ສິງກະໂປ ລົງທຶນຫຼາຍກວ່າ 700 ລ້ານໂດລາ ເຂົ້າໃນການພັດທະນາ AI

ຂ່າວສານຫວຽດນາມລາຍງານເມື່ອບໍ່ດົນມານີ້, ຜູ້ບໍລິຫານຂອງບັນດາບໍລິສັດເຕັກໂນໂລຊີ ຢູ່ ສິງກະໂປ ໃຫ້ຮູ້ວ່າ: ແຜນການຂອງສິງກະໂປ ທີ່ຈະລົງທຶນ 1 ຕື້ໂດລາສິງກະໂປ (743 ລ້ານໂດລາ) ໃນ 5 ປີຕໍ່ໜ້າ ເຂົ້າໃນການພັດທະນາຂະແໜງປັນຍາປະດິດ (AI) ແມ່ນສາມາດເສີມຂະຫຍາຍທ່າແຮງຂອງປະເທດເປັນສູນທຸລະກິດໂລກ ແລະ ນະວັດຕະກຳໂລກ.
ຂ່າວລະບຸວ່າ: ທ່ານ ນິຕິນ ຊານດຣາ ຜູ້ບໍລິຫານ Kearney - ບໍລິສັດທີ່ປຶກສາດ້ານການຈັດການລະດັບໂລກໃນອາຊີຕາເວັນອອກສ່ຽງໃຕ້ປະເມີນວ່າ: ຂໍ້ລິເລີ່ມດັ່ງກ່າວຂອງລັດຖະບານສິງກະໂປ ຈະຊ່ວຍຮັບປະກັນບັນດາທຸລະກິດຕ່າງໆ ສາມາດໃຊ້ປະໂຫຍດຈາກໂອກາດທີ່ຄວາມກ້າວໜ້າທາງເຕັກໂນໂລຊີນຳມາໃຫ້ເກີດປະໂຫຍດສູງສຸດ.
ໃນຂະນະດຽວກັນ, ທ່ານ ໂຈນາເທີນ ດິຊັນ ຜູ້ບໍລິຫານຂອງ Cloudflareແລະ ຜູ້ໃຫ້ບໍລິການເຊີເວີຄາວ ສາຂາອາຊີ-ປາຊີຟິກກ່າວວ່າ: ການສົ່ງເສີມການລົງທຶນຂອງ ສິງກະໂປ ຈະຊຸກຍູ້ໃຫ້ບໍລິສັດຕ່າງໆນຳໃຊ້ໂຊລູຊັນ AI ເພື່ອສາມາດແຂ່ງຂັນໄດ້ໃນດ້ານກຳລັງແຮງງານ. ນອກຈາກນີ້, ສິ່ງດັ່ງກ່າວຍັງສົ່ງເສີມຍຸດທະສາດການຮ່ວມມື ແລະ ການແບ່ງປັນຄວາມຮູ້ທົ່ວຂະແໜງອຸດສະຫະກຳ ຊຶ່ງນີ້ແມ່ນການສະແດງໃຫ້ເຫັນເຖິງການສົ່ງເສີມນະວັດຕະກຳໃໝ່.
ກ່ອນໜ້ານັ້ນ, ໃນຖະແຫຼງການກ່ຽວກັບງົບປະມານແຫ່ງຊາດ, ທ່ານ ລໍເລັນ ຫວ່ອງ ຮອງນາຍົກລັດຖະມົນຕີ ສິງກະໂປ ເນັ້ນໜັກວ່າ: ຜ່ານແຜນການລົງທຶນນີ້, ລັດຖະບານສິງກະໂປ ມຸ່ງໄປເຖິງການຮັບປະກັນການເຂົ້າເຖິງຊິບ (chipset) ຂັ້ນສູງ ຊຶ່ງມີບົດບາດສຳຄັນໃນການພັດທະນາ ແລະ ນຳໃຊ້ AI. ສິງກະໂປ ຍັງຈະຮ່ວມມືກັບບໍລິສັດຊັ້ນນຳຂອງປະເທດ ແລະ ທົ່ວໂລກ ສ້າງຕັ້ງສູນ AI ເພື່ອຊຸກຍູ້ການປະດິດສ້າງ.