ແລະ ການຊົມໃຊ້ສິນຄ້າພາຍໃນ ເພື່ອຈໍາໜ່າຍສິນຄ້າພາຍໃນ ດ້ວຍລາຄານະໂຍບາຍ ແນໃສ່ຊ່ວຍຫຼຸດຜ່ອນຜົນກະທົບຈາກບັນຫາລາຄາສິນຄ້າແພງ ທີ່ກະທົບຕໍ່ຊີວິດການເປັນຢູ່ ຂອງປະຊາຊົນ, ພະນັກງານ, ລັດຖະກອນ, ທະຫານ, ຕໍາຫຼວດ ແລະ ອື່ນໆ ເປັນຕົ້ນຜູ້ທີ່ມີລາຍຮັບຕໍ່າ.
ພິທີເປີດໂຄງການດັ່ງກ່າວ ໄດ້ຈັດຂຶ້ນໃນວັນທີ 12 ພະຈິກ ຜ່ານມາ ທີ່ກະຊວງ ອຄ, ເຂົ້າຮ່ວມເປັນປະທານກ່າວເປີດໂຄງການໂດຍ ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ; ມີບັນດາຜູ້ຕາງໜ້າຈາກ ສະພາແຫ່ງຊາດ, ຫ້ອງວ່າການສໍານັກງານນາຍົກລັດຖະມົນຕີ, ກະຊວງກະສິກໍາ ແລະ ປ່າໄມ້ສະພາການຄ້າ ແລະ ອຸດສາຫະກໍາແຫ່ງຊາດລາວ ເຂົ້າຮ່ວມ.
ທ່ານ ມະໄລທອງ ກົມມະສິດ ກ່າວວ່າ: ໂຄງການດັ່ງກ່າວ, ຖືເປັນກິດຈະກຳສຳຄັນໜຶ່ງ ໃນການຜັນຂະຫຍາຍການຈັດຕັ້ງປະຕິບັດ ມະຕິ ວ່າດ້ວຍເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ສະບັບເລກທີ 04/ກມສພ, ລົງວັນທີ 11 ເມສາ 2024; ສືບຕໍ່ຜັນຂະຫຍາຍການຈັດຕັ້ງປະຕິບັດ ມະຕິຕົກລົງ ວ່າດ້ວຍການແຕ່ງຕັ້ງຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 19/ກມສພ, ລົງວັນທີ 30 ມິຖຸນາ 2023 ແລະ ຄໍາສັ່ງຂອງນາຍົກລັດຖະມົນຕີ ວ່າດ້ວຍການເພີ່ມທະວີແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 13/ນຍ, ລົງວັນທີ 9 ສິງຫາ 2023. ໂຄງການນີ້ໄດ້ໃຫ້ເຫັນເຖິງ ຄວາມພະຍາຍາມ ແລະ ຄວາມເອົາໃຈໃສ່ ຂອງຂັ້ນເທິງ ຕໍ່ການແກ້ໄຂບັນຫາຊີິວິດການເປັນຢູ່ ຂອງພໍ່ແມ່ປະຊົນ ພະນັກງານທະຫານຕໍາຫຼວດ ຜູ້ທີ່ມີລາຍຕໍ່າ ທີ່ໄດ້ຮັບຜົນກະທົບຈາກຄ່າຄອງຊີບແພງຂຶ້ນ.
ທ່ານ ບຸນທ່ຽງ ລັດຕະນະວົງ ຄະນະບໍລິຫານງານ ສະພາການຄ້າ ແລະ ອຸດສາຫະກຳ ແຫ່ງຊາດລາວຮອງປະທານ ສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ ທັງເປັນສະມາຄົມ ຜະລິດ ແລະ ປຸ່ງແຕ່ງ ກະສິກຳລາວ ໄດ້ໃຫ້ສຳພາດກ່ອນເຂົ້າພິທີດັ່ງກ່າວວ່າ: ສະມາຄົມນີ້ປະກອບດ້ວຍຜູ້ປະກອບການທີ່ເຮັດທຸລະກິດກະສິກຳ ທັງປູກຝັງ, ລ້ຽງສັດ-ການປະມົງ ແລະ ຜະລິດປຸງແຕ່ງສິນຄ້າກະສິກຳ ເປັນສິນຄ້າສຳເລັດຮູບ ໄດ້ພ້ອມກັນເຫັນຄວາມສຳຄັນຂອງບັນດາທິດທາງນະໂຍບາຍ ເພື່ອຈະຊ່ວຍເຫຼືອປະຊາ ຊົນລາວບັນດາເຜົ່າ ທີ່ກຳລັງຖືກກະທົບກັບບັນຫາລາຄາສິນຄ້າແພງ; ສະນັ້ນ, ຈຶ່ງໄດ້ເຕົ້າໂຮມເອົາສິນຄ້າທີ່ເປັນຜົນຜະລິດຂອງບັນດາສະມາຊິກ, ບັນດາກຸ່ມຕ່າງໆ ຢູ່ໃນສະມາຄົມ ແລະ ໄດ້ພ້ອມກັນຄົ້ນຄວ້າເພື່ອເຮັດແນວໃດໃຫ້ທຸກຕ່ອງໂສ້ສາມາດດຳເນີນໄດ້ ສາມາດຢູ່ໄດ້ໂດຍບໍ່ຂາດທຶນ ກໍຄືຜູ້ຜະລິດຢູ່ໄດ້, ຜູ້ຈໍາໜ່າຍຢູ່ໄດ້ ແລະ ທີ່ສຳຄັນແມ່ນໃຫ້ຜູ້ບໍລິໂພກ ມີທາງເລືອກສິນຄ້າອຸປະໂພກ-ບໍລິໂພກ ໃນລາຄາທີ່ຖືກລົງ ໂດຍໄດ້ຄົ້ນຄວ້າໂຄງປະກອບລາຄາສິນຄ້າ ຂອງບັນດາສະມາຊິກ ເພື່ອເບິ່ງອັນໃດສາມາດປະຢັດໄດ້ ແລະ ບໍລິຫານດັດສົມຕ່ອງໂສ້ການຈໍາໜ່າຍສິນຄ້າ ຊຶ່ງຈໍານວນໜຶ່ງກໍໄດ້ນໍາເອົາສິນຄ້າມາຫາຜູ້ບໍລິໂພກໂດຍກົງ ເຮັດໃຫ້ຜູ້ບໍລິໂພກປະຢັດການຊື້ສິນຄ້ານັ້ນລົງເຖິງ 10-15%. ສຳຄັນກໍແມ່ນບໍ່ໄດ້ກະທົບຕໍ່ພາກສ່ວນອື່ນທີ່ເຮັດການຜະລິດ ຫຼື ຈັດຈໍາໜ່າຍໃນກົນໄກປົກກະຕິ, ໂຄງການດັ່ງກ່າວນີ້ ແມ່ນປະຢັດບາງຂອດເພື່ອໃຫ້ຜູ້ບໍລິໂພກໄດ້ຊົມໃຊ້ສິນຄ້າທີ່ຈໍາເປັນໃນລາຄາທີ່ຍ່ອມເຍົາ.
ໂຄງການສົ່ງເສີມການຜະລິດ ແລະ ການຊົມໃຊ້ສິນຄ້າພາຍໃນ ເພື່ອຈໍາໜ່າຍສິນຄ້າພາຍໃນ ດ້ວຍລາຄານະໂຍບາຍຈະລິເລີ່ມທົດລອງຈັດຕັ້ງປະຕິບັດຢູ່ກະຊວງ ອຄ; ຈາກນັ້ນ, ຈຶ່ງຖອດຖອນບົດຮຽນ ແລະ ຄ່ອຍໆຂະຫຍາຍໄປຍັງບັນດາກະຊວງ, ອົງການແລະ ຊຸມຊົນອື່ນໆ.
(ຂ່າວ-ພາບ: ສຸກສະຫວັນ)
ຄໍາເຫັນ