະໜູນການເຕີບໂຕໃນໄລຍະຍາວສຳລັບອຸດສາຫະກຳການບິນຫວຽດນາມ ແລະ ລະດັບສາກົນ.
ປັດຈຸບັນ, ສາຍການບິນໄດ້ເປີດຖ້ຽວບິນກົງ ວຽງຈັນ – ໂຮ່ຈິມິນ/ຮ່າໂນ້ຍ ຊຶ່ງຊ່ວຍໃຫ້ການເດີນທາງໄປສູ່ເມືອງໃຫຍ່ຂອງຫວຽດນາມ ແລະ ປາຍທາງສຳຄັນໃນພາກພື້ນອາຊີ-ປາຊີຟິກ ມີຄວາມສະດວກສະບາຍຫຼາຍຂຶ້ນ.
ຂ່າວ: ຕຸໄລເພັດ
ຄໍາເຫັນ