ທ່ານ ລິນຄຳ ດວງສະຫວັນ ຄະນະປະຈໍາພັກສະພາແຫ່ງຊາດ ກໍາມະການຄະນະປະຈໍາສະພາແຫ່ງຊາດ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ທັງເປັນປະທານຄະນະມິດຕະພາບລັດຖະສະພາ ລາວ-ອັງກິດ ພ້ອມຄະນະ ໄດ້ພົບປະກັບ ທ່ານ ນາງ ເມລານີ ຫຼຸຍ ບາໂລ (Melanie Louise Barlow) ເອກອັກຄະລັດຖະທູດ ແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ ປະຈໍາ ສປປ ລາວ ໃນວັນທີ 22 ພະຈິກ ນີ້ ທີ່ຕຶກສະພາແຫ່ງຊາດຫຼັງໃໝ່ ຊຶ່ງການພົບປະຄັ້ງນີ້ ເພື່ອປຶກສາຫາລື ກ່ຽวກັບແຜນການເຄື່ອນໄຫວ ທີ່ຈະເດີນທາງໄປຢ້ຽມຢາມ ແລະ ເຮັດວຽກຢູ່ ຈັກອັງກິິດ ຄາດຄະເນໃນຕົ້ນປີ 2024 ເພື່ອຮັດແໜ້ນຄວາມສຳພັນຂອງສອງລັດຖະສະພາ.
ໃນການພົບປະ, ທ່ານ ລິນຄຳ ດວງສະຫວັນ ໄດ້ກ່າວໃຫ້ຮູ້ວ່າ: ຄະນະມິດຕະພາບລັດຖະສະພາລາວ-ອັງກິດ ມີແຜນທີ່ຈະໄປຢ້ຽມຢາມ ແລະ ເຮັດວຽກ ຢູ່ອັງກິດ ເພື່ອຮັດແໜ້ນຄວາມສຳພັນ ລະຫວ່າງ ສອງລັດຖະສະພາ ຊຶ່ງການພົບປະຄັ້ງນີ້ ກໍເພື່ອປຶກສາຫາລືແຜນການດັ່ງກ່າວ ຊຶ່ງໃນໂອກາດນີ້ ກໍຂໍສະເໜີໃຫ້ ທ່ານ ນາງເມລານີ ຫຼຸຍບາໂລ ຊ່ວຍປະສານງານໄປຍັງ ລັດຖະສະພາ ແຫ່ງ ສະຫະຣາຊະອານາຈັກອັງກິດ ເພື່ອພິຈາລະນາອອກໜັງສືເຊື້ອເຊີນທາງການ ໃຫ້ແກ່ຄະນະມິດຕະພາບລັດຖະສະພາ ລາວ-ອັງກິດ ຂອງສະພາແຫ່ງຊາດລາວ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດ ແຜນການເຄື່ອນໄຫວຢ້ຽມຢາມ ແລະ ເຮັດວຽກຢູ່ ອັງກິດ ຄາດຄະເນໃນຕົ້ນປີ 2024; ແຜນການເຄື່ອນໄຫວ ທີ່ອາດຈະຂໍເຂົ້າຢ້ຽມຂໍ່ານັບ ທ່ານປະທານ ຫຼື ຮອງປະທານລັດຖະສະພາອັງກິດ, ພົບປະເຮັດວຽກກັບ ສະມາຊິກລັດຖະສະພາ ຂອງກໍາມາທິການກ່ຽວຂ້ອງ ໃນຂົງເຂດວຽກງານເສດຖະກິດ. ສ່ວນການປະກອບຄະນະໄປຢ້ຽມຢາມ ປະກອບດ້ວຍ: ປະທານຄະນະມິດຕະພາບ; ສະມາຊິກຄະນະມິດຕະພາບ ຈໍານວນ 3 ທ່ານ ແລະ ວິຊາການ 3 ທ່ານ (ຄາດຄະເນ 7 ທ່ານ) ກໍານົດເວລາຢ້ຽມຢາມ 3-4 ມື້.
ພ້ອມກັນນີ້, ທ່ານ ລິນຄຳ ດວງສະຫວັນ ຍັງໄດ້ແຈ້ງໃຫ້ຊາບວ່າ: ໃນປີ 2024, ສປປ ລາວ ໄດ້ຮັບກຽດເປັນປະທານອາຊຽນ ແລະ ຈະເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 43 ແລະ 44, ສ່ວນສະພາແຫ່ງຊາດລາວ ກໍຈະເປັນເຈົ້າພາບຈັດກອງຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45.
ສປປ ລາວ ແລະ ສະຫະຣາຊະອານາຈັກອັງກິດ-ອຽກລັງເໜືອ ໄດ້ສ້າງຕັ້ງສາຍພົວພັນການທູດ ຮ່ວມກັນ ໃນວັນທີ 5 ກັນຍາ 1955. ນັບຕັ້ງແຕ່ນັ້ນມາ, ການພົວພັນ ລະຫວ່າງ ລາວ-ອັງກິດ ມີທ່າກ້າວ ແລະ ຂະຫຍາຍຕົວ ສະແດງອອກໃນການແລກປ່ຽນຢ້ຽມຢາມ ຂອງຄະນະຜູ້ແທນຂັ້ນຕ່າງໆນໍາກັນ, ສອງຝ່າຍໄດ້ຈັດພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ລາວ-ອັງກິດ ຄົບຮອບ 60 ປີໃນປີ 2015 ແລະ 65 ປີ ໃນປີ 2020. ໃນເວທີສາກົນ, ສປປ ລາວ ໄດ້ສະໜັບສະໜູນອັງກິດ ໃນການເຂົ້າເປັນສະມາຊິກຂອງອົງການຈັດຕັ້ງສາກົນຕ່າງໆ ແລະ ສະໜັບສະໜູນດ້ານອື່ນໆ. ຂະນະດຽວກັນ, ການພົວພັນການຄ້າ ລະຫວ່າງ ລາວ-ອັງກິດ ໃນ 6 ເດືອນຕົ້ນປີ 2021 ມູນຄ່າການຄ້າສອງຝ່າຍ ລາວ-ອັງກິດ ສາມາດປະຕິບັດໄດ້ 19.547 ລ້ານໂດລາ; ໃນນັ້ນ, ມູນຄ່າການນໍາເຂົ້າປະຕິບັດໄດ້ 8.690 ລ້ານ ໂດລາ ແລະ ມູນຄ່າການສົ່ງອອກປະຕິບັດໄດ້ 10.857 ລ້ານໂດລາ.
ແຕ່ຫາກວ່າ, ໄລຍະຜ່ານມາ ສະພາແຫ່ງຊາດລາວ ແລະ ລັດຖະສະພາອັງກິດກໍຍັງບໍ່ທັນມີການພົວພັນກັນເທົ່າທີ່ຄວນ ແຕ່ແນວໃດກໍຕາມ ກໍຍັງມີການແລກປ່ຽນຄະນະຜູ້ແທນ ໂດຍແມ່ນ ມູນນິທິເວດສມິນສະເຕີ, ມີການພົວພັນຮ່ວມມື ໃນເວທີລັດຖະສະພາສາກົນ, ASEP ແລະ ອື່ນໆ.
(ຂ່າວ: ສຸກສະຫວັນ, ພາບ: ສພຊ)
ຄໍາເຫັນ