ສິບສອງພັນນາ ເມືອງທີ່ໜ້າທ່ຽວຊົມ

 ແລະຊີວະນາໆພັນທີ່ອຸດົມສົມບູນ. ສິບສອງພັນນາ ມີນະຄອນຊຽງຮຸງ, ເມືອງໄຫ ແລະ ເມືອງຫຼ້າທີ່ຂຶ້ນກັບ,ມີເນື້ອທີ່ທັງໝົດປະມານ 19,096 ກິໂລຕາແມັດ ແລະ ມີປະຊາກອນອາໄສຢູ່ ປະມານ 1,333,000 ຄົນ. ໃນຈໍານວນນີ້ ມີປະຊາກອນອາໄສຢູ່ໃນຕົວເມືອງແບບຖາວອນມີ672,100 ຄົນ.

ສິບສອງພັນນາເປັນເມືອງທີ່ສະຫງົບ ຕົວເມືອງສະອາດງາມຕາ ມີເສັ້ນທາງຄົມມະນາຄົມທີ່ສະດວກ ນັບແຕ່ຕົວເມືອງຈົນຮອດຊົນນະບົດ ມີແຫຼ່ງທ່ອງທ່ຽວທີ່ມີຊື່ສຽງຫຼາຍແຫ່ງເຊັ່ນ:ປ່າສະຫງວນເຂດຮ້ອນພຽງແຫ່ງດຽວໃນປະເທດຈີນ,ຖືກຂະໜານນາມວ່າເປັນ "ອານາຈັກຂອງພືດ" "ອານາຈັກຂອງສັດ" ແລະເປັນບ່ອນເພາະພັນ"ຢິນຂອງຊີວະວິທະຍາ".ພື້ນທີ່ດັ່ງກ່າວອຸດົມສົມບູນໄປດ້ວຍພືດ ແລະ ສັດ, ລວມທັງພືດ ແລະ ສັດທີ່ຫາຍາກ ແລະ ໃກ້ຈະສູນພັນຫຼາຍຊະນິດ. ສິບສອງພັນນາບໍ່ພຽງແຕ່ເປັນບ່ອນຢູ່ອາໄສຕົ້ນຕໍຂອງຊ້າງປ່າອາຊີເທົ່ານັ້ນ,ຍັງມີພືດ ແລະ ສັດເຂດຮ້ອນເປັນຈຳນວນຫຼວງຫຼາຍເຊັ່ນ:ຕົ້ນດອກໄມ້ນາໆພັນຈາກຫຼາຍປະເທດໃນໂລກ,ຕົ້ນຢາງແລະ ອື່ນໆ.ມີສວນຊາພູເອີ ທີ່ມີຊື່ສຽງຂອງພູຊາບູຮານຕັ້ງຢູ່ບ້ານເຫີ້ກາຍ, ຕາແສງເມີງຫູນ, ເມືອງໄຮ, ພື້ນທີ່ສູງກວ່າລະດັບໜ້ານໍ້າທະເລໃນລະຫວ່າງ 1,221-1,800 ແມັດ, ປະລິມານນ້ຳຝົນສະເລ່ຍຕໍ່ປີ 1,400-1,500 ແມັດມີໝອກ 110 ວັນ/ປີ, ອຸນຫະພູມສະເລ່ຍ 16-18 ອົງສາ, ອັດຕາຄວາມຊຸ່ມຊື້ນ 75%, ໝູ່ບ້ານເຫີ້ຄາຍປະກອບດ້ວຍ 9 ບ້ານມີ 947 ຫຼັງຄາເຮືອນ, ທັງໝົດ 4,577 ຄົນ, ສວນຊາບູຮານທີ່ຕິດກັນຢູ່ໃນບ້ານມີເນື້ອທີ່ຫຼາຍກວ່າ 16,700 ມູ້ (ປະມານ 1,112 ເຮັກຕາ), ໃນນັ້ນ,ມີຕົ້ນຊາບູຮານ 2.33 ລ້ານຕົ້ນມີອາຍຸລະຫວ່າງ 300 ຫາ 1,400 ປີ. ມາຮອດປັດຈຸບັນ,ພູຊາບູຮານເຫີ້ຄາຍເປັນສວນຊາບູຮານທີ່ມີເນື້ອທີ່ຕິດຕໍ່ກັນໃຫຍ່ທີ່ສຸດໃນໂລກ.ນອກຈາກນັ້ນ ຍັງມີໂຮງງານຜະລິດຊາເມືອງໄຮ (ບໍລິສັດຊາເມືອງໄຮຈຳກັດ)ຂຶ້ນກັບວິສາຫະກິດຫຼັກຂອງກຸ່ມບໍລິສັດຊາຕ້າຢູ້ (Dayi) ແລະຕັ້ງຢູ່ໃນເມືອງໄຮ, ກິ່ງແຂວງສິບສອງພັນນາຊຶ່ງຢູ່ເຂດສູນກາງຂອງແຫຼ່ງຜະລິດຊາຜູເອີ. ໂຮງງານດັ່ງກ່າວໄດ້ຕັ້ງຂຶ້ນໃນປີ 1940 ຊຶ່ງໄດ້ກາຍເປັນວິສາຫະກິດຊາທີ່ມີລະບົບຕ່ອງໂສ້ອຸດສາຫະກໍາທີ່ສົມບູນແບບລວມເອົາວັດຖຸດິບການປູກ,ການປຸງແຕ່ງ,ການຄົ້ນຄວ້າແລະພັດທະນາ, ການຈໍາໜ່າຍແລະການສົ່ງເສີມວັດທະນະທໍາຊາເປັນກິດຈະກໍາຕົ້ນຕໍ.

ເມື່ອຮອດຍາມຄໍ່າຄືນໃນຕົວເມືອງມີຕະຫຼາດກາງຄືນທີ່ກວ້າງຂວາງ ເປັນບ່ອນຈໍາໜ່າຍຜະລິດຕະພັນພູມປັນຍາຂອງປະຊາຊົນທີ່ມີການຈັດສັນຢ່າງເປັນລະບຽບ ແລະ ແຕ່ລະຄືນຈະມີການສະແດງສິລະປະພື້ນ ເມືອງຂອງເຜົ່າລື້ ຫຼາກຫຼາຍສີສັນຮັບໃຊ້ມວນຊົນທຸກຄືນ ພິເສດນັກສິນລະປິນສິບສອງພັນນາ ໄດ້ຮ້ອງເພງປະຕິວັດຂອງລາວສຽງດັງກ້ອງໄປທົ່ວງານ.

ສໍາລັບສະພາບອາກາດໃນສິບສອງພັນນາ ບໍ່ຕ່າງຫຍັງຫຼາຍກັບບ້ານເຮົາ ເປັນອາກາດມໍລະສຸມເຂດຮ້ອນ, ມີອຸນຫະພູມສູງ ແລະ ຝົນຕົກຫຼາຍ.ສະພາບດິນຟ້າອາກາດນີ້ເຮັດໃຫ້ ສິບສອງພັນນາ ກາຍເປັນເຂດປູກຝັງລ້ຽງສັດໄດ້ດີ ຕິດພັນກັບການທ່ອງທ່ຽວ.

ຕາມສະຖິຕິຂອງການທ່ອງທ່ຽວ ສິບສອງພັນນາ ໃນປີ 2023ຜ່ານມາ ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວເຖິງ62 ລ້ານກວ່າຄົນ, ເພີ່ມຂຶ້ນ 29.8% ເມື່ອທຽບໃສ່ປີກາຍ.ມີຍອດລາຍຮັບ 97,611 ຕື້ຢວນ,ເພີ່ມຂຶ້ນ 60.8%.ສະເພາະດືອນ 1-9 ປີ2024ສິບສອງພັນນາມີນັກທ່ອງທ່ຽວເຂົ້າມາທ່ຽວ ປະມານ 55.74 ລ້ານເທື່ອຄົນເພີ່ມຂຶ້ນ 3,2% ເມື່ອທຽບໃສ່ໄລຍະດຽວກັນຂອງປີກາຍຄາດວ່າການໃຊ້ຈ່າຍຂອງນັກທ່ອງທ່ຽວພາຍໃນປະເທດຈະມີປະມານ 79,17 ຕື້ຢວນເພີ່ມຂຶ້ນ8,5%.

ນອກຈາກ,ແຫຼ່ງລາຍຮັບຈາກການທ່ອງທ່ຽວແລ້ວ ສິບສອງພັນນາ ຍັງມີລາຍຮັບຈາກການຜະລິດກະສິກໍາປ່າໄມ້,ລ້ຽງສັດ ແລະ ການປະມົງໃນຕະຫຼອດປີ 2023ໄດ້3ຕື້ກວ່າຢວນ,ເພີ່ມຂຶ້ນ 4,2%ເມື່ອທຽບໃສ່ປີກາຍ.ໃນນັ້ນ,ມູນຄ່າການຜະລິດກະສິກໍາ 1,8 ຕື້ກວ່າຢວນ,ເພີ່ມຂຶ້ນ 6,7% ມູນຄ່າການຜະລິດປ່າໄມ້ 698.9 ລ້ານກວ່າຢວນ,ຫຼຸດລົງ 0.6% ມູນຄ່າການລ້ຽງສັດແມ່ນ 212.6 ລ້ານກວ່າຢວນ,ຫຼຸດລົງ 2%; ມູນຄ່າການຜະລິດການປະມົງແມ່ນ 171.2 ລ້ານກວ່າຢວນ, ເພີ່ມຂຶ້ນ 8.8%.ມູນຄ່າການຄ້າຂາເຂົ້າ-ຂາອອກປີ 2023ມີ 5.4 ຕື້ກວ່າຢວນ, ເພີ່ມຂຶ້ນ 13.7% ເມື່ອທຽບໃສ່ປີກາຍ. ໃນນັ້ນ, ມູນຄ່າການນຳເຂົ້າມີ 2.7 ຕື້ກວ່າຢວນ, ເພີ່ມຂຶ້ນ 22.4% ມູນຄ່າການສົ່ງອອກແມ່ນ 2.6 ຕື້ກວ່າຢວນ, ເພີ່ມຂຶ້ນ 5.7%. ການນໍາໃຊ້ຕົວຈິງຂອງການລົງທຶນໂດຍກົງຈາກຕ່າງປະເທດໃນຕະຫຼອດປີມີ14.42 ລ້ານໂດລາ,ເພີ່ມຂຶ້ນ 100.8% ເມື່ອທຽບໃສ່ປີຜ່ານມາ.ອັນໄດ້ເຮັດໃຫ້ຍອດລາຍຮັບງົບປະມານປີ2023ໄດ້ເຖິງ0.645 ຕື້ຢວນ, ເພີ່ມຂຶ້ນ 39.6% ເມື່ອທຽບໃສ່ປີກາຍ. ລາຍຮັບງົບປະມານຂອງລັດທົ່ວໄປແມ່ນ 0.390 ຕື້ຢວນ, ເພີ່ມຂຶ້ນ 17.3%. ໃນນັ້ນ, ລາຍຮັບຈາກພາສີອາກອນໄດ້ 0.278 ຕື້ຢວນ, ເພີ່ມຂຶ້ນ 71.8% ແລະ ລາຍຮັບທີ່ບໍ່ແມ່ນພາສີອາກອນແມ່ນ 0.112 ຕື້ຢວນ, ຫຼຸດລົງ 34.5%.

ປີ 2023, GDP ຂອງສິບສອງພັນນາ ບັນລຸເຖິງ 7.7 ຕື້ກວ່າຢວນ, ເພີ່ມຂຶ້ນ 5.0% ເມື່ອທຽບໃສ່ປີກ່ອນ.ໃນນັ້ນ, ມູນຄ່າເພີ່ມຂອງຂະແໜງການຂັ້ນໜຶ່ງແມ່ນ 1.8 ຕື້ກວ່າຢວນ, ເພີ່ມຂຶ້ນ 4.1%; ມູນຄ່າເພີ່ມຂອງຂະແໜງການສອງແມ່ນ 1.8 ຕື້ກວ່າຢວນ, ເພີ່ມຂຶ້ນ 0.1% ແລະ ມູນຄ່າເພີ່ມຂອງຂະແໜງການຂັ້ນສາມແມ່ນ 4.1 ຕື້ກວ່າຢວນ, ເພີ່ມຂຶ້ນ 7.8%. GDP ຕໍ່ຫົວຄົນຕໍ່ປີແມ່ນ 58,938 ຢວນ, ເພີ່ມຂຶ້ນ 3,9%.

ຖ້າທ່ານໃດຢາກໄປທ່ຽວ ສິບສອງພັນນາ ແມ່ນສາມາດເດີນທາງດ້ວຍລົດໄຟລາວ-ຈີນ ແບບສະດວກສະບາຍ ຈາກວຽງຈັນໄປຮອດ ສິບສອງພັນນາ ແຂວງຢູນນານ ໃຊ້ເວລາປະມານ 7 ຊົ່ວໂມງ ຫຼື ຈະໄປທາງສາຍການບິນ ວຽງຈັນ-ຄຸນມິງໃຊ້ເວລາ ເກືອບ 2 ຊົວໂມງ ແລະ ຂີ່ຍົນຈາກຄຸນມິງ ໄປສິບສອງພັນນາປະມານ 5 ຊົ່ວໂມງ.ຖ້າທ່ານໃດ ມີເງື່ອນໄຂ ແລະ ໂອກາດ ຢ່າລືມໄປທ່ຽວ ສິບສອງພັນນາ ແຂວງຢູນນານ ເມືອງຊົນເຜົ່າລື້ ທ່ານຈະໄດ້ຮຽນຮູ້ປະຫວັດສາດ,ປະເພນີ,ວັດເກົ່າແກ່,ປະຊາຊົນມີນິໄສຕ້ອນຮັບແຂກຄົນດີ ຄືກັບນິໄສຄົນລາວເຮົາ,ອາຫານການກິນໃກ້ຄຽງອາຫານບ້ານເຮົາ,ອາກາດດີ,ບ້ານເມືອງມີການພັດທະນາ ສະອາດ,ຈັດສັນຢ່າງເປັນລະບຽບຮຽບຮ້ອຍ ທັງມີຄວາມສະຫງົບ.