ທີ່ກົມໃຫຍ່ການເມືອງກອງທັບ ໂດຍໃຫ້ກຽດເປັນປະທານແລະ ປາຖະກະຖາຂອງສະຫາຍ ພົນໂທ ແສງນວນ ໄຊຍະລາດ ເລຂາຄະນະພັກ ປະທານສະຫະພັນນັກຮົບເກົ່າແຫ່ງຊາດລາວ, ມີຄະນະພັກ, ຄະນະນໍາ, ຄະນະໜ່ວຍພັກ, ຄະນະກົມ, ນາຍ ແລະ ພົນທະຫານເຂົ້າຮ່ວມ.
ສະຫາຍ ພົນໂທ ແສງນວນ ໄຊຍະລາດໄດ້ຍົກໃຫ້ເຫັນປະຫວັດຂະບວນວິວັດແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງພັກປປລາວໃນທ້າຍສະຕະວັດທີ 19 ຫາຕົ້ນສະຕະວັດ 20 ເປັນໄລຍະທີ່ລັດທິທຶນນິຍົມໄດ້ຂະຫຍາຍຕົວກາຍເປັນລັດທິຈັກກະພັດ, ພວກເຂົາໄດ້ຢຶດເອົາບັນດາປະເທດທີ່ອ່ອນນ້ອຍເປັນຫົວເມືອງຂຶ້ນ ແລະ ເຄິ່ງຫົວເມືອງຂຶ້ນຂອງພວກເຂົາ. ບັນດາປະຊາຊາດຢູ່ແຫຼມອິນດູຈີນ (ລາວ, ຫວຽດນາມແລະ ກຳປູເຈຍ)ໄດ້ຖືກຈັກກະພັດລ່າເມືອງຂຶ້ນແບບເກົ່າຮຸກຮານ ແລະຢຶດຄອງເອົາເປັນຫົວເມືອງຂຶ້ນ.ສຳລັບປະເທດລາວນັບແຕ່ປີ 1893 ພວກລ່າເມືອງຂຶ້ນແບບເກົ່າໄດ້ເຂົ້າມາຢຶດຄອງລາວ ເປັນຫົວເມືອງຂຶ້ນພວກເຂົາໄດ້ດໍາເນີນການກົດຂີ່ຂູດຮີດປະຊາຊົນລາວບັນດາເຜົ່າຢ່າງແສນສາຫັດ ແລະ ໂຫດຮ້າຍປ່າເຖື່ອນ. ຍ້ອນປະຊາຊົນລາວບັນດາເຜົ່າທົນຕໍ່ການກົດຂີ່ຂົມເຫັງບໍ່ໄດ້ຈຶ່ງພາໃຫ້ເກີດມີຂະບວນການຕໍ່ສູ້ຕ້ານກັບຈັກກະພັດລ່າເມືອງຂຶ້ນແບບເກົ່າເປັນແຕ່ລະໄລຍະ, ຂະບວນການຕໍ່ສູ້ແຕ່ລະຄັ້ງລ້ວນແຕ່ບໍ່ໄດ້ຮັບໄຊຊະນະ ແລະ ຖືກປາມປາມໃຫ້ສະຫຼາຍຕົວໄປຍ້ອນຂາດແນວທາງການຕໍ່ສູ້, ຂາດການນຳພາຢ່າງຖືກຕ້ອງ,ເພື່ອຕ້ານຢັນ ແລະ ເອົາຊະນະກັບການຮຸກຮານມັນໄດ້ຮຽກຮ້ອງໃຫ້ມີການນຳພາການຕໍ່ສູ້ທີ່ຖືກຕ້ອງ, ປະທານໂຮ່ຈິມິນຈຶ່ງໄດ້ນໍາເອົາທິດສະດີປະຕິວັດມາເຜີຍແຜ່ແລະນຳພາການປະຕິວັດຢູ່ໃນອິນດູຈີນເຮັດໃຫ້ການປະຕິວັດ 3 ຊາດອິນດູຈີນໄດ້ມີການເຕີບໃຫຍ່ຂະຫຍາຍຕົວ. ມາຮອດວັນທີ 3/2/1930 ພັກກອມມູນິດອິນດູຈີນຈຶ່ງໄດ້ຮັບການສ້າງຕັ້ງຂຶ້ນພາຍໃຕ້ການຊີ້ນຳໂດຍກົງຮອບດ້ານຂອງປະທານໂຮ່ຈິມິນ. ພາຍໃຕ້ການນຳພາຂອງພັກກອມມູນິດອິນດູຈີນການປະຕິວັດຂອງປະເທດເຮົາໄດ້ເຕີບໃຫຍ່ຂຶ້ນເລື້ອຍໆ. ໃນວັນທີ 6-7 ກັນຍາ 1934 ກອງປະຊຸມໃຫຍ່ພັກກອມມູນິດອີນດູຈີນໄດ້ເປີດຂຶ້ນຢູ່ດອນຊິງຊູ້ນະຄອນຫຼວງວຽງຈັນ (ນວ) ພາຍໃຕ້ການເປັນປະທານຂອງທ່ານ ເລ່ແມັງຈິງ.ກອງປະຊຸມໃຫຍ່ໄດ້ຕົກລົງສ້າງຕັ້ງຄະນະບໍລິຫານງານພັກກອມມູນິດອິນດູຈີນປະຈຳພັກແຄວ້ນລາວຊຸດທຳອິດໃສ່ຊື່ວ່າ: “ຄະນະພັກແຄວ້ນລາວ” ຂຶ້ນເພື່ອຊີ້ນຳ-ນຳພາການປະຕິວັດໃນລາວ.ພາຍໃຕ້ການນຳພາຂອງພັກກອມມູນິດອິນດູຈີນ ກໍຄືຄະນະພັກແຄວ້ນລາວ, ພັກໄດ້ຍູ້ແຮງວຽກງານປຸກລະດົມຂົນຂວາຍມະຫາຊົນຢູ່ເຂດຊົນນະບົດ ແລະ ບໍລິເວນຊົນເຜົ່າ, ຖືຊາວໄຮ່ນາເປັນກຳລັງພື້ນຖານຂອງການປະຕິວັດ ເຮັດໃຫ້ຂະບວນການຕໍ່ສູ້ລະເບີດຂຶ້ນແຕ່ຕ່ຳຫາສູງໃນທົ່ວປະເທດດ້ວຍບັນດາຮູບການທີ່ເໝາະສົມ ເປັນສາເຫດພາໃຫ້ມີການຢຶດອຳນາດ 23 ສິງຫາ 1945, ປະກາດເອກະລາດວັນທີ 12 ຕຸລາ 1945, ສ້າງຕັ້ງກອງທັບປະຊາຊົນລາວໃນວັນທີ 20 ມັງກອນ 1949 ແລະ ສ້າງຕັ້ງແນວລາວອິດສະຫຼະຂຶ້ນໃນວັນທີ 13 ສິງຫາ 1950 ຊຶ່ງໄດ້ກາຍເປັນຄັນທຸງເຕົ້າໂຮມ, ດຶງດູດເອົາທຸກຊັ້ນຄົນເຂົ້າຮ່ວມການປະຕິວັດໄດ້ຢ່າງກວ້າງຂວາງແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ພາຍຫຼັງພັກປະຊາຊົນລາວໄດ້ຮັບການສ້າງຕັ້ງຂຶ້ນຕະຫຼອດໄລຍະສ້າງຕັ້ງ, ຕໍ່ສູ້, ເຕີບໃຫຍ່ຂະຫຍາຍຕົວ ແລະ ນຳພາການປະຕິວັດ 70 ປີຜ່ານມາ ພັກຍາມໃດກໍຮັກສາໄດ້ຄຸນທາດການເມືອງ, ທາດແທ້ປະຕິວັດວິທະຍາສາດ; ຢຶດໝັ້ນລັດທິມາກ-ເລນິນ, ແນວຄິດໄກສອນ ພົມວິຫານ, ມູນເຊື້ອອັນດີງາມຂອງພັກຂອງຊາດ ແລະ ຈຸດພິເສດຂອງສປປ ລາວ; ພັກໄດ້ຢຶດໝັ້ນຢ່າງສະເໝີຕົ້ນສະເໝີປາຍຕໍ່ອຸດົມການສັງຄົມນິຍົມດ້ວຍການສ້າງ ແລະ ບູລະນະລະບອບປະຊາທິປະໄຕ ປະຊາຊົນຕາມເສັ້ນທາງກ້າວຂຶ້ນສັງຄົມນິຍົມຢ່າງໜັກແໜ້ນ. ໃນເງື່ອນໄຂໃໝ່ ພັກໄດ້ສືບຕໍ່ນຳພາປະເທດຊາດຜ່ານຜ່າຄວາມຫຍຸ້ງຍາກ, ສິ່ງທ້າທາຍທົດສອບຕ່າງໆ ສາມາດຍາດໄດ້ຜົນງານໃຫຍ່ຫຼວງ, ມີຄວາມໝາຍປະຫວັດສາດ, ປະຕິບັດສອງໜ້າທີ່ຍຸດທະສາດປົກປັກຮັກສາ ແລະ ສ້າງສາປະເທດຊາດມີຜົນສຳເລັດເປັນກ້າວໆ. ເຮັດໃຫ້ປະເທດເຮົາມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ; ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ການຍູ້ແຮງການຫັນເປັນອຸດສາຫະກຳ ແລະ ທັນສະໄໝ; ເພີ່ມທະວີຄວາມສາມາດປ້ອງກັນຊາດ-ປ້ອງກັນຄວາມສະຫງົບ; ເປີດກວ້າງການພົວພັນຮ່ວມມືກັບຕ່າງປະເທດ, ຍົກສູງບົດບາດຂອງປະເທດໃນເວທີສາກົນນັບມື້ສູງຂຶ້ນ; ປັບປຸງຄວາມເຊື່ອໝັ້ນຂອງປະຊາຊົນບັນດາເຜົ່າຕໍ່ກັບການຊີ້ນຳ-ນຳພາຂອງພັກ. ພັກເຮົາສົມແລ້ວທີ່ເປັນກຳລັງຫຼັກແຫຼ່ງນຳພາໃນທົ່ວລະບົບການເມືອງປະຊາທິປະໄຕ ປະຊາຊົນ, ຜົນງານ ແລະ ໄຊຊະນະທີ່ຍາດມາໄດ້ນັ້ນພວກເຮົາສຸດທີ່ມີຄວາມເອກອ້າງທະນົງໃຈຕໍ່ທາດແທ້ອັນດີງາມ, ມູນເຊື້ອວິລະຊົນ ແລະ ປະຫວັດສາດອັນສະຫວ່າງສະໄຫວຂອງພັກ. ຂ່າວ-ພາບ: ຍຸພິນທອງ
ຄໍາເຫັນ